Ferizaj

Gratë të diskriminuara në tregun e punës

Published

5 years ago

28 April, 2021

Në prag të 1 majit Ditës së Punëtorëve, në Ferizaj u organizua një tryezë diskutimi me temën “Gjendja e punësimit në komunën e Ferizajt”.

Në këtë tryezë që u organizua nga “Nisja, Zhvilllohu” në bashkëpunim me ”Caritas Kosova”, u prezantua edhe një hulumtim mbi tregun e punës në Ferizaj.

Artiola Kajtazi nga ”Nisja, Zhvillohu” tregon se nga hulumtimi kanë kuptuar se sektori i ndërtimtarisë ka më së shumti nevojë për punëtorë.

“Kemi parë sfida kryesisht të grave në tregun e punës. Disa diskriminime që atyre iu bëhen për shkak të moshës dhe gjinisë, mirëpo kemi kuptu edhe disa nevoja të tregut të punës që ndoshta nuk kanë qenë të qarta më herët, çka kërkohet më tepër në Ferizaj“, tha ajo.

Kurse, Florina Ujupi nga ”Nisja, Zhvillohu”, thotë se hulumtimi u bë përmes fokus-grupeve me institucionet lokale dhe me bizneset ferizajase.

Ujupi thotë se në Ferizaj në sektorët ku ka më shumë kërkesë për punëtorë, tregu i punës është i mangët, për dallim nga sektorët ku ka më pak kërkesë për punëtorë.

“Të drejtat e punëtorit së pari nuk respektohen në kuptimin e pagesës së tatimeve dhe kontributeve pensionale. Nga fokus grupi na ka dalë një e dhënë që pasi tregu i punës është i stërmbushur, punëtorët pranojnë me punu me çfarëdo kushte, pa kontrata, pavarësisht edhe nëse paga është ajo e duhura gjithmonë lajmërohet vetëm paga minimale prej 170 euro. Shumica e punëtorëve edhe nuk janë në dijeni për të drejtat e tyre. Gjithmonë gjërat po mbesin në ajër. Edhe nëse shkon në inspektorat e sheh që ankesa për këtë pjesë nuk ka“, theksoi Florina Ujupi.

Nga ky hulumtim ka dalë se pagesa e Trustit ka më së shumti mungesa tek gratë ku vetëm 2 për qind të tyre u janë paguar kontributet.

Teksa femrat po ashtu diskriminohen edhe në punësim, meshkujt janë rreth 70% më të punësuar.

Shkumbin Arifi, koordinator i ”Caritas Kosova” tregon se kjo organizatë po tenton t’i aftësojë të rinjtë dhe gratë që të jenë konkurrentë në tregun e punës.

Arifi shtoi se ka disbalancë mes ofertës dhe kërkesës në tregun e punës, ku Ferizaj ka nevojë për profilet teknike dhe profesionistë, kurse të rinjtë drejtohen në profile shoqërore dhe ekonomike.

“Kemi fillu një fushatë avokimi verës për me i inkuraju të rinjtë me shku në shkolla profesionale. Kemi pas edhe postera e kemi zhvillu edhe takime, por pandemia na i pamundësoi takimet në shkolla. Shumica e të rinjve në klasën e nëntë nuk e dinë se çka ofron shkolla profesionale e Ferizajt. Unë kisha rekomandu shumë që shkollat profesionale para regjistrimit me ba një fushatë vetëdijësimi në shkollat e Ferizajt lidhur me ofertën që e kanë”, tha Shkumbin Arifi.

Ndërsa, pronari i ”Plus Market”-it në Ferizaj Sylejman Neziri, thotë se të drejtat e punëtorëve në Kosovë po shkelen dhe se pagat në përgjithësi janë të ulëta.

“Shoqëria civile dhe të gjithë punëtorët duhen të çohen në këmbë kundër qeverisë e cila që 20 vjet ka punu vetëm për vete e jo për punëtorët. Tash kur u ba shpërndarja kompanitë e mëdha përfituan miliona euro, kurse ato të voglat asnjë cent nuk e morën. Edhe punëtorët tanë janë të zhgënjyer, janë të rënduar nga pandemia. Unë edhe me dashtë si bashkëpronar i ”Plus Market”-it dhe i Fabrikës së Veglave nuk kam mundësi me ua rritë punëtorëve rrogën. Nuk e kisha lënë as një punëtor nën 500 euro, por nuk ka”, tha Neziri.

Hulumtimi “A ka edhe një punë për mua?”, tregon se gjatë vitit 2020 u bë një rritje artificiale e punëkërkuesëve në Zyrën e Punësimit prej 40 fish më shumë se në vitin 2019, për shkak të pandemisë dhe pakove të rimëkëmbjes.

Ferizaj

Lëndohen tre policë gjatë arrestimit të sulmuesit 16 vjeç në Ferizaj

Published

8 hours ago

10 July, 2026

Redaksia

Policia e Kosovës ka njoftuar se gjatë arrestimit të të miturit me inicialet P.GJ (16 vjeç), i dyshuar për therje të dy personave mëngjesin e sotëm në Ferizaj, janë lënduar tre zyrtarë policor ku njëri prej tyre është goditur me thikë në pjesën e qafës.

