Ferizaj

Asfaltohen disa rrugica në Koshare

Published

8 years ago

05 September, 2018

Në fshatin Koshare të Ferizajt, ka filluar asfaltimi i disa rrugicave. Drejtori i Infrastrukturës Arbër Bytyqi, tha se në kuadër të këtij projekti është paraparë asfaltimi i rrugicave në fshatin Koshare dhe Slivovë.

“Kemi filluar asfaltimin e rrugicave në fshatin Koshare, është një projekt tre vjeçar që ka të bëj me asfaltimin e rrugëve në fshatin Koshare dhe Slivovë, vlera e këtij projekti është 377 mijë euro, gjithsej do të asfaltohen 24 rrugica në kuadër të këtij projekti dhe në kuadër të këtyre 24 rrugicave pjesë të caktuara do të kenë gjerësinë 5 metra, ndërsa disa prej tyre edhe 6 metra, nga këto 8 rrugica janë në fshatin Koshare, ndërsa 16 në fshatin Slivovë, faktikisht këto rrugë kishin mbetur në gjysmë ose disa nuk kishin filluar fare ndërsa ne i kemi filluar dhe tani jemi në fazën e fundit të asfaltimit të këtyre rrugëve, për fshatin Koshare nuk besoj se do të na mbetet ndonjë rrugicë pa u asfaltuar”, tha Bytyqi.

Banorët e Kosharës mirëpritën asfaltimin e rrugicave në fshatin e tyre.

“Unë gëzim më të madh se sot nuk kam pas, madje edhe mbrëmë e kam menduar që edhe nëse vdes e di që për asfalti më çojnë me më varros, gëzim më të madh nuk kam pas se kishim problem edhe me pluhur edhe me gropa, edhe na ndajti ai, në 2016 e shtroj një pjesë të mahallës e neve na ndajti, ndërsa këta paçin ymër nga dita e sotit”, tha Jakup Maksuti.

“Na gëzim kemi sot, shumë mirë është duke u asfaltuar që me u pas kanë autostradë nuk ish ba kështu, ne e falënderojmë edhe kompaninë, por edhe kryetarin, ka qenë gropa e pluhur, vjet na ka pas nda Svarqa, por tani mirë”, tha Xheladin Selimi.

Kurse, përfaqësuesi i fshatit Koshare Valon Halimi, tha se asfaltimi i këtyre rrugicave është vazhdimësi e projektit të LDK-së.

“Kosharja është përfituese në vazhdimësi e punëve të mira të menaxhimit të parasë publike nga ana e LDK-së që ishte projekt i vitit të kaluar dhe sot është faza e dytë e asfaltimit të rrugëve në fshatin Koshare, kjo tregon se taksat dhe tatimet e qytetarëve po kthehen në investime, ku Kosharja meriton t’i përfundoj të gjitha rrugët që janë tenderuar dhe projektuar dhe kërkojmë nga pushteti që të marrë inciativë që të gjitha rrugët që janë të tenderuara me këtë projekt të finalizohen, përveç rrugës “Maksuti” dhe rrugës “Mejtepi” mbeten të kryhen edhe rrugët ”Hoxhë Elmiu”, “Ramë Mehmeti”, rruga e “Tërhanëve”, rruga “Trëndafilat”, ”Mulla Bejqës” dhe rruga “Fatmir Tërshani”, që më këtë cikël përfundojnë edhe investimet në infrastrukturën rrugore, ndërsa presim që në të ardhmen Kosharja të bëhet edhe me një shtëpi shëndeti që ka qenë e planifikuar, por pushteti aktual e ka hequr nga projekt-buxheti, por besojmë se me interesimin e qyetarëve do ta bëjmë aktive prapë”, tha Valon Halimi.

Sipas drejtorit të Infrastrukturës, gjatësia totale e rrugëve që do të asfaltohen në këto dy fshatra është mbi 8 kilometra.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

1 week ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim