Ferizaj

Kurti e Osmani vizitojnë Ferizajn

Published

6 years ago

04 February, 2021

Kandidati për kryeministër nga Lëvizja Vetëvendosje Albin Kurti dhe numri dy i listës zgjedhore të kësaj partie Vjosa Osmani, kanë vizituar Ferizajn ku u pritën nga një numër i madh i qytetarëve.

Nga sheshi i qytetit të Ferizajt, Kurti e Osmani iu drejtuan shkurt turmës së qytetarëve të cilët i ndiqnin pas me brohoritje.

“Ju lutem që të vazhdoni të takoni qytetarë në mënyrë që dalja më 14 shkurt të jetë masive”, tha Kurti.

“Mos të mbetet asnjë qytetarë pa votuar për ndryshim”, tha Osmani.

E, para se të takoheshin me qytetarë, Kurti e Osmani vizituan fabrikën ”Ëmbëlsia” në Ferizaj, nga ku kandidati për kryeministër Albin Kurti premtoi se me ardhjen e tij në pushtet do t’i ndihmoj bizneset prodhuese.

“Kudo që ka prodhim ne do të ndihmojmë si qeveri e ardhshme, të gjithë ata që krijojnë e prodhojnë do t’i ndihmojmë që të eksportojnë e të zëvendësojnë importin, e nëse krijojnë edhe linja të reja të prodhimit dhe e rrisin numrin e punëtorëve aq më pranë do të jemi e aq më e madhe mbështetja do të jetë për ta. Ne duhet të prodhojmë këtu brenda dhe ta lidhim arsimin me ekonominë, pra ta lidhim edukimin profesional me vendin e punës, ta luftojmë krimin e korrupsionin, me neve çdo biznesi i eliminohet ryshfeti në fillim, edhe haraçi”, tha Kurti.

Në këtë fabrikë ata u pritën me një ëmbëlsirë me numrin 127, numër ky të cilin Lëvizja Vetëvendosje e mban në fletëvotimin e zgjedhjeve të 14 shkurtit. Para punëtorëve të kësaj fabrike, Kurti bëri disa premtime.

“Do ta ndihmojmë me politika sociale popullsinë, sepse politika sociale ndihmon me zbut varfërinë, konkretisht për të gjithë fëmijët prej kur lindin deri në moshën 2 vjeçare 20 euro në muaj, prej moshës 2-16 vjeç 10 euro në muaj, me neve s’do të ketë varfëri ekstreme. 1 mijë bursa për vajzat studente, pastaj banimin e përballueshëm, sepse rinia i duan 3 gjëra, banimin e përballueshëm, edukimin cilësor dhe punën profesionale, sepse një pjesë e madhe e rinisë tonë nuk kanë mundësi të dalin nga banesat e prindërve të tyre, prandaj banimi me kosto të përballueshme është jetik për zhvillimin normal në Kosovë”, tha Kurti.

Kurti e Osmani gjatë ditës vizituan edhe fshatin Greme.

Ferizaj

Një burrë theret me kaçavidë nga dy persona në Ferizaj

Published

5 days ago

22 September, 2026

Redaksia

Një burrë është therur me kaçavidë nga dy persona të panjohur në Ferizaj.

Rasti është raportuar mbrëmjen e së hënës rreth orës 22:30. Sipas policisë, viktima ka pësuar lëndime të lehta trupore dhe pas trajtimit mjekësor është liruar.

Ferizaj / 21.09.2026 – 22:30.

‘Është raportuar se viktima mashkull kosovar ka kërkuar ndihmë mjekësore, pasi dyshohet se i njëjti është therur me një mjetë të mprehtë (kaçavidë) nga dy persona të panjohur. Pas tretmanit mjekësor i njëjti është liruar”, thuhet në raportin e policisë.

Ferizaj

Javën e kaluar Policia shqiptoi 1205 gjoba dhe pezulloi 30 patenta shoferi në Ferizaj

Published

6 days ago

21 September, 2026

Redaksia

Policia e Ferizajt gjatë javës së kaluar ka shqiptuar 1 mijë e 205 gjoba për kundërvajtje në trafik dhe ka pezulluar 20 patentë shoferi.

Në këtë hark kohor janë regjistruar 30 aksidente përfshirë edhe ato ku mbetën të lënduar 13 persona.

“Gjatë javës së kaluar, nga data 14-20.09.2026 janë shqiptuar 1.205 gjoba kundërvajtëse, si dhe janë pezulluar 20 patentë shoferë për shoferët e mjeteve që kanë kryer shkelje të rënda në trafik. Gjatë kësaj periudhe janë regjistruar gjithsej 30 aksidente, nga të cilat 9 aksidente me lëndime, ku kanë mbetur të lënduar 13 persona 21 aksidente me dëme materiale”- thuhet në komunikatën e së hënës (21.09.2026) të Zyrës për Informim dhe Marrëdhënie me Publikun të Policisë Rajonale të Ferizajt.

Ferizaj

Gjendet në Tiranë 80 vjeçari nga Ferizaj i raportuar i zhdukur që nga 17 gushti

Published

3 weeks ago

07 September, 2026

Redaksia

Shoqata e Kosovës për Kërkim Shpëtim njoftoi se 80-vjeçari Hamëz Ismali nga Ferizaj, i cili ishte raportuar i zhdukur që nga 17 gushti, është gjetur në Tiranë.

Ismaili aktualisht është në trajtim mjekësor në spitalin e Tiranës.

Gjetja e tij u bë e mundur falë kërkimeve intensive dhe bashkëpunimit të Shoqatës për Kërkim Shpëtim me policinë e Kosovës, atë të Shqipërisë, qytetarëve dhe ekipeve të angazhuara në këtë operacion.

Familjarët e Ismailit kishin bërë thirrje publike qytetarëve për informacion për vendndodhjen e tij, pasi për herë të fundit ishte parë më 18 gusht në Stacionin e Autobusëve në Tiranë, ku kishte mbërritur me një kompani transportuese nga Kosova.

“Shoqata e Kosovës për Kërkim Shpëtim njofton se, pas kërkimeve intensive së bashku me Policinë e Kosovës dhe angazhimit të ekipeve, është bërë e mundur gjetja e z. Hamëz Ismali, 80 vjeç, nga Ferizaj, i cili ishte raportuar i humbur që nga data 17 gusht.

Z. Hamëz është gjetur në Tiranë, ku aktualisht po merr trajtim në spital.

Shpresojmë që gjendja e tij të përmirësohet sa më shpejt dhe që së shpejti të rikthehet pranë familjes dhe në shtëpinë e tij. Falënderojmë Policinë e Kosovës, Policinë e Shqipërisë, si dhe të gjithë qytetarët, institucionet dhe personat e tjerë që kontribuuan dhe ndihmuan në gjetjen e z. Hamëz”, thuhet mes tjerash në njoftimin e Shoqatës së Kosovës për Kërkim Shpëtim.