Ferizaj

Hapësira e nënkalimit planifikohet të shfrytëzohet si galeri

Published

9 years ago

09 May, 2018

Në hapësirat ku janë planifikuar të punohen muralet, tashmë kanë filluar të bëhen përgatitjet e nevojshme për mbarëvajtjen e festivalit ndërkombëtar ‘’Mural Fest’’. Ndër hapësirat ku janë paraparë të bëhen murale është edhe ajo tek nënkalimi në rrugën “Ahmet Kaçiku’’ në Ferizaj. Drejtoresha e shoqatës së artistëve figurativ ‘’Zef Kolombi’’, Pranvera Sylejmani, tha se po planifikojnë që hapësira brenda nënkalimit të shfrytëzohet për ekspozita të ndryshme.

“Pika kryesore ka me qenë nënkalimi dhe nga këtu kanë filluar përgatitjet, në pjesën tek ‘’Bondensee’’ janë vendosur skelet, nesër është hapja, ndërsa të premten vetëm fillon puna e artistëve, ndërsa pika kyçe që është nënkalimi ka me pas grafite dhe ajo që është kryesorja nënkalimi është se ka me u hap për herë të parë një galeri urbane, raftet që janë përdor për reklama e postera të ndryshëm janë pastru dhe këtu do të hapet dhe ekspozita e Hazir Rekës me fotografi, po ashtu tema do të jetë antikorrupsion njëjtë sikurse e festivalit”, tha Sylejmani.

Ideja për zëvendësimin e reklamave dhe posterëve të politikanëve që ndodheshin në nënkalim, me ekspozita të ndryshme, po u pëlqen edhe qytetarëve.

“Është ide e mirë nëse nuk i dëmtojnë, ku njerëz të ndryshëm kalojnë dhe i dëmtojnë dhe çdo gjë që ka qëllim të mirë, është bukur dhe ideja me i largu posterat e politikanëve shumë e mirë pasi më mirë është një ekspozitë që paraqet një domethënie se puna e politikanëve po shihet”, tha Faton Abazi.

“Ide e mirë dhe e qëllume, fytyrat e politikanëve na kanë mërzitë, më mirë një gjë që ka vlerë, një art i mirë, kemi mjaft gjëra të bukura për me i ekspozu”, tha Ilmi Musliu.

Festivali i Muraleve, i cili do të hapet nesër do të zgjasë 7 ditë, ndërsa qytetit të Ferizajt do t’ia shtoj edhe tri murale dhe disa grafite.

Ferizaj

Ndahet nga jeta veterani i UÇK-së, Avdi H. Ahmeti

Published

5 days ago

03 November, 2026

Redaksia

Është ndarë nga jeta Veterani i Ushtrisë Çlirimtare të Kosovës, Avdi H. Ahmeti nga Ferizaj.

Njoftimi mortor u bë i ditur nga Organizata e Veteranëve të Luftës së UÇK-së, dega në Ferizaj.

Sipas njoftimit, varrimi i të ndjerit do të bëhet të mërkurën, më 04.11.2026 ora 14:15 në varrezat e lagjes Karametaj, të fshatit Greme të Ferizajt.

Ferizaj

Ndalohet për 48 orë një person për rastin e vdekjes të punëtorit në Ferizaj

Published

4 weeks ago

13 October, 2026

Redaksia

Prokuroria Themelore në Ferizaj, ka njoftuar për ndalimin e një personi me inicialet B.T. lidhur me rastin që ka ndodhur dje rreth orës 15:50, në rrugën ”Cen Dugolli” në Ferizaj, ku humbi jetën një punëtor derisa po punonte në një objekt ndërtimi. Viktima dyshohet se ka rënë nga lartësia dhe ka pësuar lëndime të rënda, si pasojë e të cilave ka ndërruar jetë në vendin e ngjarjes.

Sipas prokurorisë, i arrestuari B.T. është ndaluar nën dyshimin për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.

Njoftimi i Prokurorisë:

Ndalohet një person për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”

Ferizaj, 13 Tetor 2026– Prokuroria Themelore në Ferizaj, njofton opinionin publik se me vendim të Prokurorit të Shtetit, ka ndaluar një (1) person të dyshuar me iniciale B.T., në kohëzgjatje prej 48-orësh, për shkak të dyshimit të veprës penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”nga neni 358 sipas Kodit Penal të Republikës së Kosovës.

Rasti në fjalë ka ndodhur në rrugën ”Cen Dugolli” në Ferizaj, rreth orës 15:50:, ku, një person, i cili po kryente punime në një objekt ndërtimi, dyshohet se ka rënë nga lartësia dhe ka pësuar lëndime të rënda, si pasojë e të cilave ka ndërruar jetë në vendin e ngjarjes.

Vdekjen e viktimës e ka konstatuar mjeku kujdestar i Qendrës Emergjente në Ferizaj, kurse, me urdhëresë të prokurorit të shtetit, trupi i pajetë i vitkimës është dërguar për obduksion në Institutin e Mjekësisë Ligjore në Prishtinë.

Prokurori i shtetit, pas daljes në vendin e ngjarjes, ka udhëzuar Policinë dhe Inspektoratin e Punës, për ndërmarrjen e veprimeve të nevojshme hetimore, me qëllim të zbardhjes së rrethaneve të këtij rasti.

Prokuroria Themelore në Ferizaj, ndaj të dyshuarit të lartëpërmendur, brenda afatit ligjor do të vazhdoj me procedurat e mëtejme ligjore.

Ferizaj

Humb jetën një punëtor në një objekt në ndërtim në Ferizaj

Published

4 weeks ago

12 October, 2026

Redaksia

Një punëtor 54 vjeç ka humbur jetën pasi dyshohet se gjatë punës të jetë rrëzuar në një objekt në ndërtim në Ferizaj.

Rasti është raportuar të ketë ndodhur pasditen e sotme rreth orës 15:40, në rrugën “Cen Dugolli”.

Në vendin e ngjarjes kanë dalë policia dhe ekipet e Emergjencës, të cilat kanë konstatuar vdekjen e tij. Sipas policisë dyshohet se gjatë punimeve ndërtimore viktima është rrëzuar nga kati përdhes në bodrum.

Në vendngjarje kanë dalë edhe hetimet rajonale dhe inspektorët e punës derisa për të gjitha veprimet policore është njoftuar prokurori i shtetit.