Në komunën e Ferizaj gjatë 24 orëve të fundit u konfirmuan 138 raste të reja të infektimeve me Covid-19, që njëkohësisht është edhe numri më i lartë i rasteve të konfirmuara që prej 13 marsit të vitit 2020 e deri më sot.

Bazuar në statistikat e publikuara nga Ministria e Shëndetësisë, në rastet e fundit të ferizajasve të prekur me virus dominojnë moshat e reja, pasi 87 të infektuar janë të moshave prej 10 deri në 39 vjeç.

44 të infektuar të tjerë u përkasin moshave prej 40 deri 59 vjeç, kurse vetëm 7 të infektuar janë të moshave prej 60 vjeç e tutje.

Sipas gjinisë, 81 raste të reja janë femra kurse 57 janë meshkuj.

Në Ferizaj aktualisht janë 898 raste aktive, kurse sipas Shërbimit Spitalor Klinik dhe Universitar të Kosovës (SHSKUK) në spitalin e qytetit janë duke u trajtuar 18 pacientë me Covid-19.

Deri më sot, gjithsej 6011 ferizajas janë prekur nga ky virus.

Prej tyre, 4974 janë shëruar ndërkaq 139 qytetarë kanë vdekur nga pasojat e infektimit.

Të ngjashme

Të tjera