Ferizaj

INPO kundër vendimit për pagesën me këste të lejeve ndërtimore

Published

8 years ago

06 June, 2018

Organizata joqeveritare ‘’Iniciativa për Progres’’ po kërkon që të anulohet vendimi i Kuvendit Komunal për lejimin e pagesës përmes kësteve për lejen ndërtimore të kategorisë II. Sipas INPO-s ky vendim është marrë në kundërshtim me ligjin për ndërtim dhe udhëzimin administrativ të Ministrisë së Mjedisit dhe Planifikimit Hapësinor.

“Për përcaktimin e procedurave për përgatitjen dhe shqyrtimin e kërkesave për kushtet ndërtimore, leje ndërtimore dhe leje rrënimi për kategorinë e I dhe II të ndërtimeve, të cilët e obligojnë komunën të lëshojë leje ndërtimi për kategorinë II, vetëm pasi të jenë përmbushur kushtet ndërtimore dhe të jetë ofruar dëshmia e pagesës për taksën e lejes ndërtimore. Tutje, neni 3 i këtij UA i ndalon komunës në mënyrë taksative që të kërkoj procedura apo dokumente shtesë për leje ndërtimore, të cilat nuk janë paraparë ose lejuar në mënyrë specifike me këtë UA”, tha Arbenita Topalli.

Në anën tjetër, kryesuesja e Kuvendit Komunal të Ferizajt Kristina Gashi-Bytyqi, tha se kërkesën e INPO-s mund ta shqyrtojnë vetëm atëherë kur Ministria e Administrimit të Pushtetit Lokal ta kthej vlerësimin e ligjshmërisë së vendimit në fjalë.

“Vendimi është marrë nga Kuvendi dhe është propozuar nga Drejtoria e Urbanizmit, e cila drejtori besoj paraprakisht është konsultuar me ligjin për ta marrë këtë vendim. Kështu që ne si Kuvend kemi ende kohë për të pritur derisa MAPL të na kthej përgjigje lidhur mbi vlerësimin e ligjshmërisë së vendimit për lejimin e pagesës me këste të marrjes së lejes ndërtimore. Pasi të kemi përgjigje nga ministria ne sigurisht që do ta shqyrtojmë kërkesën e INPO-s”, tha Gashi Bytyqi.

Përveç Kuvendit, INPO ka kërkuar që kjo çështje të jetë edhe subjekt i hetimeve nga Prokuroria e Shtetit.

“Kjo praktikë sistematike e kundërligjshme e pushteteve në Ferizaj lidhur me menaxhimin dhe administrimin e parasë publike duhet të jetë subjekt i hetimeve nga Prokurori i Shtetit, të cilit INPO i bën thirrje që të ndërmerr të gjitha veprimet e nevojshme ligjore për të siguruar sundimin e ligjit dhe të siguroj qytetarët e Ferizajt se buxheti i komunës nuk është dëmtuar’’, u shpreh Arbenita Topalli nga INPO.

Kërkesën e INPO-s tashmë e ka në dorë edhe kryeprokurori i Prokurorisë Themelore në Ferizaj Shukri Jashari.

“Po është e vërtetë që dje pasdite kemi pranuar një ankesë nga organizata INPO lidhur me çështjen në fjalë, pra për pagesën me këste për leje ndërtimore. Ne si prokurori e kemi pranuar kërkesën dhe jemi në shqyrtim e sipër. Kjo do të thotë se jemi duke e analizuar kërkesën dhe së shpejti do të dalim me një qëndrim të caktuar“, tha kryeprokurori Shukri Jashari.

INPO ka vlerësuar se kjo praktikë joligjore është zbatuar edhe nga pushteti i kaluar në Ferizaj, ndërkaq ka shtuar se Zyra Kombëtare e Auditimit në raportin e saj të auditimit të pasqyrave vjetore financiare të komunës se Ferizajt për vitin 2017, ka gjetur se së paku në pesë raste komuna ka lëshuar leje ndërtimi të kategorisë II pa u kryer të gjitha pagesat. Si pasojë, komuna nuk ka arritur t’i inkasoj rreth 171 mijë e 164 euro vetëm nga këto pesë leje ndërtimi.

Ferizaj

Gjatë qershorit në Ferizaj janë konfiskuar 74 motoçikleta

Published

1 day ago

02 July, 2026

Redaksia

Policia Rajonale e Ferizajt ka bërë të ditur se gjatë muajit qershor ka intensifikuar kontrollet në trafik ndaj drejtuesve të motoçikletave dhe skuterëve.

Si rezultat i këtyre kontrolleve, gjatë kësaj periudhe janë konfiskuar 74 motoçikleta, kryesisht për mungesë të dokumentacionit të rregullt derisa janë shqiptuar edhe 106 gjoba ndaj drejtuesve të motoçikletave, të cilët janë kapur duke qarkulluar në kundërshtim me rregullat dhe ligjet e komunikacionit rrugor.

Numri më i madh i gjobave janë shqiptuar për drejtim të motoçikletës pa patentë shofer, gjithsej 52 gjoba, 46 gjoba për drejtim të motoçikletës pa regjistrim dhe 8 gjoba për kundërvajtje të tjera.

Ferizaj

Prokuroria kërkon paraburgim ndaj të dyshuarës për vrasjen në Ferizaj

Published

4 days ago

29 June, 2026

Redaksia

Prokuroria Themelore në Ferizaj ka kërkuar nga Gjykata Themelore në Ferizaj, caktimin e masës së paraburgimit ndaj të pandehurës A.R., për shkak të dyshimit të veprës penale “Vrasja” sipas Kodit Penal të Republikës së Kosovës.

Sipas kërkesës së Prokurorisë, ekziston dyshimi i bazuar se me datë 28 Qershor 2026, rreth orës 22:40 në Ferizaj, rruga, “Sejdi Sejdiu”, e pandehura ka privuar nga jeta tani të ndjerin F.H., pas një mosmarrëveshje dhe përleshje fizike në mes tyre, me të cilën ka kryer veprën penale “Vrasja”, nga neni 172 të KPRK-së.

Ndërkaq, i dyshuari me iniciale M.B., që ishte ndaluar deri në sqarimin e plotë të rrethanave dhe përfshirjes së tij në rast, me aktvendim të Prokurorit të Shtetit është liruar.

Po ashtu, në këtë rast, lëndime trupore ka pësuar edhe e dyshuara A.R., të cilat dyshohet se i janë shkaktuar nga viktima- tani i ndjeri (F.H.,) për të cilat ka marr trajtim mjekësor në Qendrën Klinike Universitare të Kosovës (QKUK).

Ferizaj

Ndalohen dy persona për vrasjen e 32 vjeçarit në Ferizaj

Published

4 days ago

29 June, 2026

Redaksia

Policia e Kosovës ka dhënë detaje lidhur me vrasjen që ka ndodhur mbrëmë rreth orës 22:50, në një banesë në rrugën “Sejdi Sejdiu”në Ferizaj, ku një person ka humbur jetën dhe dy të tjerë janë ndaluar për 48 orë.

Viktima është identifikuar me inicialet F.H., 32 vjeç, ndërsa vdekja e tij është konstatuar në vendin e ngjarjes nga ekipi mjekësor.

“Gjatë ekzaminimit të vendit të ngjarjes është konstatuar një plagë që dyshohet se është shkaktuar nga arma e zjarrit. Në vendngjarje janë gjetur dhe sekuestruar një pistoletë dhe një gëzhojë.

Nga hetimet fillestare rezulton se ngjarja ka ndodhur në banesën e M.B. (48 vjeç), ku në momentin e incidentit ndodheshin aty bashkëshortja, si dhe vajza e tij A.R. (24 vjeçe). Kjo e fundit ka pësuar lëndime trupore dhe është dërguar për trajtim mjekësor në Qendrën Klinike Universitare të Kosovës (QKUK).

Pas ekzaminimit të vendit të ngjarjes, ekziston dyshimi i bazuar se rasti ndërlidhet me veprën penale “Vrasje e rëndë”.

Me vendim të prokurorit të rastit, i dyshuari M.B. është ndaluar për 48 orë. Po ashtu, edhe ndaj A.R. është lëshuar vendim për ndalim prej 48 orësh, mirëpo ajo vazhdon të mbetet nën trajtim mjekësor në QKUK.

Trupi i pajetë i viktimës është dërguar në Institutin e Mjekësisë Ligjore në Prishtinë për obduksion.

Sektori i Hetimeve Rajonale, në koordinim dhe autorizim të prokurorit të shtetit, është duke ndërmarrë veprime intensive hetimore për zbardhjen e plotë të rrethanave të këtij rasti”, thuhet mes tjerash në njoftimin e Policisë.