A.S punonjës në laboratorin e Qendrës Kryesore të Mjekësisë Familjare në Ferizaj, është pezulluar nga puna nën dyshimin për marrje ryshfeti. Drejtori i Shëndetësisë në Ferizaj Besnik Berisha, tha se ky punonjës i ka referuar pacientët në laboratorin e tij privat duke u thënë pacientëve se ato nuk kryhen nëpër institucionet shtetërore ndërsa të njëjtat i ka kryer me pajisjet e QKMF-së.

“Drejtoria e Shëndetësisë në bashkëpunim me policinë e krimeve ekonomike, kanë hetuar dhe e kanë zënë në flagrancë zyrtarin e laboratorit A.S dhe drejtori i QKMF-së e ka pezulluar prej punës me pagesë prej 50%, zyrtari që është pezulluar edhe në vitin 2015 ka qenë në komision disiplinor, por me ndërhyrjen e ish-pushtetit nuk i është përgjigjur ftesës së komisionit disiplinor  dhe me ndërhyrjen nga politika i njëjti person ka vazhduar punën. Është një urdhëresë e drejtorit edhe e kryetarit që mostrat e gjakut mos të dalin prej QKMF-së në ordinanca private dhe anasjelltas, kështu që këtu dyshohet se është bërë shkelje dhe personi në fjalë i ka përdorur pajisjet e QKMF-së ndërsa mostrat e gjakut i ka çu në ordinancë private, kështu që është dëmtuar pala dhe pala ka qenë një rast social të cilit i janë kërkuar para, paratë janë dhënë është zbulu rasti kështu që drejtori i QKMF-së ka marrë këtë vendim për pezullim”, u shpreh Berisha.

Në një konferencë për media, drejtori Berisha foli edhe për mungesën e barnave për çka tha se niveli lokal nuk mund të bëj asgjë në këtë drejtim.
Ai shprehu shqetësim edhe për mungesën e stafit mjekësor, me ç’rast u bëri thirrje mjekëve familjarë të paraqiten në Drejtorinë e Shëndetësisë.

“Ne si drejtori dhe qeveri lokale çdoherë bëjmë kërkesë në ministri, por nuk është në fuqinë tonë të vendosim për furnizim me barna, ne kërkesat i bëjmë me kohë dhe konform nevojave të Qendrave të Mjekësisë Familjare, por problemi është tek niveli qendror, ne çdoherë i bëjmë kërkesat, u bëjmë trysni edhe në institucionet qendrore, por ne nuk mund të ndikojmë as në prokurim. Fluksin që e kemi tani jemi koordinuar që të angazhojmë staf me kontratë për shërbime të veçanta, është shpall konkursi, janë pranuar njerëz, kanë filluar punën, mirëpo ne do të përpiqemi të bëjmë një kontratë dhe në të ardhmen t’i angazhojmë punëtorët e punësuar me Caritas, sepse shërbimet pa këta punëtorë janë më të mangëta, unë shfrytëzoj rastin që gjithë mjekët specialistë të mjekësisë familjare të paraqiten tek ne se ka vend për ta, ne kemi mungesë të mjekëve kështu që i inkurajoj që të paraqiten dhe do ta kenë vendin në Qendrat e Mjekësisë Familjare në Ferizaj”, tha Berisha.

Berisha gjatë ditës vizitoi hapësirat e QKMF-së në Ferizaj, ku bëri të ditur se janë vendosur kamera në Emergjencën Primare dhe të tilla tha se do të vendosen në të gjitha institucionet shëndetësore në Ferizaj.  Ai poashtu njoftoi se me qëllim të ruajtjes së produkteve farmaceutike barnatorja e QKMF-së është zhvendosur në objekt të ri, ndërsa theksoi se shumë shpejt edhe zyrat e Drejtorisë së Shëndetësisë do të zhvendosen në objektin e QKMF-së.