Ferizaj

Projekti i Stacionit të Autobusëve pritet të përfundoj në fund të vitit 2022

Published

4 years ago

14 May, 2021

Gjatë vitit 2020 ka filluar ndërtimi i Stacionit të ri të Autobusëve në Ferizaj në rrugën “Reçaku”. Mirëpo punët në këtë stacion akoma po vazhdojnë teksa përfundimi i këtij projekti pritet të bëhet në fund të vitit 2022.

Drejtori i Infrastrukturës në komunën e Ferizajt Arbër Bytyqi, thotë se stacioni aktual me rreth 500 hyrje-dalje të autobusëve në ditë, po e rëndon komunikacionin në qytet.

“Ne i kemi shqyrtuar dy alternativa. Alternativa e parë është që me të përfunduar sivjet faza e parë e projektit të akomodohemi me kushtet minimale për punëtorët e Stacionit të Autobusëve dhe të fillohet puna në lokacionin e ri, mirëpo jemi vetëm në fazën e negociatave me Stacionion e Autobusëve. Alternativa e dytë është rilokimi pas përfundimit të projektit që shpresojmë të jetë fundi i vitit të ardhshëm”, thotë Bytyqi për Tv Tema.

Bytyqi tregoi për zgjidhjen e mundshme për qytetarët që u bie larg vendndodhja e stacionit të ri të autobusëve.

“Nga fokusi i qytetarëve mund të duket pak larg, por nga qendra është vetëm një kilometër distancë. Për një kilometër nuk është distancë e largët, mirëpo pas përfundimit të projektit ne nuk do ta lëmë me kaq, pavarësisht se vetëm një kilometër është larg. Do të bëjmë analizat për trafikun urban i cili në një fazë të ardhshme besoj se do të jetë i domosdoshëm për qytetin e Ferizajt me rritjen e qytetit e besoj se kjo do të jetë zgjidhja e duhur për Ferizajn”, tha Bytyqi.

Kurse, drejtoresha e Stacionit të Autobusëve në Ferizaj Albulena Çalaj, përmes një përgjigje me shkrim tha se kurdo që përfundohet projekti i Stacionit të ri, ata janë gati të zhvendosen.

“Për stacionin e ri njëherë nuk kemi ndonjë datë ose kohë të caktuar zyrtare kur do të zhvendosemi. Megjithëse ne jemi gati kurdo që bëhet stacioni ne të zhvendosemi. Për këtë edhe nuk kam ndonjë përgjgijie, pasi atje ende po punohet“, tha Çalaj.

Ferizaj

Lëndohet një person në vendin e punës në Ferizaj

Published

1 week ago

30 April, 2025

Redaksia

Një person është lënduar të martën në vendin e punës në Ferizaj.

Në raportin 24 orësh të policisë bëhet e ditur se ai është dërguar për trajtim mjekësor në QKUK, derisa në vendin e ngjarjes kanë njësitet policore dhe inspektorati i punës.

Rasti është iniciuar si “asgjësim, dëmtim apo heqja e pajisjeve mbrojtëse dhe rrezikim i sigurisë në vendin e punës”.

“Raportohet se viktima mashkull kosovar gjatë punës ka pësuar lëndime trupore dhe është dërguar në tretman mjekësor në QKUK. Në vendin e ngjarjes kanë dal njësitet përkatëse policore dhe inspektori i punës”, thuhet në njoftimin e policisë.

Ferizaj

Arrestohet një i dyshuar për therjen e 16 vjeçarit në Ferizaj

Published

1 week ago

28 April, 2025

Redaksia

Policia ka identifikuar njërin nga tre personat që sulmuan dhe plagosën me thikë të miturin F.V. 16 vjeç, në oborrin e një shkolle në rrugën “Gjon Sereqi” në Ferizaj.

Sipas policisë, i dyshuari M.D., shtetas i Shqipërisë, është arrestuar sot rreth orës 12:30 në rrugën “At Nikë Prela” në Ferizaj dhe gjatë kontrollit atij i është gjetur dhe konfiskuar një thikë që dyshohet të jetë përdorur në kryerjen e veprës penale.

Me vendim të prokurorit të rastit, i dyshuari është ndaluar për 24 orë, në pritje të procedurave të mëtejshme hetimore.

Ndryshe, i mituri i plagosur rëndë, pas trajtimit fillestar në emergjencën e Ferizajt është dërguar në Qendrën Klinike Universitare të Kosovës (QKUK) në Prishtinë.

Ferizaj

I mituri në gjendje të rëndë pas sulmit me thikë në Ferizaj

Published

2 weeks ago

28 April, 2025

Redaksia

Një i mitur ka mbetur i lënduar rëndë pasi është sulmuar me thikë nga tre persona të dielën në Ferizaj.

Policia ka njoftuar se viktima është dërguar në Qendrën Klinike Universitare të Kosovës pas trajtimit mjekësor në emergjencën e Ferizajt.

Në raportin 24 orësh të policisë bëhet e ditur se sulmi fizik ndaj viktimës ka ndodhur të dielën, në rrugën “Gjon Sereqi” rreth orës 15:10, derisa ende nuk dihet identiteti i sulmuesve.

“Viktima mashkull kosovar ka pësuar lëndime pasi që i njëjti dyshohet se është sulmuar nga tre persona të panjohur, ku njëri prej tyre e ka goditur viktimën me një mjet të mprehtë-thikë. Viktimës fillimisht i është ofruar tretman mjekësor në QE-Ferizaj, pastaj është dërguar për trajtim të mëtejshëm në QKUK. Lidhur me rastin është informuar e konsultuar edhe prokurori, ndërsa njësitet policore kanë dalë në vendin e ngjarjes dhe janë duke hetuar rastin”, ka njoftuar Policia e Kosovës.