Ferizaj

Shtyhet shqyrtimi gjyqësor për njërin nga të akuzuarit në rastin e vrasjes së Shkodran Bytyqit

Published

5 years ago

28 May, 2021

Në Gjykatën Themelore në Ferizaj sot nga ora 10:00 ishte planifikuar të mbahej seanca gjyqësore kundër D.L i akuzuar për veprën penale ndihmë në vrasje të rëndë.

I dyshuari D.L akuzohet për ndihmë në rastin e vrasjes dhe djegies së trupit të Shkodran Bytyqit nga Ferizaj.

Seanca e sotme nuk u mbajt për shkak se Prokuroria Themelore në Ferizaj nuk kishte dërguar prokuror për rastin në fjalë, me arsyetimin se në Departamentin e Krimeve të Rënda nuk ka numër të mjaftueshëm të prokurorëve.

Trupi gjyqësor vendosi që kjo seancë të mbahet më 28 qershor.

“Atëherë pasi që sot është 28 maj, po e lëmë më 28 qershor. Avokatë, a e keni këtë datë të lirë? Më 28 qershor, ora 10:00. Shpresoj që do të krijohen kushtet për me e mbajtë shqyrtimin gjyqësor. Nëse nuk krijohen do t’iu njoftojmë që mos me iu mundu” tha Sahit Krasniqi, kryetar i Trupit Gjykues.

E, avokati i familjes Bytyqi, Visar Musa tha se familja pret dënim meritor për të akuzuarin.

“Konsiderojmë se nga ky shqyrtim gjyqësor do të dalin rrethana dhe fakte të reja nga ky i akuzuar për këtë vepër penale. Familja është mjaft e indinjuar, konsiderojmë që sado pak të arrijmë një satisfaksion moral për shqiptimin e një denimi meritor për këtë të akuzuar”, tha ai.

Për këtë rast, Gjykata Themelore në Ferizaj e kishte dënuar me burgim të përjetshëm të akuzuarin kryesor Trimor Lalinovcin, por me vendim të Gjykatës së Apelit dënimi i tij u ul në 30 vjet burgim.

Aktualisht rasti i Trimor Lalinovcit është dërguar për shqyrtim në Gjykatën Supreme.

Ferizaj

Ferizaj: Konfiskohen rreth 780 gram drogë dhe arrestohen dy të dyshuar për manipulim të provave

Published

9 hours ago

24 April, 2026

Redaksia

Policia në Ferizaj ka arrestuar dy persona të dyshuar për veprën penale “Manipulim i provave” që ka të bëjë me rastin e një dite më parë (22.04.2026), kur ishte arrestuar një i dyshuar, pasi në veturën e tij u gjetën tri qese me narkotikë të llojit marihuanë me peshë rreth 15.57 gram.

Në raportin shtesë të policisë bëhet e ditur se lidhur me rastin paraprak “njësitet policore gjatë kontrollit si prova materiale kanë gjetur dhe konfiskuar 778.3 gramë substancë e dyshuar narkotike të llojit marihuanë dhe një peshore digjitale. “

Rasti raportohet të ketë ndodhur të mërkurën mbrëma, rreth orës 21:00, në rrugën “Rifat Berisha” në Ferizaj.

Me vendim të prokurorit, dy të dyshuarit pas intervistimit janë dërguar në mbajtje.

Ferizaj

Ferizaj kualifikohet në finale të Kupës së Kosovës në futboll

Published

2 days ago

22 April, 2026

Redaksia

Futbollistët e Ferizajt u kualifikuan për në finalen e Kupës së Kosovës në futboll, pasi në gjysmëfinale eliminuan ekipin e Llapit me rezultat të përgjithshëm 2:1.

Ndeshja e kthimit, e zhvilluar sot në stadiumin e qytetit të Ferizajt, përfundoi pa gola 0-0, por falë fitores prej 2-1 si mysafir në ndeshjen e parë, ferizajasit siguruan vendin në finalen e madhe ku do të përballen me Dukagjinin, i cili në gjysmëfinalen tjetër, eliminoi Ballkanin me rezultat të përgjithshëm 6:2.

Takimi i sotëm në Ferizaj u ndërpre për disa minuta pas hedhjes të gjësendeve në fushë nga shikuesit, për të vazhduar vetëm pas largimit të tërësishëm të shikuesve nga tribunat.

Kjo do të jetë finalja e tretë për ferizajasit, pas asaj të edicionit 2011/2012 kur humbi nga Trepça ’89 dhe finales së edicionit 2012/2013 të cilën e humbi nga Prishtina.

Ferizaj

Humb jetën nxënësi 15 vjeçar në ambientet gjimnazit në Ferizaj

Published

1 week ago

17 April, 2026

Redaksia

Një nxënës ka humbur jetën në ambientet shkollore të gjimnazit “Kuvendi i Arbërit” në Ferizaj.

Sipas policisë, viktima është rrëzuar pa ndjenja në sallën e edukatës fizike dhe me urgjencë është dërguar në Qendrën Emergjente në Ferizaj, ku pavarësisht trajtimit mjekësor, ka ndërruar jetë.

“Me datë 17.04.2026, rreth orës 15:15, është pranuar një informatë se në shkollën e mesme “Kuvendi i Arbërit”, në rrugën “Brahim Ademi” në Ferizaj, një nxënës mashkull (15 vjeç), në rrethana ende të panjohura, është rrëzuar pa ndjenja në sallën e edukatës fizike”, njoftoi zëdhënësi i Policisë për rajonin e Ferizajt, Kanun Veseli.

Në vendngjarje, rastin janë duke e trajtuar hetuesit e stacionit, ata rajonalë dhe krimteknikët ndërsa me urdhër të prokurorit të shtetit, trupi i pajetë është dërguar në Institutin e Mjekësisë Ligjore për obduksion.