Ferizaj

LVV e LDK në Ferizaj të gatshme për zgjedhje

Published

5 years ago

22 December, 2020

Partitë politike në Ferizaj janë shprehur të gatshme për zgjedhje të reja pas konstatimit të Gjykatës Kushtetuese se Qeveria e udhëhequr nga Avdullah Hoti, është zgjedhur në mënyrë jokushtetuese.

Kryetari i Lëvizjes Vetëvendosje në Ferizaj Valon Ramadani, thotë se vendimi i Kushtetueses ua kthehu shpresën qytetarëve.

“Secilës parti që i bëhet pyetja se a janë të gatshme për zgjedhje secila thotë që po, por me të vërtet e gatshme për zgjedhje është VV, ka shumë arsye por njëra ndër to është kryeministri Albin Kurti që do ta udhëheq qeverinë Kurti 2, pasi në qeverinë Kurti 1 ka qenë një qeverisje e artë, por me rrëzimin e qeverisë Kurti qytetarëve iu thy shpresa, mirëpo ky vendim që ka dalë dje është i vonuar, por drejtësia ka ardhë në vend dhe sigurisht ka shumë qytetarë që me padurim po e presin ditën kur do të dalin të votojnë dhe me votat e tyre Vetëvendosjen do ta vendosin si subjektin me më së shumti vota që ka pasur ndonjëherë në zgjedhjet e pasluftës”, tha kryetari i LVV-së në Ferizaj Valon Ramadani.

Edhe në Lidhjen Demokratike të Kosovës në Ferizaj, thonë se janë të organizuar dhe të gatshëm për fitore.

“LDK si njëra nga partitë më të vjetra të Ballkanit dhe si paraprijëse e të gjitha proceseve demokratike është e gatshme në çdo kohë që të shkoj në zgjedhje edhe përkundër asaj që rënia e qeverisë mund t’i atribuohet neglizhencës së KQZ-së sesa që mund t’i atribuohet ndonjë partie politike, sepse LDK-ja nuk ka qenë e obliguar që ta dijë se cili nga deputetët është i dënuar e cili jo, megjithatë LDK si një parti institucionaliste e njeh vendimin e Gjykatës Kushtetuese dhe natyrisht do t’i fillojë përgatitjet për zgjedhje me të gjitha strukturat e saj në tërë Kosovën, e po ashtu edhe në Ferizaj e cila si degë e LDK-së për nga fuqia politike është e dyta më e fuqishme sot në Kosovë, prandaj ne si strukturë e organizuar e saj nuk shohim asnjë arsye që mos të dalim fitues në këto zgjedhje dhe të parët në komunën e Ferizajt”, tha Muharrem Svarqa, kryetar i LDK-së në Ferizaj.

Derisa dega e Lëvizjes Vetëvendosje në Ferizaj nuk ka pasur përçarje brenda strukrturës së saj, të paktën publikisht, ngjashëm nuk mund të thuhet edhe për degën e LDK-së në këtë komunë. Për këtë kryetari i LDK-së Muharrem Svarqa thotë se bindjet e individëve brenda partisë mund të jenë të ndryshme, por jo edhe votat e tyre.

“Dega e LDK-së në Ferizaj, të gjitha institucionet e veta, tërë strukturën e saj organizative e ka tërësisht legjitime dhe besoj se të gjitha çështjet eventuale janë produkt i demokracisë për shkak se të gjithë njerëzit brenda LDK-së pavarësisht bindjeve eventuale në momentin e fundit janë të LDK-së dhe votojnë për LDK-në”, tha Svarqa.

Për këtë çështje TV Tema tentoi të marrë ndonjë deklaratë nga Partia Demokratike e Kosovës në Ferizaj, mirëpo askush prej kësaj partie nuk u shpreh i gatshëm të prononcohet.

Ferizaj

Ndalohet për 48 orë i dyshuari për vrasjen në fshatin Balaj

Published

2 days ago

16 September, 2025

Redaksia

Prokuroria Themelore në Ferizaj, bëri të ditur se i dyshuari për vrasjen që ndodhi mbrëmë në fshatin “Balaj”është dërguar në mbajtje në kohëzgjatje prej 48 orësh.

Sipas njoftimit, Prokurori i Shtetit, brenda afatit ligjor do të paraqesë kërkesë pranë gjykatës kompetente për caktimin e masës së paraburgimit ndaj të dyshuarit.

“Prokurori kujdestar nga Departamenti për Krime të Rënda, ka dalë në vendin e ngjarjes, nga aty në bashkëpunim të plotë me Policinë e njësitë relevante kanë ndërmarrë veprime hetimore, me qëllim të ndriçimit të rrethanave të kësaj ngjarje.

Me vendim të prokurorit të shtetit, i dyshuari me iniciale B.R., është ndaluar në kohëzgjatje prej 48-orësh, për shkak të dyshimit të veprës penale “Vrasja” sipas Kodit Penal të Republikës së Kosovës.

Ndërsa, trupi i pajetë i viktimës (I.R), është dërguar në Institutin e Mjekësisë Ligjore (IML), në Prishtinë, për obduksion.

Aktualisht, Prokuroria Themelore në Ferizaj është duke punuar për të sqaruar tutje të gjitha rrethanat dhe motivin e kësaj çështje penale “, thuhet mes tjerash në njoftim.

Sipas Policisë së Kosovës, ngjarjes e cila ndodhi më 15.09.2025 në fshatin Balaji i parapriu një mosmarrëveshje e më pas një fjalosje mes të dyshuarit e viktimës, që mes vete kanë lidhje familjare.

Ferizaj

Policia jep detaje për vrasjen në Ferizaj

Published

2 days ago

16 September, 2025

Redaksia

Një mosmarrëveshje u bë shkak i një vrasjeje që ndodhi mbrëmjen e së hënës, në fshatin Balaj të Ferizajt.

Viktima është qëlluar me katër plumba në stomak derisa policia ka njoftuar se në vendin e ngjarjes kanë gjetur pistoletën dhe 4 gëzhoja.

I dyshuari për këtë krim është arrestuar menjëherë pas ngjarjes.

“Është arrestuar i dyshuari mashkull kosovar, nën dyshimin se i njëjti pas një mosmarrëveshje që kishte me viktimën mashkull kosovar, ka shtënë me armë zjarri në drejtim të tij dhe për pasojë, viktima ka mbetur pa shenja jete.

Vdekjen e viktimës e ka konstatuar ekipi mjekësor, ndërsa njësitet policore në vendin e ngjarjes kanë gjetur dhe konfiskuar pistoletën dhe 4-gëzhoja që dyshohet se janë shkrepur nga i dyshuari”, thuhet në raportin 24 orësh të Policisë së Kosovës.

Në shtëpinë e të dyshuarit janë gjetur edhe dy armë dhe municione.

“Po ashtu gjatë kontrollit në shtëpinë e të dyshuarit është gjetur edhe një pushkë gjuetie, me 72 fishekë të kalibrit 12 mm, dhe një pushkë ajrore. Me urdhër të prokurorit trupi i pajetë i viktimës është dërguar në IML për obduksion, ndërsa i dyshuari është dërguar në mbajtje”, thuhet mes tjerash në raportin 24 orësh të policisë.

Ferizaj

Vdes një person në Ferizaj pasi u godit nga një lis

Published

4 days ago

14 September, 2025

Redaksia

Policia e Kosovës ka njoftuar se një person ka vdekur pasi është goditur nga një lis.

Rasti ka ndodhur pasditen e së shtunës rreth orës 17:20 në fshatin Manastirc të komunës së Ferizajt.

Sipas raportit 24 orësh të policisë, vdekjen e tij e ka konfirmuar mjeku kujdestar në Qendrën Klinike Universitare të Kosovës.

“Raportohet se viktima mashkull kosovar derisa ka qenë në afërsi të oborrit duke prerë dru, një lis bie mbi viktimën dhe si pasoj, i njëjti pëson lëndime trupore dhe dërgohet fillimisht në qendrën emergjente, e më pas në QKUK, ku mjeku kujdestar konfirmon vdekjen e tij. Lidhur me rastin është njoftuar prokurorit, ndërsa trupi i pa jetë u lirohet familjareve për ceremoni mortore” – thuhet në raport.