Gjatë pasdites së sotme në fshatin Lloshkobare vdiq Remzije Azemi, në pritje të emergjencës së Ferizajt, e cila nuk i erdhi në ndihmë, edhe pas 4 orësh dhe thirrjeve të njëpasnjëshme nga familjarët e saj. Vetëm disa orë pas vdekjes së gruas së vet, bashkëshorti  Shemsi Azemi, e pa si zgjidhje të vetme që rastin ta bëjë të ditur në zyret e TV TEMA:

Qe dy muaj e kam ruajt non-stop (gruan), natë e ditë me oksigjen. Me ia largu oksigjenin, menjëherë iu ndalke frymëmarrja. E pashë se iu keqësua gjendja edhe e kemi thirr emergjencën. Djalit i kanë thënë se është në Lubovc, Tërrn edhe nuk erdh hiç. Në 10:30 e ka lajmëru djali ndërsa në 14:30 ka vdekë gruaja kurrkush s’ka ardh. Pasi vdiq, na thanë se duhet me e konfirmu se ka vdekë, e ka thirrë djali ka ardhë një Dr. Shumolli, i kryti formalitetet për konfirmimin e vdekjes. Emergjenca nuk ka ardhë me kohë.

Shemsi Azemi – Bashkëshorti i së ndjerës

     Shemsi Azemi nga Lloshkobarja kishte kërkuar llogari edhe tek dyert e emergjencës mirëpo drejtori i shërbimit emergjent Muhabi Ademi tashmë kishte përfunduar orarin e punës. TV TEMA përmes telefonit kontaktoi me Dr. Ademin, dhe ai e konfirmoi se ka dëgjuar për rastin por se nuk dinte më shumë detaje. Ngjashëm u përgjigj edhe drejtoresha e QKMF të Ferizaj, Nadire Ymeri e cila nuk kishte informata se pse ka ndodhur ky mosreagim i shërbimit emergjent.

     Në fund të deklaratës së tij, Shemsi Azemi tha se do të kërkojë llogari për papërgjegjësinë e emergjencës së Ferizajt

Emergjencën du me e paditë, gruaja m’ka shku, ndoshta edhe ka pas me vdekë ama me vdekë me frymëmarrje, me lehtësim…

Shemsi Azemi – Bashkëshorti i së ndjerës

    Emergjenca e Ferizajt funksionon në kuadër të Qendrës Kryesore të Mjekësisë Familjare me zyre dhe autoambulanca në kuadër të këtij objekti shëndetësor, që gjenden vetëm 4.2 kilometra larg fshatit Lloshkobare, ku ka pasur shtëpinë pacientja në nevojë, tashmë e ndjerë.

Të ngjashme

Të tjera