Mal Musa trajner i ri i klubit të xhudos ”Kastrioti”

Në mënyrë solemne klubi i xhudos “Kastrioti” në Ferizaj ka bërë ndërrimin e trajnerëve. Agron Krasniqi i cili udhëhoqi klubin e  xhudos “Kastrioti” për 15 vite rresht, ia dorëzoi këtë detyrë trajnerit Mal Musa.

“Mendoj se 15 vite ishin mjaftueshëm sepse gjatë këtyre viteve ne fituam si klub mbi 900 medalje. Unë në këtë palestër kam filluar stërvitjet ku në muajin e ardhshëm bëhen 41 vite që kam filluar të merrem me xhudo dhe gjatë kësaj periudhe me trajnerin tim të parë Daut Dautin dhe anëtarët e tjerë si klub i xhudos kemi pasur mjaft shumë suksese, klubi ka fituar medalje para e pas lufte dhe unë jam ndër ta që kam zënë vendin e parë në turnet që janë mbajtur në ish-Jugosllavi,  kështu që rezultatet e klubit nuk kanë munguar asnjëherë”, tha Krasniqi.

Krasniqi thotë se sukseset e klubit të xhudos do të ishin shumë më të mëdha nëse do të merrnin pjesë në të gjitha garat ndërkombëtare.

“Xhudo për mua është më shumë se sport, unë këtu jam rritur pasi kam filluar në moshën 10 vjeçare dhe xhudo për mua është gjithçka. Unë jam i bindur se rezultatet do të ishin edhe më të mëdha, sepse në të gjitha turnet ndërkombëtare që kemi marrë pjesë kemi pasur shumë ftesa nga klube të ndryshme, por për shkak të regjimit të vizave ne nuk kemi mundur me marrë pjesë dhe kjo ka ndikuar në këto rezultate që janë se po të ishin kushtet rezultatet do të ishin edhe më të mëdha”, tha Krasniqi.

 Trajneri i ri i klubit të xhudos “Kastrioti”, Mal Musa, thotë se do mundohet ta ruaj statusin që gëzon ky klub ndër vite, madje edhe ta avancoj edhe më shumë.

“Unë i falënderoj që më kanë besuar këtë titull, është nder për mua kjo detyrë, besoj se do të vazhdoj ta mbajë ritmin e njëjtë të klubit, ta çoj përpara klubin,  kështu që do të mundohem të jap më të mirën”, tha Musa.

Ish-trajneri i klubit të xhudos ”Kastrioti” dhe trajneri i ri i këtij klubi, apeluan për më shumë përkrahje nga institucionet për këtë sport, pasi thanë se funksionimi i klubit me vetëfinancim është mjaft i vështirë.

Leave a Comment

Your email address will not be published.

This site uses Akismet to reduce spam. Learn how your comment data is processed.

300X220