Ushtruesi i Detyrës së kryetarit të OVL-UÇK, Faton Klinaku ka shpërndarë letrat e komunikimit të tij me Kryeministrin Altin Kurti rreth çështjes së veteranëve.

Nga dy letrat kuptohet se Kryeministri Kurti ka kërkuar nga Klinaku bashkëpunim në hartimin e një ligji të ri për vlerësimin dhe verifikimin e pjesëmarrësve në luftë, transmeton TV TEMA.

Mirëpo nga veteranët kjo kërkesë e Kurtit u konsiderua si ndërhyrje në proces gjyqësor.

“Organizatat e dala nga lufta e UÇK-së nuk kanë qenë dhe nuk janë kompetente për vlerësim e verifikim, por janë të hapura për bashkëpunim….Neve na intereson që veteranët e luftës së UÇK-së të trajtohen dinjitetshëm, dhe do të ishte mirë që të hiqet neni që ua ndalon punësimin atyre”, thuhet ndër të tjera në letrën e OVL-UÇK-së, dërguar Kurtit.

Me gjithë atë, në letrën e Klinakut drejtuar Kurtit, ai thotë se nuk janë kundër këtij ligji të propozuar nga i pari i Qeverisë, vetëm se një herë sipas tij duhet të plotësohen disa kushte:

“Duhet që aplikacionet apo dosjet e kategorive të luftës së UÇK-së të merren nga Prokuroria, sepse aty janë të dhënat e plota për secilin, dhe vetëm në bazë të tyre bëhet kjo.

Duhet që nga Gjykata të shpallet procesi i vlerësimit e verifikimit i pavlefshëm, ose të kthehet në pikën zero.

Duhet që të krijohet komision i ri qeveritar, i cili me komandatët apo zingjirin komandues të UÇK-së, si dhe përgjegjësit e të gjitha njësive do ta bënte këtë vlerësim dhe verifikim, por pse jo edhe nëse është e nevojshme të bëhet proces i ri aplikimi”.

Propozimet e kryeministrit ishin këto:

“Të fillojmë menjëherë bashkërisht hartimin e një ligji të ri, i cili nis një proces vlerësimi e verifikimi për të gjithë pjesëmarrësit e luftës çlirimtare, me këtë ligj do të siguronim nxjerrjen e një liste të saktë të të gjithë atyre që kanë kontribuar në luftën çlirimtare.

Hartimi i ligjit dhe procesi i verifikimit të kryhet në një kohë sa më shpejtë.

Ndërkohë derisa të përfundojë procesi i ri, si mbështetje shtesë mund të ofrojmë përkrahje në punësimin e veteranëve përmes masave aktive të tregut të punës, duke subvencionuar një pjesë të pagës për një periudhë të caktuar”.

Letra e Kryeministrit Kurti drejtuar OVL-UÇK dhe ajo e OVL-UÇK drejtuar Kryeministrit Kurti: