Ferizaj

Opozita kritikon punën e ekzekutivit gjatë vitit 2020

Published

5 years ago

31 May, 2021

Në mbledhjen e Kuvendit Komunal të Ferizajt u diskutua raporti i punës së ekzekutivit lokal gjatë vitit 2020.
Kryetari i Ferizajt Agim Aliu, listoi punët e filluara dhe ato të përfunduara nga qeverisja e tij gjatë këtij viti.

“Edhe pse viti 2020 solli vështirësi pa fund, shtrëngime financiare, rënie të inkasimeve, natyrisht të mirëkuptuara në të tilla situata, arritëm të përmbushim në 100% e saj platformën tonë investive për Ferizajn që duam dhe na dhanë besimin ferizajasit. Në rrafshin e insfrastrukturës rrugove, jo vetëm 2020 por gjithë mandati ynë qeverisës ishte dhe do të mbetet mandat i transformimit të Ferizajt. Këtë e thonë dhe përjetojnë më së miri secili ferizajas që i gëzohet të mirës publike”, tha ai.

Aliu mori kritika nga opozita ferizajase.

“Mendoj se një herë duhet të kërkoni falje për projektet e dështuara si p.sh Qendra e Inovacionit. Përmendët që keni shtru shumë rrugë me asfalt, edhe për këtë duhet të kërkosh falje, sepse për këto 20 vitet e fundit kurrë nuk është shtru asfalt më i dobët, bile të rekomandoj me përdorë helme kundër barishteve sepse në çdo rrugë kemi barishte. Përmende rrethin e Nikadinit, po ta rikujtoj që sivjet një herë patëm vërshime e ky rreth u mbush me ujë, d.m.th projekt i dështuar. Përmende që për 20 vjet ka pasur rrugë të dobëta, por po harron qeverisjen tuaj 17 muajshe dhe qeverisjen e Bajrush Xhemajlit. I përmendët shkollat, por të lutem kryetar më trego cila shkollë po përfundon në mandatin tuaj se nuk e kam të qartë. Po ta rikujtoj që kemi shkolla që nuk i përmbushin kushtet për mësim. I përmendët që janë ndihmu 38 biznese, por është dashur me tregu cilat janë ato sepse disa nga ato biznese janë familjarë të Drejtorit të Zhvillimit Ekonomik”, tha Amir Rexhepi, asamblist i AKR-së.

“Kryetar ju dëgjova për investimet në “Pastërtia”, pasi që këto ditë ka pasur shumë ankesa nga qytetarët e po bëhen dy javë që mbeturinat janë kudo në qytet dhe fshatra që nuk janë tërheqë dhe ata si shkak thojnë që mekanizmat u mungojnë edhe kanë defekte në mekanizma”, tha Xhevat Sallahu nga LVV.
“Këtu nuk është paraqitur asgjë, por sipas hulumtimeve të OJQ-ve del fakti se vetëm tri kompani arrijnë me marrë 44.8% të gjithë tenderëve në Ferizaj. Tri kompani me pesë tendera. D.m.th janë kompanitë e njëjta që në vazhdimësi marrin tendera edhe para dy vjetëve edhe në vitin e kaluar d.m.th tenderat në tri kompani shkojnë”, tha Flamur Istrefi, kuvendar i LDK-së.

“Viti 2020 ishte vit i dështuar në futboll, mos të flasim për sportet e tjera, por sidomos futbolli si një nga sportet më të popullarizuara ka luftu në vitin 2020 për mbetje në ligën e dytë. D.m.th për mbetje në ligën e dytë e jo për inkuadrim në ligën e parë apo Superliga siç njihet. Projektet e nënkalimeve që po proklamohen kaq shumë. Do doja të pyesja kryetarin që pse në përurimin e nënkalimit tek “Plus Marketi” nuk ishte i pranishëm ministri i Infrastrukturës kur dihet që ky projekt është financuar nga Ministria e Infrastrukturës e jo nga Komuna. A thua vallë ministri i ri nuk erdhi sepse e dinte që ky projekt ishte i realizuar me shumë mangësi procedurale, për dallim nga ish-minstri që vite e bënte reklama këtu, bashkë me ish-kryetarin e komunës ia bëjshi reklamat nënkalimit për të cilin ne kishim dhënë shumë vërejtje”, tha Balton Dërguti nga Lista “Guxo”.

Në këtë seancë u votuan edhe Propozim-Vendimet për shpalljen e interesit të përgjithshëm të pjesëve të nagastrave kadastrale në Ferizaj dhe Komogllavë. E, poashtu u votua edhe Propozim-Vendimi për dhënien në shfrytëzim afatgjatë të një parcele në Babush të Ri.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

1 day ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”

Ferizaj

Sekuestrohet një revole me municion dhe shurdhues në Ferizaj

Published

4 days ago

04 May, 2026

Redaksia

Një person është shoqëruar në stacionin policor në Ferizaj pas një kontrolli në shtëpinë e tij, ku janë gjetur dhe sekuestruar një pistoletë me gaz, pesë fishekë dhe një shurdhues i armës së zjarrit.

Në raportin 24 orësh të policisë bëhet e ditur se rasti ka ndodhur mëngjesin e së dielës, më 3 maj 2026, rreth orës 8:30 në rrugën “Gucia” në Ferizaj .

Me vendim të prokurorit pas intervistimit, rasti vazhdon të hetohet në procedurë të rregullt.

Ferizaj

Prokuroria e Ferizajt ndalon dy persona të dyshuar për keqpërdorim të detyrës zyrtare

Published

1 week ago

28 April, 2026

Redaksia

Prokuroria Themelore në Ferizaj ka njoftuar se me vendim të Prokurorit të Shtetit nga Departamenti i Krimeve të Rënda, janë ndaluar për 48 orë dy persona të dyshuar për përfshirje në vepra të ndryshme penale.

Sipas njoftimit zyrtar, njëri nga të ndaluarit është noter në komunën e Ferizajt, i dyshuar për veprën penale “Keqpërdorimi i pozitës apo autoritetit zyrtar”, e paraparë në nenin 414 të Kodit Penal të Republikës së Kosovës.

Derisa i ndaluari i dytë dyshohet për veprën penale “Blerja, pranimi ose fshehja e sendeve të përfituara me kryerjen e veprës penale”, sipas nenit 333 të Kodit Penal.

Ndalimi i tyre është rezultat i vazhdimit të hetimeve që ndërlidhen me një rast më të hershëm, gjatë të cilit Prokuroria Themelore në Ferizaj kishte ndaluar edhe tre, të dyshuar të tjerë për keqpërdorim të detyrës zyrtare.