Sipas policisë, pas kontrollit ë banesën e të dyshuarit dhe më pas në një adresë në fshatin Greme, policia ka arritur ta lokalizojë atë.

“Me të arritur në vendngjarje, i dyshuari ka refuzuar t’u bindet urdhrave policorë, duke mbajtur një thikë në dorë, ka sulmuar zyrtarët policorë me gurë dhe mjete të forta, si dhe është vërsulur ndaj tyre me thikë.

Gjatë ndërhyrjes, nëna e tij ka penguar zyrtarët policorë në kryerjen e detyrës zyrtare.

Në një moment, i dyshuari ka marrë një shishe me benzinë dhe ia ka hedhur vetes mbi trup, duke vazhduar t’i kërcënojë policët me thikë dhe duke mos lejuar afrimin e tyre.

Gjatë përpjekjeve për vënien e tij nën kontroll, tre zyrtarë policorë kanë pësuar lëndime, ndërsa njëri prej tyre është goditur me thikë në pjesën e qafës.

Pas ndërhyrjes policore, i dyshuari me inicialet P.GJ (16 vjeç) është vënë nën kontroll dhe është arrestuar së bashku me nënën e tij D.GJ (47 vjeçe).

Gjithashtu është sekuestruar edhe thika, e cila dyshohet se është përdorur në sulmin ndaj qytetarëve”, ka njoftuar policia.

Në përditësimin e fundit, thuhet se në sulmin që ndodhi rreth orës 07:53, në rrugën ‘Dëshmorët e Kombit’, në afërsi të Postës Qendrore në Ferizaj, mbetën të plagosur dy qytetarë, të cilët u dërguan për trajtim mjekësor në Spitalin e Ferizajt.

Njëri nga të plagosurit, I.M. 81 vjeç, ishte therur në fytyrë dhe në gjymtyrë, ndërsa i plagosuri tjetër, një zyrtar i degës së Postës së Kosovës në Ferizaj, pas trajtimit mjekësor është liruar për në shtëpi.

Në njoftimin e Prokurorisë në Ferizaj, i dyshuari me vendim të Prokurorit të Shtetit është ndaluar në kohëzgjatje prej 24-orësh, për shkak të dyshimit se i njëjti ka kryer veprat penale “Sulmi ndaj personit zyrtar” dhe “Vrasja në tentativë”.

Ferizaj

Arrestohet i dyshuari për plagosjen e dy personave me thikë në Ferizaj

Published

11 hours ago

10 July, 2026

Redaksia

Është ndaluar një person, i mitur, i dyshuar për rastin e sulmit dhe therjes me thikë të dy personave të tjerë, mëngjesin e sotëm në Ferizaj.

“Rasti ka ndodhur sot, më datën 10.07.2026, rreth orës 07:53, në rrugën ‘Dëshmorët e Kombit’, në afërsi të Postës Qendrore në Ferizaj, ku, sipas informatave fillestare, dyshohet se i mituri ka sulmuar me mjet të mprehtë (thikë) dy persona të tjerë” , njoftoi Prokuroria.

Të lënduarit janë dërguar për trajtim mjekësor në Emergjencën e Ferizajt.

Sipas informacioneve të fundit, njëri nga të plagosurit, I.M 81 vjeç, ka pësuar therje të rëndë në fytyrë dhe në gjymtyrë, ndërkaq i plagosuri tjetër, një zyrtar i degës së Postës së Kosovës në Ferizaj, pas trajtimit mjekësor në Emergjencën e Spitalit është liruar për në shtëpi.

Ferizaj

Arratiset i dyshuari për plagosje me thikë të dy personave në Ferizaj

Published

12 hours ago

10 July, 2026

Redaksia

Një person dyshohet se ka sulmuar dhe therur me thikë dy të tjerë mëngjesin e sotëm afër objektit të postës qendrore në Ferizaj.

Të lënduarit janë dërguar për trajtim mjekësor në Emergjencën e Ferizajt, kurse i dyshuari është arratisur nga vendi i ngjarjes.

Policia bëri të ditur se është në kërkim intensiv për të dyshuarin dhe se po shikohen kamerat për të ndihmuar në identifikimin e të dyshuarit dhe sqarimin e rrethanave të rastit.

“Sot, rreth orës 07:50, kemi pranuar informatën se në rrugën “Dëshmorët e Kombit”, në afërsi të Postës Qendrore në Ferizaj, ka ndodhur një incident, ku një person dyshohet se ka sulmuar dy persona me mjet të mprehtë (thikë), të cilët janë transportuar për trajtim mjekësor në Emergjencën e Ferizajt, pasi kanë marrë ndihmën e parë në vendin e ngjarjes nga ekipet mjekësore. I dyshuari është larguar nga vendi i ngjarjes në drejtim të panjohur”, njoftoi Policia.