Ferizaj

Qentë endacakë, problem i pazgjidhur

Published

5 years ago

24 March, 2021

Qentë endacakë vazhdojnë të jenë njëri ndër problemet më serioze me të cilin po përballen qytetarët e Ferizajt. Ndër më të rrezikuarit janë nxënësit të cilët shkojnë nëpër shkolla.

Lidhur me këtë problem, drejtori i Bujqësisë në Ferizaj Burim Bajrami thotë se deri në muajin prill, kur presin ta nënshkruajnë kontratën për menaxhimin e qenve endacakë, nuk mund të bëjnë asgjë në këtë drejtim pasi në dorë këtë çështje e ka Agjencia e Ushqimit dhe Veterinës.

“Në vitin 2018 kur ne ishim kompetent kemi trajtuar numër të madh të qenve endacakë dhe disi e zbutëm problematikën e këtyre qenve gjatë atij viti, por me një vendim të kryeministrit të atëhershëm Ramush Haradinaj kjo kompetencë kaloi tek AUK dhe deri në prill kjo kompetencë është e tyre, ata e kanë bërë punën e vet, por prapë numri i qenve endacakë është problem. Si Drejtori e Bujqësisë në fund të prillit do të nënshkruajmë kontratën me një operator ekonomik brenda komunës sonë dhe kjo kompani do ta ketë obligim që të merret me qentë endacakë“, tha Bajrami.

Drejtori i Bujqësisë në Ferizaj, fajëson edhe qytetarët për sjelljen që bëjnë ndaj qenve endacakë.

”Mungon edhe një informim i veçantë për mënyrën e sjelljes ndaj kafshëve, mund të shkojmë në secilën strehimore dhe të futemi brenda tyre dhe mos të kemi telashe, por ekziston frika tek njerëzit që në momentin kur hasin në qenë endacakë përdorin mjete të ndryshme dhe i sulmojnë ata për t’i larguar nga rruga dhe normalisht kjo shfaq agresivitetin e tyre dhe sulmet e tyre ndaj njerëzve”, thotë Bajrami.

Në komunën e Ferizajt është premtuar edhe ndërtimi i një strehimoreje për qentë endacakë, por që drejtori Bajrami tha se do ta bëjnë publike vetëm atëherë kur të kenë përfunduar procedurat për këtë projekt.

Në anën tjetër, në drejtorinë regjionale të Agjencisë së Ushqimit dhe Veterinarisë në Ferizaj nuk pranuan të flasin për këtë problem duke thënë se nuk kanë të drejtë të japin prononcime, derisa kontakti me zëdhënësin e kësaj agjencie Lamir Thaçi ishte i pamundur.

Ferizaj

Bëhet i ditur identiteti i viktimave të aksidentit tragjik në Gjermani

Published

4 days ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

4 days ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

6 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.