QKMF e Ferizajt ende pa udhëzues për Covid-19

Ka tre ditë që ka hyrë në fuqi udhërrëfyesi i ri klinik nga Ministria e Shëndetësisë për menaxhimin dhe trajtimin e Covid-19.

Sipas këtij udhëzuesi, personave pozitiv me koronavirus mund t’u përshkruhet antivirali “Favipiravir”,  në mënyrë ambulantore më së largu në 5 ditët e para të fillimit të sëmundjes.

Por kjo nuk po ndodhë në Ferizaj sepse ky udhëzues i ri nuk po zbatohet nga Qendra Kryesore e Mjekësisë Familjare.

Derisa nuk ishte prezente në zyrën e saj, Drejtoresha e kësaj qendre Nadire Imeri, përmes sms-it i ka konfirmuar Televizionit Tema se arsyeja e mosimplementimit të këtij udhërrëfyesi është sepse Ministria akoma nuk ua ka dorëzuar zyrtarisht.

“Përshëndetje, ju thashë se ende nuk kemi zyrtare për udhëzues të ri, nuk keni çka tjetër për të biseduar. Jam e zënë me obligime”, deklaroi në sms Imeri.

Nadire Imeri – Drejtoreshë e QKMF-së në Ferizaj

Për këtë arsye, TV Tema, udhëzuesin e ri të Ministrisë ia dorëzoi në formë fizike QKMF-së.

Këtë udhëzues megjithatë po e vë në zbatim Spitali i Përgjithshëm në Ferizaj, ku po trajtohen 78 pacientë për koronavirus e të gjithë po trajtohen sipas këtij udhëzuesi, thotë drejtori Halil Gërbeshi.

“Protokollet e Ministrisë së Shëndetësisë dhe SHSKUK-së, komisionit për protokolle, po respektohen. Të gjithë profesionistët shëndetësor, duke filluar nga drejtori shëndetësor, kryetari i komitetit për menaxhimin e pandemisë Covid-19, shefat e reparteve dhe gjithë profesionistët e angazhuar pranë pacientëve, të gjithë i posedojnë ato protokolle dhe janë duke u respektuar në mënyrë rigoroze. Deri tash furnizimi nga SHSKUK ka qenë i shkëlqyer dhe të gjitha rekomandimet nga lartë janë duke u respektuar nga e para deri tek e fundit”.

Halit Gërbeshi – Drejtor i Spitalit të Ferizajt

Se ky udhëzues duhet të respektohet nga të gjitha institucionet u konfirmua edhe nga Sekretari i Përgjithshëm i Ministrisë së Shëndetësisë, Naim Bardiqi.

“Të gjitha institucionet e përfshira në udhërrëfyesin (udhëzuesin) orientohen për zbatim! Grupi punues për hartimin e protokolleve të niveleve të kujdesit shëndetësor saktëson trajtimin e pacientëve. Natyrisht se deri në përfundimin e protokolleve udhërrëfyesi i aprovuar nga Ministri i shëndetësisë duhet zbatuar!”, u përgjigj Bardiqi për TV Tema përmes email-it.

Naim Bardiqi – Sekretar i Përgjithshëm i Ministrisë së Shëndetësisë

Teksa në Ferizaj janë afër dy mijë raste aktive me Covid-19  dhe është komuna e dytë me më së shumti raste aktive, mbetet e paqartë se për çfarë arsye, QKMF e Ferizajt nuk  ka filluar ende ta zbatoj udhëzuesin e ri.