Kosovë

Çitaku e PDK-së kritikon Qeverinë: Nuk guxojmë të bëjmë veprime pa i menduar mirë

Published

2 years ago

01 August, 2022

Nënkryetarja e Partisë Demokratike të Kosovës, Vlora Çitaku, e ka quajtur situatën e krijuar së fundmi në veri të vendit, dështim në realizim të vendimeve të Qeverisë që po krijon përshtypje se veriu është i pamenaxhueshëm dhe situata në këtë pjesë është jashtë kontrollit të shtetit.

Në një konferencë të mbajtur të hënën, Çitaku ka thënë se veprimet e Qeverisë do të duhej të ishin paraprakisht të koordinuara me miqtë ndërkombëtarë dhe jo “të ftohen dhe të dëgjohen në momentet e fundit të krizës”.

Ajo më tej ka shtuar se është e paqartë kjo situatë, derisa ka kërkuar nga Qeveria të shpjegojë se cili është vendimi i ri.

“Është shqetësues konfuzioni i krijuar në publik në lidhje me situatën në veri. Është e rëndësishme që Qeveria të shpjegojë qartë se cili është vendimi i ri dhe cila është situata, a është shtyrë vendimi për zbatimin e reciprocitetit apo jo. Presim nga Qeveria që të tregojë seriozitet, të sillet përgjegjshëm. Situata si ajo e mbrëmshme nuk guxojnë të përsëriten në shtator kur të fillojë zbatimi i reciprocitetit të pjesshëm me Serbinë”, ka thënë Çitaku.

Sipas saj, situata e 31 korrikut ka dëshmuar mos seriozitet të Qeverisë, aksion të papërgatitur, të paplanifikuar dhe të pakoordinuar me aleatët ndërkombëtarë.

“Ne nuk guxojmë të bëjmë veprime të tilla pa i menduar mirë”, ka thënë ajo./koha

Kosovë

Arratiset Enver Sekiraqa

Published

1 day ago

18 May, 2024

Redaksia

Policia e Kosovës ka njoftuar se Enver Sekiraqa është arratisur pasi nuk është gjetur në shtëpi gjatë të premtes dhe të shtunës. Ai duhej të kthehej në paraburgim pasi dy ditë më parë, Gjykata e Apelit vendosi për ndryshimin e masës së sigurisë ndaj tij.

Bazuar në aktvendimin e pranuar nga Gjykata e Apelit dhe mos gjetjes së Sekiraqës, policia ka ndërmarrë masat e nevojshme për informim dhe ndalim të tij, në të gjitha vendkalimet kufitare dhe drejtoritë rajonale policore.

Njoftimi i policisë:

“Policia e Kosovës, bazuar në aktvendimin e pranuar të Gjykatës së Apelit, të datës 17.05.2024, për ndryshim të masës së sigurisë së të pandehurit Enver Sekiraqa, sipas procedurave dhe mandatit të saj ligjor i ka dërguar ftesën të njëjtit, mirëpo i njëjti nuk është hasur në vendbanimin e tij në rrugën ‘Vëllezërit Fazliu’ Prishtinë.

Meqë i njëjti nuk është hasur në shtëpi, Policia e Kosovës, përmes zyrtarëve kompetent, ka njoftuar organet e drejtësisë se ftesa zyrtare i është dërguar të pandehurit Sekiraqa, mirëpo i njëjti nuk është hasur në shtëpi. Po ashtu sot me datën 18.05.2024, për të zbatuar aktvendimin e Gjykatës së Apelit, ku i dyshuari duhet të dërgohet në paraburgim, zyrtarët policorë e kanë kërkuar të njëjtin, por nuk e kanë hasur në shtëpi.

Veprimet e mëtejme policore, do të bazohen në procedurat e parapara ligjore, aktvendimin dhe rekomandimet e organeve të drejtësisë. Njëkohësisht Policia e Kosovës ka ndërmarrë masat e nevojshme për informim dhe ndalim në të gjitha vendkalimet kufitare dhe drejtoritë rajonale policore, ndaj të pandehurit”.

Kosovë

Deri më 24 maj regjistrimi i popullatës mund të kryhet vetëm nga stafi i ASK-së

Published

1 day ago

18 May, 2024

Redaksia

Agjencia e Statistikave së Kosovës ka njoftuar se regjistrimi i popullsisë është shtyrë deri më 24 maj 2024. Në njoftim bëhet e ditur se shtyrja e afatit u mundësua pas miratimit në Qeveri të propozimit nga ASK-ja bazuar në kërkesën e disa komunave .

“Meqenëse Regjistrimi i Popullsisë në terren, sipas Vendimin të Qeverisë të datës 21 nëntor 2023 ishte deri më 17 Maj 2024, bazuar në kërkesat e disa komunave dhe duke u bazuar në sistemin monitorues që ka ngritur Agjencia e Statistikave të Kosovës (ASK) për ta monitoruar ecurinë e procesit, vlerësuam se mund të ketë individë, ekonomi familjare ose edhe ata që kanë refuzuar (për momentin) dhe kërkuam nga Qeveria një shtyrje të afatit të Regjistrimit të Popullsisë (ReKos2024) deri më 24 Maj 2024 që është aprovuar nga ana e Qeverisë”, thuhet në njoftimin e ASK-së.

ASK thotë se gjatë kësaj periudhe, regjistrimi do të bëhet në çdo zonë regjistruese (fshat e komunë) të Kosovës dhe do të zhvillohen vetëm nga stafi i Agjencisë së Statistikave të Kosovës.

Po ashtu ASK bën thirrje për qytetarët që nuk janë regjistruar të kërkojnë të regjistrohen, duke inkurajuar ata që t’i kontaktojnë zyrtarët e Agjencisë së Statistikave të Kosovës.