Ferizaj

Ferizaj rinis me vonesë vaksinimin, furnizohet me vetëm 204 vaksina

Published

5 years ago

25 May, 2021

Gjatë ditës së hënë, por edhe paraditen e së martës, personat që deshën të vaksinohen në Ferizaj u kthyen në shtëpi pa e marrë vaksinën, krejt kjo pasi që kontingjenti i ri i vaksinave nuk kishte arritur akoma.

Të moshuarit u detyruan të kthehen në shtëpi pa e marrë vaksinën, madje disa për të dytën ditë.

“Unë për Dispanzer jam nis, aty më thanë me shku te salla, prej sallës erdha këtu, tash për momentin nuk ka vaksina. Po presim, online kanë thanë që me u lajmëru e unë nuk e kam ditë këta. Sot erdha me marrë vaksinën por nuk ka, kështu që duhet me u kthy te shpia, çka me ba”, tha Enver Berisha.

“Jam ardhë edhe dje për vaksinë, thanë jena përgatitë po s’ka. S’ka, s’ka, ditën e mirë, çka kemi me ba. Jo deri tash nuk jemi regjistru, veç me letërnjoftim u kanë, kush ka mujt me mrri. Prej tash çka bajnë, tybe ne di”, tha Fehmi Mehmeti.

Zëvendësdrejtori i Qendrës Kryesore të Mjekësisë Familjare në Ferizaj Afrim Abazi, tregon pse nuk filloi vaksinimi të hënën ashtu siç edhe ishte paralajmëruar.

“Kjo vonesë ka ndodhë, jo për arsye tonë, por dihet që ne furnizimin e bëjmë prej Ministrisë së Shëndetësisë. Javën e kaluar Ministria na ka lajmëru që do të furnizohemi të hënën dhe si i tillë është lansu një lajm, por ajo nuk ka ndodhë, por jo me fajin tonë sepse varësisht se si na furnizon Ministria e Shëndetësisë ne e kryejmë edhe detyrën tonë. Lajm i mirë është që sot kemi pranu një sasi të vaksinave, diku 204 doza që janë të pamjaftueshme, por ato që janë ne do t’i japim gjatë javës”, theksoi zëvendësdrejtori i QKMF-së.

Megjithatë, në orën 12:00 rifilloi vaksinimi në sallën e edukatës fizike në shkollën e mesme të Agrobiznesit dhe Teknologjisë.

Sot ishte planifikuar që të vaksinohen 36 persona me vaksinën anti-Covid, persona këta të regjistruar në platformën E-Kosova.

Shefja e vaksnimit Drita Nazifi-Emini, tha se personat që do të marrin këto doza të vaksinës do të jenë personat e moshës mbi 65 vjeçare.

“Ne tani kemi rifilluar vaksinimin e pacientëve të cilët janë të planifikuar në bazë të planit shtetëror të vaksinimit, të cilët janë të regjistruar në platformën E-Kosova. Pacientët e regjistruar në E-Kosova do të kontaktohen përmes telefonit dhe do të caktohen me termine që të mos ketë grumbull të pacientëve, por edhe të ketë pritje me distancë dhe të përcillet më mirë gjendja shëndetësore pas marrjes së vaksinës, ku rregulli është që të qëndrohet 15 minuta”, tha ajo.

Hajrie Orana dhe Lebibe Selmani të cilat u vaksinuan sot tregojnë për përvojën e tyre me vaksinën.

“Ka shku shumë mirë, problem s’kena pas, na kanë thirrë”, tha Hajrie Orana.

“Sot kaluam mirë, kemi apliku online. Na kanë thirrë një javë përpara, nuk kish pas, jemi kthy, kurse sot na thirrën e krytem mirë”, tha Lebibe Selmani.

Ferizaj kësaj radhe u furnizua me vaksinat e kompanisë Pfizer/Biontech.

Ferizaj

Ngritët aktakuza e parë për zgjedhjet e 28 dhjetorit

Published

2 days ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

4 days ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

2 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.