Ferizaj

Drejtoria e Shëndetësisë në Ferizaj për tri vjet me tre drejtorë

Published

5 years ago

01 February, 2021

Kur kanë mbetur më pak se një vit nga mbajtja e zgjedhjeve lokale, kryetari i komunës së Ferizajt Agim Aliu e ka liruar nga detyra drejtorin e Shëndetësisë dhe Mirëqenies Sociale Bekim Ademin, i cili ishte pjesë e partisë Nisma Socialdemokrate që është në koalicion me PDK-në në këtë qytet.

Për këtë lirim nga detyra të Ademit, askush nga ekzekutivi i Ferizajt nuk pranoi të flas para kamerës gjatë ditës së sotme, ashtu sikur edhe tanimë ish-drejtori i Shëndetësisë Bekim Ademi. Por, ky i fundit ka paraqitur arsyen e dorëheqjes në rrjetin social ”Facebook”, ku ka treguar se ka dhënë dorëheqje nga kjo pozitë për shkak të pakënaqësive brenda subjektit të tij politik.

“Arsyeja e kësaj dorëheqje vjen si rezultat i pakënaqësive me subjektin politik të cilit i takoja dhe në emër të të cilit edhe mbaja pozitën e drejtorit në qeverisjen lokale të komunës së Ferizajt. Duke pasur parasysh presionin e vazhdueshëm të zyrtarëve brenda këtij subjekti dhe së voni edhe trysnisë që pa vullnetin tim të më kandidojnë për deputet në Parlamentin e Republikës së Kosovës në zgjedhjet që do të mbahen në muajin shkurt të këtij viti dhe mos gatishmërisë sime për të qenë pjesë e kësaj liste zgjedhore, konsideroj se angazhimi im ishte i përqëndruar në punën dhe menaxhimin e sistemit shëndetësor, si dhe në gjendjen e rëndë me pandeminë Covid-19 në të cilën po kalon vendi”, ka shkruar Ademi në arsyetimin e dorëheqjes së tij.

Ne anën tjetër, kryetari i Nismës në Ferizaj Besnik Berisha, thotë se nuk ka qenë i njoftuar për këtë dorëheqje, ndërsa e pranon se ka kohë që nuk ka pasur kontakte me Ademin.

“Nuk kam informata se çka ka ndodhë, nuk kam pas njohuri sepse ka qenë vikend dhe nuk jam konsultu dhe nuk jam taku me ish-drejtorin, sot jam njoftu se është liruar nga detyra, me të s’kam pas takime, janë pikëpamjet politike ndonjëherë që ndeshen, por s’kam pasur diçka tjetër me të, ai e ka menaxhuar situatën me pandeminë shumë mirë dhe ne si parti jemi të kënaqur me punën e tij”, tha Berisha.

Nisma Socialdemokrate tashmë i ka gjetur zëvendësimin Ademit. Është Abetare Kurti ajo e cila nga nesër do ta marrë nën udhëheqje Drejtorinë e Shëndetësisë në Ferizaj.

Bekim Ademi nuk është drejtori i parë që jep dorëheqje gjatë qeverisjes së Agim Aliut.

Nga pozita e drejtorit të Arsimit që në fillim ishte larguar Bashkim Hyseni, më pas Besnik Berisha la Drejtorinë e Shëndetësisë, ndërsa Naim Ferati dha dorëheqje nga pozita e nënkryetarit të komunës.

Dorëheqje e ndërrime të shumta të udhëheqësve gjatë qeverisjes së Agim Aliut janë bërë edhe në Zyrën e Prokurimit dhe në Inspektoratin komunal.

Ferizaj

Ngritët aktakuza e parë për zgjedhjet e 28 dhjetorit

Published

2 weeks ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

3 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.