Sipas planit të Prokurimit te komunës së Ferizaj, parashikohej që në fund të muajit qershor, të fillonin procedurat për hapjen e tenderit për “transmetimin live të seancave të Kuvendit Komunal, publikimeve, njoftimeve, konkurseve si dhe të emisioneve të ndryshme informative në televizion për nevojat e komunës”.
Megjithatë kjo nuk ka ndodhur.
Kuvendari i pavarur i Kuvendit Komunal të Ferizajt, Nehat Mustafa këtë mosveprim të ekzekutivit lokal e sheh si presion ndaj mediave.
“Duke e pasë parasysh ndjeshmërinë e transmetimit të seancave të Kuvendit të Komunës dhe mos shpalljen e thirrjes për përzgjedhjen e operatorëve për transmetimin e saj, pa paragjykuar se kush mund të jetë, kjo mund të kuptohet edhe si një lloj presioni që mund t’u bëhet mediave që ne nuk e shpallim tenderin derisa ju nuk tregoni dëgjueshmëri ndaj pushtetit. Përderisa është dashur të shpallet në qershor, dikush duhet të mbajë përgjegjësinë për vonesën dy mujore. Praktika tregon se të gjitha pushtetet që kanë tentuar censurën kanë dështuar sepse sot nuk mund të bësh censurë. Nëse kjo qeverisje vërtetë ka punuar mirë siç po thonë, ata duhet të shfrytëzojnë seancat për proklamimin e punës së tyre e jo tu bëhet presion mediave. Por kemi parë që raporti i Auditorit nuk po flet më së miri për Komunën e Ferizajt e prandaj kjo mund të jetë një nga arsyet që është prolonguar shpalljen e këtij tenderi”
Nehat Mustafa – Kuvendar i pavarur
Shkëlzen Selmani i LDK-së, në anën tjetër konsideron se kështu po tentohet të censurohen të gjithë kuvendarët që kritikojnë.
“Është e padrejtë ndaj 41 asamblistëve, që të vetmin mjet për arsyetimin e votave, ka qenë transmetimi live i seancave të Kuvendit Komunal. Tash, asamblistët mundësi tjetër për të shpreh pakënaqësitë e qytetarëve përveç në seancë nuk kanë, si për të mirë si për gabime. Kjo me u ba në fund të mandatit, unë e shoh si një lloj censure ndaj të gjithë asamblistëve që kritikojnë e japin propozime tjera, por asamblistët janë shndërru vetëm në vegla për votim. Nuk e di cilat janë arsyet pse nuk është hapë tenderi, kur edhe me plan të prokurimit, është në kuadër të buxhetit që e kemi votu si asamble komunale edhe prej qershorit deri tash nuk është hapë”.
Shkelzen Selmani – Kuvendar i LDK-së
Teksa kthehet në retrospektivë, Dritëro Hyseni i LVV-së thotë se tendenca e pushtetit lokal gjithmonë ka qenë ngulfatja e fjalës së opozitës.
“Është e çuditshme se pse këta nuk e kanë hapur tenderin dhe është akoma më e çuditshme se si kjo qeverisje lokale ka tentuar që nga fillimi të ndrydhë fjalën e opozitës e cila të vetmen derë e ka transmetimin live të seancave. Edhe në vitin 2019 e kemi pasur si diskutim Rregulloren e Punës së Komunës së Ferizajt e edhe në atë kohë patën tentuar që transmetimin live të seancave të Kuvendit ta ndërpresin apo të mos hapin tenderë për mediat. Ne konsiderojmë që transmetimi live i seancave është mënyra e vetme që opozita të dëgjohet dhe të shkojë tek qytetari. Kjo është tendencë për të ndrydhur fjalën e lirë të opozitës e sidomos tash që jemi në prag të zgjedhjeve dhe në Kuvendin Komunal do të kemi disa tema shumë të rëndësishme si buxheti e shumë të tjera”.
Dritëro Hyseni – Kuvendar i LVV-së
Për të kuptuar arsyet se përse nuk po veprohet sipas Planit të Prokurimit rreth kësaj çështje nga Komuna e Ferizajt, TV Tema tentoi të marr në prononcim Kryetarin e Komunës, Zëdhënësin e Drejtoreshën e Administratës domen i së cilës është kjo çështje, por që të tre ishin në pushime.
Kurse personi përgjegjës në drejtorinë e Administratës së Përgjithshme u deklarua jo kompetent për të folur rreth kësaj çështjeje.
Teatri “Adriana” ka njoftuar se premiera e shfaqjes “Fluturimi mbi teatrin e Kosovës” është shtyrë për datën 14 qershor 2025, shkaku i pengesave institucionale që trupa ka hasur gjatë përgatitjes së kësaj premiere.
Sipas deklaratës për media, gjatë përgatitjeve për premierën e kësaj shfaqjeje, të caktuar fillimisht për 7 qershor, trupa është përballur me kërkesa për ndërhyrje në tekstin e shfaqjes, mungesë të papritur të buxhetit për materiale skenike dhe pengesa të tjera që, sipas tyre, përbëjnë “një sabotim të heshtur” ndaj artit dhe lirisë krijuese.
Megjithatë, nga teatri konfirmojnë se premiera e shfaqjes “Fluturimi mbi teatrin e Kosovës”, me tekst të Jeton Nezirajt dhe regji të Agon Myftarit, do të mbahet në datën e re, edhe nëse u duhet të riciklojnë kostume dhe skenografi nga prodhime të mëparshme.
Teatri thekson se këto pengesa janë një formë e censurës indirekte ndaj lirisë krijuese, duke theksuar rëndësinë e mbrojtjes së lirive artistike dhe të shprehjes në Kosovë.
“Është paradoksale dhe shqetësuese se si disa individë marrin bajrakun e patriotizmit duke akuzuar tërthorazi artistët si antikombëtarë, dhe në emër të një lloj nacionalizmi primitiv, përpiqen të kufizojnë të drejtën krijuese — për të cilën të njëjtët kanë luftuar në vitet 1998–1999”, thuhet më tej në deklaratë, përmes së cilës, aktorët dhe regjisori i bëjnë thirrje publikut dhe komunitetit artistik të mbështesin shfaqjen dhe të qëndrojnë kundër çdo censure.
“Më 14 qershor, në skenën e Teatrit ‘Adriana’, nuk do të shfaqet vetëm një vepër. Do të shfaqet vetë qëndrimi ynë ndaj lirisë”, thuhet mes tjerash në deklaratë.
Policia e Ferizajt, gjatë javës së kaluar, ka shqiptuar 1 mijë e 310 gjoba trafiku, si dhe ka pezulluar 14 patentë-shoferë për drejtuesit e mjeteve që kanë kryer shkelje të rënda në trafik.
Gjatë kësaj periudhe, policia ka bërë të ditur se kanë ndodhur gjithsej 36 aksidente, nga të cilat, 13 ishin me të lënduar kurse 23 aksidente të tjera ishin vetëm me dëme materiale.
Një person ka raportuar në polici se në fshatin Bibaj të Ferizajt persona të panjohur kanë hyrë me forcë brenda shtëpisë ku i kanë vjedhur stoli ari.
Në raportin 24 orësh të Policisë së Kosovës bëhet e ditur se vjedhja ka ndodhur natën e 9 majit rreth orës 21:00.
“Fsh. Bibaj, Ferizaj 09.05.2025, 21:00. Ankuesi mashkull kosovar, ka raportuar se persona të panjohur kanë depërtuar me forcë brenda në dhomën e tij dhe nga aty kanë arrit të marrin stoli ari. Rasti nën hetime”, thuhet në raportin e Policisë së Kosovës.