Ferizaj

”Bifurkacioni”: Uji i pijes në Ferizaj është cilësor edhe pas reshjeve

Published

5 years ago

12 January, 2021

Reshjet e shumta të shiut dhe borës kanë ngritur dyshime tek qytetarët se uji i pijes është turbulluar.

Por, një gjë e tillë mohohet nga menaxhmenti i kompanisë rajonale të ujit “Bifurkacioni” në Ferizaj. Ushtruesi i detyrës së drejtorit të kësaj kompanie Nazif Asllani, thotë se reshjet e shiut kanë shkaktuar telashe në sistemin e fabrikës së ujit në Pleshinë, por jo edhe në cilësinë e tij. Ai i garanton qytetarët se uji që furnizon ata nga fabrika e Pleshinës është i pijshëm.

“Reshjet e shiut edhe në Ferizaj në sistemin e ujësjellësit kanë shkaktuar telashe, lumi me vete ka sjell drunj e gurë të mëdhenj, por ne kemi intervenuar qysh dje dhe është bërë zhbllokimi, mirëpo ka pasur edhe turbullira të mëdha dhe ka qenë e pamundur me furnizu qytetin normal me ujë të pijes. Mbrëmë e kemi ndalë ujin më herët që me u mbush rezervuarët, mirëpo ajo sasi që ka qenë është e pamjaftueshme për qytetin. Qyteti momentalisht ka ujë, është i pijshëm dhe është me standarde, mirëpo nuk ka presion të mjaftueshëm”, tha Asllani.

Se uji i pijes që del nga fabrika e Pleshinës është cilësor e thotë edhe laboranti i kësaj fabrike, Safit Halili.

”Sa i përket reshjeve mundet me pas ç’rregullime dhe mund të ketë dyshime në kualitetin e ujit, por e vërteta është se kualiteti i ujit është në nivel të duhur dhe nuk ka fije dyshimi, me plot përgjegjësi e them si përfaqësues këtu, në laboratorin tonë parametrat që duhet të jenë janë në nivelin e duhur, prandaj nuk duhet fare qytetarët të kenë dyshime. Asnjë pikë uji nuk e lejojmë me shku tek qytetarët pa e përpunuar, ne në çdo sekond e përcjellim qarkullimin e ujit brenda fabrikës këtu, ndërsa në pjesën e qytetit ne nuk japim përgjegjësi”, tha Halili.

Ndërkaq, drejtoresha e Qendrës Rajonale të Shëndetit Publik në Ferizaj, Sevdije Mehmeti, përmes telefonit tha se mostrat e fundit të ujit që janë marrë në Ferizaj kanë rezultuar se uji në këtë komunë është brenda standardeve të parapara për pije.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

5 days ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

6 days ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

1 week ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim