Kosovë

Infermierët shprehen të pakënaqur me ligjin e ri për pagat

Published

4 years ago

27 August, 2022

Sindikata e Infermierëve, Mamive dhe Profesionistëve të tjerë, janë shprehur të pakënaqur me koeficientin 5.6 në Projektligjin e ri të pagave, i cili tashmë është në konsultim paraprak. Nga kjo sindikatë deklarojnë se nëse kërkesat e tyre nuk merren parasysh, atëherë do ta dërgojnë këtë projektligj në Gjykatën Kushtetuese.

Kërkesa e tyre e kamotshme që të gradohen njëjtë sikurse fizioterapeutët dhe logopedët, vazhdon të jetë ende kyçe karshi këtij ligji.

Kryetari i Sindikatës së infermierëve, mamive dhe profesionistëve të tjerë, Përparim Berisha thotë se pritshmëritë karshi ligjit të ri të pagave nuk janë të mira.

Ndonëse shprehet se ka përmirësim krahasuar me ligjin e kaluar, Berisha për KosovaPress, thotë se kërkesat e tyre do t’i adresojnë në Federatën e Sindikatave të Shëndetësisë brenda 10 ditëve.

“Pritshmëritë tona thuajse nuk janë të mira, ashtu siç kemi shpresuar, jemi të graduar me koeficient pak më mirë dhe me shumë të hollave, pak më mirë sesa me ligjin e kaluar. Mirëpo, dallimi është prapë në mes të infermierëve dhe fizeoteraputëve dhe logopedëve, ku ata janë graduar me koeficientë 6, kurse infermierët me koeficientë 5.6.

Infermierët janë ndarë në tri grupe në shërbimin parësor, dytësor dhe tretësor, kurse tek mjekët nuk e kemi një ndarje të tillë…

Ata kanë kërkuar që me çdo kusht të jenë baras me logopedët, fizioterapeutët me koeficinet 6 për shkak se sipas infermierëve, edhe ata i kanë 180 pikë akredituese shkollimi Bachelor, njëjt sikur fizioterapeutët dhe logopedët…

Dallimi është diku rreth 50 euro…Kjo ka shfaq pakënaqësi jo për shkak të ndoshta mjeteve monetare, por për shkak të gradimit, punës të infermierëve që sipas tyre është shumë më e rëndë se e fizioterapeutëve dhe logopedëve. E keni parë edhe në pandemi rolin kryesor e kanë pas infermierët dhe shërbimin ndaj të sëmurëve”, tha Berisha.

Ai paralajmëron se nëse kërkesat e tyre nuk adresohen me kohë atëherë edhe ky ligj do të përfundojë në Gjykatën Kushtetuese, sikurse ai i kaluari.

“Herën e kaluar kemi qenë shumë keq dhe për këtë arsye patëm dërguar në Gjykatën Kushtetuese përmes Avokatit të Popullit, shpresoj që këtë herë kërkesat tona nuk do të hasin në vesh të shurdhër dhe do të merren parasysh dhe do të rregullohen qysh tash pa shkuar ende në lexim të parë që mandej të mos ketë veprime të tjera sindikale si protesta apo dërgimi në Gjykatën Kushtetuese dhe të kthehet prapë gjithçka në pikën zero.

Ne jemi që ky ligj të vazhdoj të procedohet, por gjithmonë duke i marr parasysh kërkesat tona…Nëse nuk do të merren parasysh ne prapë do ta dërgojmë ligjin në Gjykatën Kushtetuese gjithmonë në rast se ka kërkesa prej infermierëve, mjekëve dhe shërbimeve tjera mbështetëse”, theksoi kryetari i Sindikatës së Infermierëve.

Sistemi shëndetësor në Kosovë vazhdon të ballafaqohet me mungesë të infermierëve dhe ikje të profesionistëve shëndetësor nga vendi.

Berisha thotë se vetëm deri në fillimit të korrikut të këtij viti nga Kosova kanë ikur 400 infermierë.

Ai shtoi se si pasojë e ikjes së infermierëve, ka edhe reduktim të shërbimeve shëndetësore.

“Unë i bëjë thirrje prej këtu Ministrisë së Shëndetësisë, por edhe Ministrisë së Financave edhe kryeministrit që urgjentisht të shpall konkurs që të pranohen të paktën për këtë vit rreth 1 mijë infermierë që të mos ngarkohen infermierët me mbipunë dhe po ashtu të ketë edhe shërbime sa më cilësore për pacientët”, u shpreh Berisha.

Në mesin e këtij muaji, Ministria e Punëve të Brendshme ka proceduar për konsultime paraprake Projektligjin për pagat dhe projektligji për zyrtarët publikë. /kp/

Kosovë

Mbrojta paralajmëron apelim të vendimit dënues ndaj ish-krerëve të UÇK-së

Published

27 mins ago

16 September, 2026

Redaksia

Avokatët mbrojtës të ish-drejtuesve të UÇK-së kanë paralajmëruar se do të apelojnë menjëherë vendimin e Dhomave të Specializuara të Kosovës në Hagë.

Ata u shprehën thellësisht të befasuar dhe të indinjuar me dënimet e dhëna, pasi sipas tyre, trupi gjykues nuk i morri parasysh të dhënat, faktet dhe dëshmitarët e ekipeve mbrojtëse.

