Kosovë

Vuçiqi i quan gënjeshtarë QUINT-in, BE-në dhe Kosovën

Published

4 years ago

27 October, 2022

Presidenti i Serbisë, Aleksandar Vuçiq, ka thënë se Serbia vazhdimisht po kërkon targa KS me status neutral, porse kjo po refuzohet.

Vuçiqi thotë se u ka bërë me dije përfaqësuesve të vendeve të QUINT-it se është gënjeshtër që Kosova ka të drejtë për veprimet e saja në lidhje me riregjistrimin.

“Ajo që po flet QUINT-i, BE-ja dhe Prishtina nuk ekziston askund. Ata shpikën legjitimitetin. Për këtë nuk mora përgjigje”, ka thënë Vuçiq, pas takimit të Këshillit të Sigurisë Kombëtare. “Para disa ditëve mora një demarsh nga përfaqësuesit e vendeve të QUINT-it dhe të BE-së. Në atë akt, në pikën dy thuhet se veprimi i Kosovës është legjitim, por problemi është në kohën dhe metodat. Ata nuk kanë të drejtë të bëjnë këtë, sipas asnjë marrëveshjeje. Ata shpikën gjithçka. U thash se po mashtronin publikun, ua theksova dhe nuk u interesuan. Ata mund të jenë arrogantë”.

Vuçiq ka thënë se” mesazhi për serbët në Kosovë e M. është se ne nuk jemi me ta për të qenë kur është e lehtë dhe për të vënë parulla nëpër lokale, por edhe kur është e vështirë”.

Presidenti serb ka thënë se ka dëgjuar kërkesat e përfaqësuesve serbë të Kosovës.

“Ata na informuan për nevojat dhe gjithçka me çfarë po përballen, veçanërisht para skadimit të ultimatumit të dhënë nga regjimi i Prishtinës për ata në veri të Kosovës, që i referohet konfiskimit të automobilave me targa të lëshuara në Serbi, të ashtuquajtura targa KM, prej të cilave janë rreth 9 mijë”, tha Vuçiq.

Ai ka thënë se vetëm 18 persona i kanë riregjistruar veturat, prej tyre tre nga veriu i Kosovës.

Vuçiq ka thënë se “serbët në Kosovë do t’i rezistojnë paqësisht autoriteteve të Prishtinës”.

“Sigurisht se do të hasin në rezistencën demokratike të popullatës serbe. Nuk do të ketë përsëritje të vitit 2004, as veprime të tilla të ngjashme kundër popullit serb”.

Vuçiq ka thënë se iniciativa nga ndërkombëtaret për të shtyrë afatin e riregjistrimit të veturave për 10 muaj synon ta tregojë “palën prishtinase si të mirë”.

Ai thekson se Beogradi insiston gjatë gjithë kohës për targa KS – të statusit neutral, të cilat janë hequr.

Vuçiq ka thënë se thelbi i çështjes së targave është në marrëveshjen e vitit 2011 dhe gjithkund thuhet se bëhet fjala për targa KS, të cilat, siç theksoi ai, janë status neutral, porse Prishtina po e mohon tash.

“Gjatë gjithë kohës insistojmë në këtë, ne themi targa KS, ata thonë se nuk ka më targa KS sepse i kanë hequr”, tregon Vuçiq.

Afati për riregjistrimin e targave nga ato ilegale të lëshuara nga Serbia me akronime të qyteteve të Kosovës për në ato legale RKS përfundon më 31 tetor.

Kryeministri i Kosovës, Albin Kurti, ka thënë se nuk do të ketë shtyrje të afatit.

Vuçiq thotë se kjo po kërcënon paqen e stabilitetin.

“Kërcënimet nga Prishtina se do të vazhdojnë me zbatimin e një aksioni që duhet të tregojë qëndrueshmërinë dhe forcën e tyre dhe të kërcënojnë plotësisht stabilitetin, paqen dhe mbijetesën e popullit tonë në Kosovë e M.”, tha Vuçiq. “Plani i tyre është që të lënë të dalin me targa, por të mos i lejojnë të kthehen në territorin e Kosovës e M. me targa të njëjta. Shteti i Serbisë nuk do të lejojë as pogrom e as vrasje të popullit të vetë”.

Presidenti i Serbisë, Aleksandar Vuçiq, ka thënë se pret që javën e ardhshme Kosova të futet në procedurë për pranimin në Këshillin e Evropës.

“Ajo procedurë mund të zgjasë deri një vit. E keni të qartë se cili do të jetë rezultati”, tha Vuçiq, raporton “B92”. “Është mesazh i qartë se e drejta ndërkombëtare nuk u intereson. Pastaj do të thonë se ti Vuçiqi i vogël, do të bëhesh autokrat dhe pastaj do të fillojnë të bëjnë disa veprime kundër Qeverisë së Serbisë. Ne nuk na kanë dhënë asnjë mundësi, të bëjmë ndonjë gjë. Vendet e QUINT-it gjithmonë do t’i japin mundësi Prishtinës, e kurrë nuk do të marrin ndonjë vendim që do të ishte në favor të serbëve dhe Serbisë”./koha

Kosovë

Ish-ministri Endrit Shala dënohet me dy vjet burgim për konflikt interesi

Published

1 day ago

15 June, 2026

Redaksia

Gjykata Themelore në Prishtinë e ka dënuar ish-ministrin Endrit Shala me dy vjet burg për konflikt interesi.

Shala akuzohej se derisa ishte ministër i Tregtisë dhe Industrisë nga Nisma në qeverinë e PAN-it, i kishte bërë favor baxhanakut të tij, Valdet Teneqja, duke i mundësuar kompanisë së tij N.SH. “Euro Inspekt” përfitim të kundërligjshëm të mbi 730 mijë eurove, në rastin kur kjo kompani ishte emëruar si trup inspektues për vlerësimin e konformitetit të karburanteve të naftës në Kosovë.

Fillimisht, Shala ishte akuzuar për keqpërdorim të detyrës zyrtare, por trupi gjykues i kryesuar nga Violeta Namani, tha se nuk ka gjetur prova për veprën penale keqpërdorim i detyrës zyrtare, por për konflikt interesi.

“Ka nënshkruar, përkatësisht miratuar Vendimin për emërim 01. Ref. Nr.36, më 30.05.2019, me të cilin Operatori Ekonomik (OE), me emrin tregtar: N.SH. ‘Euro Inspekt’ dhe emrin e biznesit: Valdet S. Teneqja është emëruar si trupë inspektuese për vlerësimin e konformitetit të karburanteve të lëngëta të naftës në Kosovë, me të cilin veprim i ka mundësuar atij dhe biznesit në pronësi të tij realizim të interesit financiar, përkatësisht të dobisë pasurore. Si rrjedhojë e këtij Vendimi të kundërligjshëm, në lartësi 732,642.28 euro.” – thuhet në dosjen e Prokurorisë për aktakuzën ndaj Endrit Shalës.

Kosovë

Pagesa 100€ për punëtorët privat ekzekutohen të hënën

Published

4 days ago

12 June, 2026

Redaksia

Ministri në detyrë i financave, Hekuran Murati ka njoftuar se pagesa prej 100 € për punëtorët e sektorit privat do të ekzekutohen të hënën, kurse pagesa për studentët që kanë aplikuar, do të ekzekutohen sapo të pranohen konfirmimet përkatëse nga institucionet e arsimit të lartë.

Përmes një postimi në facebook, Murati bëri të ditur se “që në fillim të kësaj jave, komisionet vlerësuese kanë filluar punën për shqyrtimin e aplikimeve për dy masat e mbetura nga Pakoja për Përballje me Inflacion 2.0, konkretisht mbështetjen për punëtorët e sektorit privat dhe studentët.

Puna e komisionit për masën e sektorit privat është drejt përfundimit, dhe ekzekutimi i pagesave pritet të bëhet në fillim të javës që vjen, pra të hënën.

Kurse komisioni për masën e studentëve do ta përfundojë punën sapo të ketë marrë konfirmimet përkatëse nga institucionet e arsimit të lartë, për studentët që kanë aplikuar. Edhe për këtë do t’ju njoftojmë me kohë sapo listat për pagesa të jenë gati për ekzekutim”, ka shkruar Murati në Facebook.

Kosovë

Gjykata Supreme shfuqizon pjesërisht udhëzimin për xhamat e errët

Published

5 days ago

11 June, 2026

Redaksia

Gjykata Supreme e Kosovës ka shfuqizuar pjesërisht dispozitat e Udhëzimit Administrativ të Ministrisë së Punëve të Brendshme që rregullon përdorimin e xhamave të errët në automjete, duke konstatuar se disa nga kufizimet e vendosura nuk kishin bazë ligjore.

Gjykata ka aprovuar pjesërisht padinë e iniciuar nga Organizata Joqeveritare “Marakli t’Kerreve” dhe Instituti “Tri Pika – Sport, Sociale, Ekonomi”, të cilët kishin kërkuar shqyrtimin e ligjshmërisë së nenit 7 të Udhëzimit Administrativ (MPB) Nr. 12/2024, që kishte të bënte me ndalimin e vendosjes së materialeve të errësuara apo xhamat e errësuar në automjete.

Në aktgjykim shpallen të paligjshëm dhe shfuqizohet paragrafi 1, 3 dhe 4 i nenit 7 të këtij udhëzimi administrativ.

Paragrafi 1 lejonte xhamat e errët vetëm për automjetet që i kishin të instaluara nga prodhuesi, ndërsa paragrafi 3 ndalonte në mënyrë të përgjithshme vendosjen e folieve errësuese në xhamat e automjeteve.

Gjithashtu është shfuqizuar edhe paragrafi 4 i këtij neni, i cili i jepte Ministrit të Punëve të Brendshme kompetencën për të lejuar përjashtime nga ndalimi.

Gjykata ka lënë në fuqi vetëm paragrafin 2 të nenit 7, pasi ai ka karakter teknik dhe administrativ, duke rregulluar vetëm evidentimin e xhamave të errët në dokumentacionin e regjistrimit të automjetit, pa vendosur kufizime që bien ndesh me ligjin.

Në arsyetim të aktgjykimit, Gjykata vlerësoi se dispozitat e shfuqizuara krijonin kufizime të reja që nuk burojnë nga ligji, duke theksuar e organet administrative mund të nxjerrin akte nënligjore vetëm për të zbatuar dhe konkretizuar ligjin, por jo për të krijuar kufizime të reja që nuk mbështeten në autorizim të qartë ligjor.