Kanë kaluar më shumë se 1 vit që nga shfaqja e rastit të parë të infektuar me koronavirus në Kosovë, e që nga ajo kohë mediat nuk u ndalën së raportuari rreth rasteve të reja, masave anti-Covid, dëmeve ekonomike nga pandemia, e tani së fundmi edhe për vaksinat kundër koronavirusit.

Lajmet e vetme që munguan gjatë kësaj kohe ishin pikërisht ato për median.

Mediat raportuan për vështirësitë e të gjithëve, përveç për vështirësitë e tyre.

Sekretari i Klubit të Gazetarëve “Haki Braha” në Ferizaj, Driton Ramadani, tregon rreth sfidave që i kanë përcjellur mediat ferizajase gjatë më shumë se një viti pandemi.

“Pothuajse sikur të gjitha institucionet që kanë pasur vështirësi, po ashtu edhe mediumet në Ferizaj i kanë pasur vështirësitë e tyre, sepse dihet që mediumet varen nga bizneset, kur bizneset kanë probleme atëherë kanë edhe mediumet, arsyeja është sepse shumica e mediumeve varen nga marketingu të cilin e bëjnë. Ta marr një shembull, në qoftë se për ndonjë organizim ka pasur të hyra nga reklamimi, kjo ka qenë një mungesë. Edhe në mediumet e Ferizajt është ndjerë pandemia edhe përkundër që çdo ditë kemi qenë në terren, unë e them pa i anashkaluar institucionet e tjera, pas institucioneve shëndetësore, gazetarët kanë qenë drejtpërdrejtë të atakuar me virusin Covid-19”, thotë Ramadani për Tv Tema.

Drejtori i portalit FerizajPress, Abdullah Imeri, thotë se edhe pse ishin në vijën e parë të frontit në përballjen me pandeminë, gazetarët asnjëherë nuk u përmendën nga askush.

“Asnjëherë nuk janë përmendur mediat, ndoshta kjo ishte modestia e mediave që nuk janë anku për vete, por edhe mediat janë biznese, edhe ato duhet të paguajnë paga për punëtorët. Nëse e shikojmë në këtë drejtim mediat kanë qenë më të dëmtuarat, sepse mediat jetojnë apo mbijetojnë nga reklamat. Gjatë pandemisë pak biznese janë interesu për reklama, ato kanë shiku si të mbijetojnë,  askush nuk ka qenë i interesuar me reklamu”, theksoi Imeri.

Edhe Drejtori i Televizionit Festina, Vllaznim Jakupi, ankohet se megjithë rrezikshmërinë e lartë në punë gjatë pandemisë, mediat nuk u ndihmuan e as nuk u morën parasysh.

“Padyshim që prej paraqitjes së pandemisë edhe mediat janë ataku shumë e askush nuk është marrë me media. Rrezikshmëria ka qenë e madhe e përkundër saj nuk jemi ndalë, kemi punu vazhdimisht. Vështirësitë kanë qenë evidente nga rrezikshmëria, sepse gazetarët janë ballafaqu direkt me pacientët aty ku është zjarri më i madh i Covid-19. Ne si media aspak nuk jemi kategorizu, kemi hy në sektorin e punëtorëve ku pak është subvencioni në thonjëza me thënë, sepse ajo asgjë s’ka qenë”, thotë Jakupi.

Ramadani, Imeri e Jakupi tregojnë se çka duhet të ndërmerret në mënyrë që të tejkalohen sfidat që i kanë kapluar mediat gjatë kësaj periudhe.

“Kur merren hapa për institucionet mikrofinanciare, për bizneset tjera, atëherë është dashur që të mendohet edhe për mediumet. Vështirësi ka qenë edhe pagesa e licencës, shumica e mediumeve duke menduar se ndoshta do të ketë lehtësi kanë bërë edhe vonesa. Është dashur ndoshta që për shkak të përmbaruesit të paguhet edhe një licencë tjetër. Shumica e mediumeve nuk kanë pasur mjete për t’i paguar këto. Mendoj se edhe qeverisja lokale, por edhe ajo qendrore duhet të mendojnë edhe për institucionet, sepse ne jemi ata që janë atakuar drejtpërsëdrejti dhe nuk e kemi ndërprerë për asnjë sekond transmetimin e programeve duke i informuar shikuesit dhe dëgjuesit tanë për rrjedhën e pandemisë. Është koha e duhur që të ndahet një buxhet për mediat qendrore, por edhe ato lokale, sepse aot lokale janë më shumë të atakuara”, tha Driton Ramadani.

“Ka qenë një periudhë shumë e keqe, uroj të mos përsëritet. Të kthehet normaliteti i mediave, por me ndihmën e Qeverisë, së paku edhe mediat të kompensohen, të ndihmohen, sepse unë di shumë biznese që ende nuk kanë pasur mundësi t’i kryejnë obligimet e punëtorëve për shkak të ndërprerjes së reklamave. Gazetarët kanë qenë tërë kohën rreth virusit dhe nuk di që ka pas prioritet. Krejt në rregull që janë falënderu policia, por me ta kanë qenë edhe mediat bashkë. Unë besoj që tash do të hyjnë në prioritet që të vaksinohen më herët, sepse prapë janë në terren dhe në kontakt me raste, u shpreh Abdullah Imeri

“Nëse është dikush që është dashur me u ndihmu janë gazetarët dhe kameramanët. Nëse është ndihmu polici e mjeku, pse jo edhe gazetarët. Kur kanë interes, mule mediat e në këtë drejtim janë shukatë, nuk ka asgjë deri tani, sepse asgjë nuk është kjo ndihmë. Shpresojmë që në një të ardhme do të merremi parasysh. Edhe ne si komunitet i gazetarëve duhet të ngrisim zërin më shumë duke u nisur nga shoqata e gazetarëve që duhet të bëjë presion më shumë, në këtë aspekt të mos ketë jarani, por të ngritet zëri më shumë. Edhe nga ana e komunitetit tonë të mediave nuk është bërë shumë. Çdokush që ka bërë presion ka fitu, ne nuk kemi bërë, defekti është pak edhe tek ne“, theksoi Vllaznim Jakupi.

Për shkak të problemeve nga pandemia, në Kosovë ka më shumë se një vit që është ndalur prodhimtaria e gazetarisë së shkruar apo gazetave.