Ferizaj
Mbahet koncerti i parë recital i pianistes Arlinda Rexhepi
Koncerti i parë recital është ai që mbetet gjithmonë në kujtesën e muzikantëve.
Këtë kujtim, nga e hëna në mbrëmje e ka edhe Arlinda Rexhepi, nxënëse e pianos në shkollën e mesme të muzikës “Çesk Zadeja”.
17 vjeçarja që tashmë i ka kushtuar një dekadë pianos, performoi vepra të kompozitorëve klasik si: Johann Sebastian Bach, Moritz Moszkowski, Wolfgang Amadeus Mozart e Frédéric Chopin.
Rexhepi thotë se gjatë koncertit të parë të saj recital që u mbajt në Galerinë e Arteve, kishte ndjenja të përziera.
“Për këtë koncert recital, jam duke punu që gjashtë muaj intensivisht, më së shumti me profesoreshën time Shkurte Vranovcin, por kam mbajt edhe Master Class me profesor të ndryshëm nga bota, si nga Amerika, Turqia e Shqipëria. Një gjashtë mujorsh i gjatë e i lodhshëm por që ia ka vlejtë në fund.” thotë Arlinda Rexhepi – Pianiste
Profesoresha Shkurte Vranovci thotë Arlinda ka punuar që nga shkolla fillore për të arritur këtë nivel.
Ajo thekson po ashtu se shkolla e muzikës ka kapacitete për të nxjerrë muzicientë cilësor por që po kanë telashe me infrastrukturën shkollore si mungesa e klasave, instrumenteve muzikore por mungon edhe salla koncertale që të realizohen koncertet.
“Për me e arrit një nxënës nivelin për me e ba një koncert recital duhet një punë e madhe, është një rrugëtim i gjatë që bëhet dalë nga dalë. Nxënësja që tash ka interpretua në këtë koncert recital, mirret prej moshës shtatë vjeçare me piano. Ka ardhë një herë në shkollën e ulët të muzikës dhe pastaj kur ka ardhë në shkollë të mesme ka kalu automoatikisht në instrumental në piano dhe sidomos 3 ose 4 vitet e fundit jemi marrë me gjana ma detajisht.” deklaroi Shkurte Vranovci – Profesoreshë e pianos
Koncerti recital përfundoi me një serenadë të kompozitorit Franz Schubert që u performua si duet mes Arlinda Rexhepit dhe Roza Sadikut.
