Dibran Hoxha, i njohur si ‘Kobra’ është shpallur sot fajtor për vrasjen në ‘Kobra City’ dhe është dënuar me 24 vjet burgim. 

Në aktakuzën e Prokurorisë, Dibran Hoxha akuzohet se më 3 janar 2023, në ora 4:10, në magjistralen Prizren-Zhur, me dashje ka privuar nga jeta Visar Cengun nga Kukësi, duke vënë në rrezik edhe jetën e të dëmtuarve R.T dhe A.B

Motivi i vrasjes, sipas aktakuzës, ishte një faturë 400-euroshe, të cilën të dëmtuarit nuk u pajtuan ta paguanin.

Të akuzuar në këtë rast kanë qenë edhe Roland Susuri, Arben Vezaj, Burim Mazreku dhe Jesmir Badallaj.

Kështu, i akuzuari Roland Susuri, për tri vepra penale (pjesëmarrje në rrahje, manipulim me prova dhe armëmbajtje pa leje) është dënuar me burgim unik prej 7  vite.

Arben Vezaj, për pjesëmarrje në rrahje është  dënuar me 1 vit burgim.

Burim Mazreku për manipulim me prova është dënuar me 1 vit burg kurse Jesmir Badallaj, për pjesëmarrje në rrahje dhe armëmbajtje pa leje, mori dënim unik 2 vite burgim.

Vazhdimi i seancës konstituive është paraparë për nesër, e premte 10 tetor, me fillim nga ora 10:00me vetëm një pikë, zgjedhjen e nënkryetarit të Kuvendit nga radha e komunitetit serb.

Njoftimi i për vazhdimin e seancës  vjen një ditë pas publikimit të aktgjykimit të plotë të Gjykatës Kushtetuese lidhur me këtë proces.  

Gjykata erdhi në përfundim se zgjedhja e nënkryetarit nga radhët e komunitetit serb është e domosdoshme për përmbylljen e konstituimit të Kuvendit të Kosovës duke përcaktuar afatin 12 ditor për finalizimin e procesit.

Aty është konstatuar edhe se Emilja Rexhepi është zgjedhur në mënyrë të duhur nënkryetare e Kuvendit nga radhët e komuniteteve joserbe dhe se procedura e ndjekur në procesin e deritashëm me votimin jo në pako me nënkryetarin e komuniteteve tjera joshumicë, nuk përbën shkelje.

“Gjykata rikujton se nga dispozitat kushtetuese, të Rregullores së Kuvendit dhe praktika gjyqësore e Gjykatës nuk rezulton ndonjë obligim i deputetëve për votimin në pako të nënkryetarëve të Kuvendit, qofshin ata që propozohen nga 3 (tre) grupet më të mëdha parlamentare apo komunitetet që nuk janë shumicë. Në këtë kontekst, duke qenë se votimi në pako nuk është shprehimisht i përcaktuar në Kushtetutë, i njëjti mund të realizohet nëse ka dakordim në mes të grupeve parlamentare apo deputetëve”

Gjithashtu, në aktgjykim është thënë se edhe votimi me short i secilit deputet serb me nga tri runde votimesh nuk ka qenë shkelje.

Megjithatë “Gjykata nënvizon se propozimi për nënkryetar të Kuvendit nga radhët e deputetëve të komuniteteve që nuk janë shumicë, në rastin konkret, të komunitetit serb, duhet që të bëhet nga shumica apo numri më i madh i deputetëve nga radhët e deputetëve të komunitetit serb”.

Kushtetuesja ka vendosur që secili deputet e ka për obligim të votojë për, kundër apo abstenojë ndaj propozimeve që duhet të dalin në Kuvend brenda 12 ditësh. Por, gjykata nuk ka treguar se cilat janë pasojat nëse këtë nuk e bëjnë deputetët brenda afatit të përcaktuar në aktgjykim.   

Autoritetet e sigurisë në Kosovë kanë arrestuar Fatmir Shehollin, të dyshuar për spiunazh.

Ministri në detyrë i Punëve të Brendshme, Xhelal Sveçla ka njoftuar se Sheholli është arrestuar në regjionin e Prishtinës me asistencë të Agjencisë Kosovare për Inteligjencë.

“ Pres trajtim institucional me seriozitet të lartë të këtij rasti, i cili përbën një nga aktet më të rënda ndaj sigurisë dhe rendit kushtetues të Republikës së Kosovës.

Individë si ky që kanë pasur hapësira mediatike të pakufizuara në vendin tonë ka bashkëpunuar me akterë që çdo ditë punojnë e veprojnë për të minuar Republikën tonë dhe progresin e saj’, ka shkruar Sveçla në Facebook.

Ndërkaq, Prokuroria Speciale ka njoftuar se Sheholli është ndaluar për 48 orë dhe njësitet e policisë janë duke kryer bastisje në vendbanimin e tij.

“Pas zhvillimit hetimeve disa mujore, me urdhër të Prokurorisë Speciale të Kosovës, të enjten hetuesit policorë nga Drejtoria për Hetimin e Krimit të Organizuar dhe Krimeve të Rënda në Policinë e Kosovës kanë arrestuar F.SH., nën dyshimet për veprën penale “Spiunazh”.

I dyshuari F.SH., është arrestuar në regjionin e Prishtinës, nën dyshimin e bazuar se ka kryer veprën penale “Spiunazh”, nga neni 124 paragrafi 3 të KPRK-së. Operacioni i arrestimit është kryer edhe me asistencë të Agjencisë së Kosovës pë Inteligjencë.

Me aktvendim të Prokurorisë Speciale, i dyshuari është ndaluar për 48 orë, dhe nga njësitet relevante të Policisë së Kosovës janë duke u kryer bastisje në vendbanimin e të dyshuarit, me qëllim të sigurimit edhe të provave të tjera materiale”, ka njoftuar Prokuroria Speciale e Kosovës.