Ferizaj

Shënohet Dita e Dëshmorëve në Ferizaj

Published

7 years ago

28 September, 2018

Dita e Dëshmorëve në Ferizaj, tuboi sot mijëra qytetarë në Varrezat e Dëshmorëve të kësaj komune. Për t’i nderuar ata që dhanë më të shtrenjtën për çlirimin e vendit, qytetarët ferizajas bën homazhe në orët e paraditës. Këtu u panë pozitë e opozitë, shoqata të dala nga lufta, si dhe mysafirë që kishin ardhë nga komunat e tjera të Kosovës. Homazhet për Ditën e Dëshmorëve, sivjet u realizuan në kuadër të 20 vjetorit të “Epopesë së lavdishme të Jezercit”. Me krenarë se kurrë u ndjenë familjet që dhanë më të shtrenjtit e tyre për këtë liri që Kosova po e gëzon sot.

“Emocionet e mia sot janë të krenarisë gjithsesi, unë jam i prekur për besë, jam i prekur nga ky masovitet që kanë ardhur sot këtu e po i nderojnë dëshmorët e tyre, ju lumtë të gjithëve, por edhe organizatorit. E gëzofshim këtë ditë, ta kujtojmë me mall dhe krenari luftën që patëm për këtë liri. Sot, para 20 vitesh ranë për të mos vdekur kurrë 9 dëshmorë, u flijuan në mënyrë heroike për atdheun. Ata dhe 2 mijë të tjerë dëshmorë sot na bëjnë obligativ që të kemi qasje më ndryshe ndaj vendit, të kemi moral më të fortë dhe t’i shtyejmë proceset përpara, sepse sot jemi të lirë, por nuk jemi si në Zvicër, duhet të punojmë më shumë për ta bërë shtetin me sistem”, tha Gafurr Bytyqi nga Shoqata e Familjeve të Dëshmorëve.

Të kënaqur dhe të emocionuar nga pjesëmarrja e madhe e qytetarëve në homazhe, u shprehen edhe organizatorët e javës së “Epopesë së Jezercit”.

“Emocionet janë të mëdha, siç na keni përcjell gjatë tërë javës ne kemi mbajtë aktivitete për këtë epope të lavdishme dhe natyrisht që kemi pasur emocione të veçanta. Kjo ditë është një ditë lavdie, një ditë jubilare, një ditë e një epopeje të zonës sonë, pasi që ”Epopeja e Jezercit” është nga ato më të mëdha në Kosovë, është beteja e fundit e ofansivës së parë. Ndihemi krenarë që kemi pasur 9 dëshmorë dhe besoj që këtë ditë do ta mbajmë me dinjitet dhe të punojmë për të ardhmen e fëmijëve tanë në vendin tonë”, tha Luan Jahiri nga OVL e UÇK-së.

Në betejën e Jezercit ranë dëshmorë Gursel e Bajram Sylejmani, Kemajl Hetemi, Sejdi Sejdiu, Sali Baliu, Lulzim Guta, Arsim Zeqiri, Bashkim Vishi dhe Nazim Terziu.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

2 days ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

3 days ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

1 week ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim