Kosovë

Kosova kërkon që Serbia t’i dorëzojë të akuzuarit për Banjskën në dyvjetorin e vrasjes së Bunjakut

Published

2 months ago

24 September, 2025

Udhëheqësit e Kosovës i kanë kërkuar bashkësisë ndërkombëtare t’i bëjë trysni Serbisë për ta dorëzuar të dyshuarin kryesor Millan Radoiçiqin dhe të akuzuarit e tjerë për sulmin e armatosur në veri të vendit, në dyvjetorin e vrasjes së rreshterit policor Afrim Bunjaku.

Bunjaku u vra më 24 shtator 2023 gjatë një sulmi që një grup serbësh të armatosur e kryen kundër Policisë së Kosovës në fshatin Banjskë të Zveçanit.

Dy vjet pas sulmit, njeriu që e mori përgjegjësinë për organizimin e tij, Millan Radoiçiq, është ende i lirë dhe me vendbanim të regjistruar në Beograd.

Kryeministri në detyrë i Kosovës, Albin Kurti, pasi bëri homazhe të varri i Bunjakut, i bëri thirrje bashkësisë ndërkombëtare “të mos e konsiderojë Serbinë shtet normal përderisa ajo nuk i dorëzon kriminelët e Serbisë të organizuar dhe udhëhequr nga Millan Radoiçiq dhe të financuar e mbështetur nga Beogradi zyrtar dhe presidenti atje, Aleksandar Vuçiq”.

Serbia e ka mohuar çdo përfshirje në sulmin e Banjskës dhe ende nuk ka ngritur aktakuzë ndaj tij, pavarësisht se vitin e kaluar kishte paralajmëruar se do ta bënte.

Gjykata e Lartë në Beograd tha për Radion Evropa e Lirë këtë javë se Radoiçiqit i është zgjatur masa e ndalimit të largimit nga Serbia, me detyrimin që të paraqitet në polici më 1 dhe 15 të çdo muaji.

Vitin e kaluar, Kosova ngriti aktakuzë kundër 45 të dyshuarve për sulmin në Banjskë, ndërsa vetëm tre nga këta të akuzuar janë duke u gjykuar në Prishtinë, pasi të tjerët janë të paarritshëm për autoritetet kosovare. Që të tre i mohojnë akuzat.

“Të akuzuarit duhet t’i dorëzohen menjëherë Kosovës, ku ka aktakuzë për ta dhe fakte të panumërta për përfshirje në këtë vrasje të Afrim Bunjakut dhe në këtë sulm agresor e terrorist të tyre”, tha Kurti.

Kurti shtoi se “rënia heroike e Afrim Bunjakut nuk ishte e kotë, ishte një rënie që e ngriti republikën e Kosovës brenda dhe në reputacionin e saj ndërkombëtar [duke treguar] që kemi të bëjmë me një shtet i cili i del zot vetvetes dhe i cili ka policë për t’i mbrojtur qytetarët pa dallim”.

Ndërkohë, kryetari i Kuvendit të Kosovës, Dimal Basha, tha se Serbia duhet t’i dorëzojë “terroristët për të cilët ka aktakuzë dhe i bëjmë thirrje edhe bashkësisë ndërkombëtarë të ushtrojë trysni ndaj Serbisë”.

Kosova i ka kërkuar vazhdimisht bashkësisë ndërkombëtare që të bëjë trysni mbi Serbinë, por Beogradi nuk pranon t’i ekstradojë të akuzuarit, duke thënë se ata do të gjykohen në Serbi.

Ambasada e Gjermanisë në Prishtinë, tha se është e “papranueshme” që dy vjet nga sulmi, Radoiçiqi vazhdon të jetojë i lirë në Serbi.

“Dy vjet pas vrasjes së oficerit të Policisë së Kosovës, Afrim Bunjaku, dhe pavarësisht premtimeve të shumta se kryerësit do të përgjigjen para ligjit, ende nuk është dhënë drejtësi. Është e domosdoshme që llogaridhënia dhe drejtësia të zbatohen pa asnjë vonesë tjetër”, tha Ambasada gjermane.

| Radio Evropa e Lirë

Up Next

Britania i bën thirrje Serbisë që t’i sjellë sa më shpejt para drejtësisë autorët e Banjskës

Don't Miss

Sakrifica e Afrim Bunjakut, dëshmi e atdhetarizmit

Kosovë

S’ka ndyshim rezultatesh edhe pas numërimit të votave nga diaspora

Published

2 days ago

15 November, 2025

Redaksia

Në Qendrën e Numërimit dhe Rezultateve ka përfunduar numërimi i votave nga diaspora për balotazhin e zgjedhjeve lokale. Numërimi i votave me kusht dhe atyre me nevoja të veçanta kishte përfunduar të premten.

Edhe pas numërimit të të gjitha këtyre votave, nuk kanë ndryshuar rezultatet sa i përket fituesve të garave për kryetar në 18 komunat ku u zhvillua balotazhi.

