Kryeprokurori i Prokurorisë Themelore në Prishtinë, Zejnullah Gashi, deklaroi se alarmi për bombë në Kuvend ishte i rrejshëm.

Sipas Gashit, personi i dyshuar për këtë kërcënim besohet se mund të ketë qenë nga një shtet jo mik, bazuar në theksin e të dyshuarit gjatë telefonatës që ka zhvilluar.

“Ka rezultuar që kërcënimi ka qenë i rrejshëm dhe deri tani nuk ka diçka që ia vlen të ceket sa i përket rezultateve nga vendi i ngjarjes. Do të vazhdojmë sa i përket prejardhjes së thirrjes telefonike të bërë nga një person anonim i cili ka qenë me zë mashkulli, me gjuhën angleze, me theks që mendojmë se është të shteteve jo-mike”, ka thënë kryeprokurori Zejnullahu.  

Ndërkohë është konfirmuar se  seanca konstituive do të vazhdojë nga ora 20:00

Policia e Kosovës ka njoftuar se vendimi për evakuimin e Kuvendit u morr pas pranimit të SMS-it për kërcënim me bombë.

“Sot, me datë 05.07.2025 në orët e paradites, është pranuar një informatë (me sms), për një kërcënim me mjet shpërthyes në objektin shtetëror të RKS-së. Me të pranuar informatën, janë angazhuar njësitë kompetente policore, të cilat fillimisht kanë bërë perimetrin e sigurisë dhe kanë evakuuar personat nga objektet. Policia e Kosovës ka njoftuar prokurorinë kompetente dhe hetuesit policorë të cilët së bashku me njësitë dhe ekspertët përkatës për deminim, janë duke marrë veprimet e duhura të kontrollit në objekt”, thuhet në njoftimin e Policisë.  

Vazhdimi  i 42-të i seancës konstituive i paraparë për orën 11:00, është shtyrë për në ora 20:00, njoftoi sekretari i Përgjithshëm i Kuvendit të Kosovës, Arben Loshi.

Ndërtesa e Kuvendit të Kosovës ku pritej të mbahej vazhdimi  i 42-të i seancës konstituive është evakuuar për shkaqe sigurie.

Radiotelevizioni i Kosovës ka raportuar se bëhet fjalë për kërcënim me bombë.

Policia për shkak të masave të sigurisë, ka thënë se duhet të evakuohen deputetët dhe i gjithë stafi i Kuvendit dhe i zyrës së Presidencës.