Avokati i Hashim Thaçit, Pierre-Richard Prosper, e ka cilësuar aktgjykimin ndaj klientit të tij si një “tallje me drejtësinë” dhe ka paralajmëruar se mbrojtja do ta apelojë vendimin.

Prosper pretendoi se rezultati i procesit ishte i paracaktuar dhe akuzoi Dhomat e Specializuara se po “rishkruajnë historinë”, duke e paraqitur UÇK-në si një strukturë të organizuar dhe duke ia atribuar, sipas tij, përgjegjësinë Thaçit.

“Kjo është një ditë e errët për drejtësinë ndërkombëtare dhe fundi i tribunaleve”, tha Prosper pas shpalljes së aktgjykimit duke bërë thirrje që Kuvendi i Kosovës ta shqyrtojë raportin me Dhomat e Specializuara, duke thënë se Kosova duhet të marrë “një vendim sovran që është në interesin më të mirë të vendit”.

Dënimet e shqiptuara sot nga specialja me të madhe u kundërshtuan nga qytetarët e Kosovës, përfaqësuesit ligjor të të akuzuarve, krerët e institucioneve dhe të partive politike, duke e vlerësuar vendimin dënues si goditje të rëndë për Kosovën dhe luftën e saj çlirimtare.

Kosovë

Policia paralajmëron qytetarët për qarkullimin e mesazheve të rrejshme

Published

22 hours ago

15 September, 2026

Redaksia

Policia e Kosovës njofton qytetarët se janë duke qarkulluar mesazhe mashtruese dhe dokumente të falsifikuara, të cilat në mënyrë të paautorizuar përdorin emrin, logot, vulat dhe nënshkrimin fals të institucioneve të Kosovës.

Një mesazh i tillë i rremë, kinse për konfiskim të pajisjeve kompjuterike dhe hetim lidhur me krimet për pornografi të fëmijëve me kërkesë për paraqitje para organeve të drejtësisë është hasur në qarkullim nga zyrtarët e policisë.

Policia e Kosovës sqaron se dokumenti i publikuar nuk është njoftim zyrtar i Policisë së Kosovës dhe qytetarët nuk duhet t’iu përgjigjen kërkesave të tilla.

“Ftojmë qytetarët që të mos ndajnë të dhëna personale, të mos dërgojnë dokumente apo informacione përmes adresave të dyshimta dhe të mos ndërmarrin veprime bazuar në mesazhe të tilla.

Policia e Kosovës është duke ndërmarrë veprimet e nevojshme për trajtimin e rastit dhe identifikimin e personave përgjegjës. Për çdo informacion zyrtar, qytetarët duhet t’iu referohen vetëm kanaleve zyrtare të institucioneve”, thuhet mes tjerash në njoftimin e Policisë së Kosovës.

Kosovë

Ndërroi jetë humanistja Flora Brovina

Published

1 day ago

15 September, 2026

Redaksia

Ka ndërruar jetë në moshën 76-vjeçare humanistja Flora Brovina.

E ndjera ishte aktiviste për të drejtat e njeriut, kryetare e Lidhjes së Shkrimtarëve të Kosovës, ish e burgosur politike, veterane e luftës së UÇK-së, deputete e Kuvendit të Kosovës në radhët e Partisë Demokratike si dhe ishte nënshkruese e Deklaratës së Pavarësisë së Kosovës.

Flora Brovina u lind më 30 shtator 1949 në Skenderaj derisa shkollimin e kreu në Prishtinë. Studimet për mjekësi i kreu në Beograd dhe Prishtinë ndërsa specializimin për pediatri e kreu në Zagreb.

Pas kthimit në Kosovë, ajo punoi si gazetare për gazetën “Rilindja”, përpara se të shërbente për shumë vite në Repartin e Pediatrisë në Spitalin e Përgjithshëm të Prishtinës.

Në vitin 1992 ajo themeloi Lidhjen e Grave Shqiptare të Kosovës.

Si aktiviste, më 20 prill 1999, Brovina Brovina u rrëmbye me forcë nga shtëpia e saj prej policisë civile serbe. Në dhjetor të po këtij viti, u transferua në një burg në Serbi dhe më pas u dënua me 12 vjet burg, por pas presionit ndërkombëtar u lirua në nëntor të vitit 2000.

Përveç mjekësisë dhe politikës, Flora Brovina ishte një poete e njohur dhe anëtare e komunitetit letrar. Poezia e saj shquhet për ndjeshmërinë lirike dhe temat e lidhura me fatin e gruas, amësinë, lirinë dhe vuajtjet e luftës. Veprat e saj “Verma emrin tim” (1973), “Bimë e zë” (1979) dhe “Mat e çmat” (1995), janë përkthyer në disa gjuhë të huaja, përfshirë botimet në anglisht, frëngjisht, italisht dhe spanjisht.

Për qëndresën dhe guximin e saj, asaj iu nda çmimi prestigjioz për lirinë e të shkruarit nga PEN/Barbara Goldsmith Freedom to Write Award në vitin 2000.

Flora Brovina ka shërbyer si deputete e Kuvendit të Kosovës për gjashtë mandate ndërmjet viteve 2001 dhe 2019.