Kështu, në Viti, ku rezultati ishte i ngushtë, fitues doli kandidati i LDK-së, njëkohësisht kryetari aktual i kësaj komune, Sokol Haliti. Ai fitoi garën ndaj Arsim Ademit nga LVV-ja me një diferencë prej vetëm 136 votave.

Edhe në Junik, pas numërimit të mbi 900 votave nga diaspora dhe 71 votave të personave me nevoja të veçanta, fitoi kandidati i LDK-së, Ruzhdi Shehu me 57.35% derisa kundër kandidati i tij, Agron Kuçi nga AAK-ja, mori 42.65% të votave të junikasve.

Kosovë

Vazhdon procesi i numërimit të votave me postë

Published

2 days ago

15 November, 2025

Redaksia

Komisioni Qendror i Zgjedhjeve (KQZ) ka njoftuar se në Qendrën e Numërimit dhe Rezultateve (QNR) ka filluar numërimi i fletëvotimeve të votimit me postë për raundin e dytë të zgjedhjeve për Kryetarë të 18 komunave.

Nga procesi i vlerësimit të 12,018 pakove të ardhura me postë, deri tani janë aprovuar 8932 pako derisa janë refuzuar 3086 sosh.

Sipas KQZ-së, arsyeja kryesore e refuzimit është mungesa e dëftesës së regjistrimit , e cila është evidentuar në 3,009 raste.

Për shkak të distancës, pritet të arrijnë 519 pako nga ShBA, Kanadaja dhe Australia, të cilat pas mbërritjes do të vlerësohen dhe numërohen.

Në zgjedhjet e fundit lokale numri i qytetarëve të regjistruar për votim me postë për këto 18 komuna ishte 29,752 votues.

Të premten janë numëruar rreth 750 fletëvotime nga votimi me kusht i mundësuar në vnevotime të veçanta dhe 1,441 fletëvotime nga votimi i personave me nevoja të veçanta, i mundësuar jashtë vendvotimeve përmes ekipeve mobile.

Rezultatet nga numërimi i fletëvotimeve me kusht dhe nga votimi i personave me nevoja të veçanta janë publikuar në platformën e rezultateve: https://resultslocal2025r2.kqz-ks.org/ në hapësirën e veçantë Rezultatet QNR.

Në të njëjtën platformë do të publikohen dhe rezultatet pas numërimit të fletëvotimeve nga votimi jashtë Kosovës.

Kosovë

Memli Krasniqi jep dorëheqje si kryetar i PDK-së

Published

4 days ago

12 November, 2025

Redaksia

Memli Krasniqi njoftoi të mërkurën dorëheqjen si kryetar i partisë së dytë më të madhe në Kosovë, Partisë Demokratike të Kosovës, duke thënë se ka ardhur koha për një mundësi të re për “familjen tonë demokratike”.

“Sot, pas shumë kohe reflektimi, ka ardhur momenti i duhur, prandaj sot kam vendosur të japë dorëheqje nga pozita e kryetarit të partisë”, tha Krasniqi.

Dorëheqja e tij vjen pesë muaj pasi ai ishte rizgjedhur në krye të partisë për një mandat të dytë në qershor.

Ai e kishte marrë drejtimin e partisë në vitin 2021.

Krasniqi njoftoi se do ta mbledhë konventën e partisë më 17 nëntor, ku do të zgjidhet kryetari i ri.

“Ky vendim nuk është as i momentit dhe nuk lidhet vetëm me zhvillimet e fundit. Është reflektim i gjatë i imi mbi atë se çfarë i duhet më shumë partisë në fazën e ardhshme”, shtoi ai.

Ai shtoi se PDK-ja ka nevojë për të krijuar “një momentum, dhe një mundësi të re për familjen tonë demokratike. Si dikush që nuk ka pasur asnjëherë ambicie për kryeministër, në zgjedhjet e ardhshme kandidati ynë duhet të jetë edhe kryetar i partisë”.

Gjatë udhëheqjes së tij, PDK-ja doli e dyta në zgjedhjet parlamentare të 9 shkurtit, duke i fituar 24 ulëse, me Bedri Hamzën si kandidat për kryeministër.

Krasniqi tha se nuk e di se kush do të garojë për kryetar të partisë në konventën e së hënës, por shtoi se do ta mbështesë Hamzën nëse ai garon.

“Preferencën time për Bedri Hamzën nuk e fshehu, përkundrazi me kënaqësi e bëj publike”, theksoi ai.

Krasniqi ka qenë pjesë e PDK-së për rreth dy dekada, fillimisht si kryetar i të rinjve të partisë e më pas nënkryetar i partisë para se të zgjidhej kryetar më 2021.

Nën udhëheqjen e tij, PDK-ja përveç që doli e dyta në zgjedhje nacionale, ajo i fitoi gjashtë komuna në zgjedhje lokale të këtij viti, duke pësuar një rënie të vogël në nivel lokal.

| Radio Evropa e Lirë