Ferizaj

Ferizaj sërish probleme me mbeturina

Published

6 years ago

22 February, 2021

Ditëve të fundit Ferizaj është mbushur me mbeturina. Rreth kontejnerëve janë krijuar grumbuj mbeturinash për shkak se në vendin e destinuar për to më nuk ka vend. E gjithë kjo, sipas kompanisë për menaxhimin e mbeturinave “Pastërtia” në Ferizaj, po ndodhë për shkak të prishjes së makinerive dhe disa kontejnerëve nëntokësor.

”Është e vërtet që ditëve të fundit ka pasur telashe pak më të mëdha, sidomos tek pjesa e kontejnerëve nëntokësor, por mund t’iu them që disa nga kontejnerët nëntokësor nuk janë funksional dhe se kemi vetëm një kamion të vetëm që e posedon pajisjen për zbrazjen e këtyre kontejnerëve nëntokësor dhe të cilin e kemi pasur në defekt. Ne sot veçse jemi duke u marrë intensivisht me riparimin e atij kamioni dhe po besojmë se më së shumti brenda dy-tri ditëve do të jetë funksional dhe nuk do të ketë problem të zbrazjes së kontejnerëve“, tha drejtori i kompanisë “Pastërtia”, Dukagjin Hetemi.

Edhe pse orari për marrjen e mbeturinave shpeshherë nuk respektohet as nga vetë punëtorët e kësaj kompanie që merren me grumbullimin e tyre në qytet dhe fshatra, Hetemi bën thirrje tek qytetarët që ta respektojnë orarin për hedhjen e mbeturinave.

“Apelojmë tek qytetarët që orarin e hedhjes së mbeturinave ta respektojnë, sepse në çdo cep të qytetit është edhe tabela e orarit të hedhjes së mbeturinave dhe lloji i mbeturinave që hedhet, sidomos në kontejnerët nëntokësor, sepse janë me një peshë 3 metra kub dhe në rast se hedhen siç ndodhë pallka të qeramikës e beton është i pashmangshëm dëmtimi i tyre dhe është gati se e pamundur nxjerrja e atyre mbeturinave. Po ashtu, një çështje tjetër që duhet ta themi është se kur ndodhë vonesa në marrjen e mbeturinave na shkakton probleme çështja e deponisë, pasi ne detyrohemi që t’i bartim mbeturinat në fshatin Velikincë të Gjilanit ku është deponia atje dhe në momentin që ne e nisim kamionin për në Gjilan atëherë ç’rregullohet orari i marrjes së mbeturinave dhe krijohen vonesat”, tha Hetemi.

Kjo nuk është hera e parë që në Ferizaj krijohen deponi me mbeturina kudo nëpër qytet. Kjo gjendje po përsëritet për të disatën, jo vetëm për shkak të problemeve teknike, por edhe nga bojkoti i punës nga ana e punëtorëve të kësaj kompanie.

Ferizaj

Javën e kaluar Policia shqiptoi 1205 gjoba dhe pezulloi 30 patenta shoferi në Ferizaj

Published

10 hours ago

21 September, 2026

Redaksia

Policia e Ferizajt gjatë javës së kaluar ka shqiptuar 1 mijë e 205 gjoba për kundërvajtje në trafik dhe ka pezulluar 20 patentë shoferi.

Në këtë hark kohor janë regjistruar 30 aksidente përfshirë edhe ato ku mbetën të lënduar 13 persona.

“Gjatë javës së kaluar, nga data 14-20.09.2026 janë shqiptuar 1.205 gjoba kundërvajtëse, si dhe janë pezulluar 20 patentë shoferë për shoferët e mjeteve që kanë kryer shkelje të rënda në trafik. Gjatë kësaj periudhe janë regjistruar gjithsej 30 aksidente, nga të cilat 9 aksidente me lëndime, ku kanë mbetur të lënduar 13 persona 21 aksidente me dëme materiale”- thuhet në komunikatën e së hënës (21.09.2026) të Zyrës për Informim dhe Marrëdhënie me Publikun të Policisë Rajonale të Ferizajt.

Ferizaj

Gjendet në Tiranë 80 vjeçari nga Ferizaj i raportuar i zhdukur që nga 17 gushti

Published

2 weeks ago

07 September, 2026

Redaksia

Shoqata e Kosovës për Kërkim Shpëtim njoftoi se 80-vjeçari Hamëz Ismali nga Ferizaj, i cili ishte raportuar i zhdukur që nga 17 gushti, është gjetur në Tiranë.

Ismaili aktualisht është në trajtim mjekësor në spitalin e Tiranës.

Gjetja e tij u bë e mundur falë kërkimeve intensive dhe bashkëpunimit të Shoqatës për Kërkim Shpëtim me policinë e Kosovës, atë të Shqipërisë, qytetarëve dhe ekipeve të angazhuara në këtë operacion.

Familjarët e Ismailit kishin bërë thirrje publike qytetarëve për informacion për vendndodhjen e tij, pasi për herë të fundit ishte parë më 18 gusht në Stacionin e Autobusëve në Tiranë, ku kishte mbërritur me një kompani transportuese nga Kosova.

“Shoqata e Kosovës për Kërkim Shpëtim njofton se, pas kërkimeve intensive së bashku me Policinë e Kosovës dhe angazhimit të ekipeve, është bërë e mundur gjetja e z. Hamëz Ismali, 80 vjeç, nga Ferizaj, i cili ishte raportuar i humbur që nga data 17 gusht.

Z. Hamëz është gjetur në Tiranë, ku aktualisht po merr trajtim në spital.

Shpresojmë që gjendja e tij të përmirësohet sa më shpejt dhe që së shpejti të rikthehet pranë familjes dhe në shtëpinë e tij. Falënderojmë Policinë e Kosovës, Policinë e Shqipërisë, si dhe të gjithë qytetarët, institucionet dhe personat e tjerë që kontribuuan dhe ndihmuan në gjetjen e z. Hamëz”, thuhet mes tjerash në njoftimin e Shoqatës së Kosovës për Kërkim Shpëtim.

Ferizaj

Në Ferizaj raportohen katër bankënota të dyshuara nga 500 €

Published

4 weeks ago

25 August, 2026

Redaksia

Policia në Ferizaj ka njoftuar se në një bankë janë dorëzuar katër bankënota në vlerë nga 500 €, të cilat dyshohet se janë falsifikuara.

Në raportin 24 orës, Policia ka njoftuar se kartëmonedhat e dyshuara janë sekuestruar për ekzaminim të mëtutjeshëm.

“Rr. Dëshmorët e Kombit, Ferizaj – Raportohet nga banka se kanë pranuar katër bankënota në vlerë nga 500 €, të cilat dyshohet se janë falsifikuara. Njësitet policore kanë dalë në vendin e ngjarjes dhe kanë sekuestruar kartëmonedhat e dyshuara për ekzaminime të mëtutjeshëm. Lidhur me rastin është informuar e konsultuar edhe prokurori.”