Kosovë

Andin Hoti thotë se Kosova e Serbia nuk janë afër nënshkrimit të marrveshjes për të pagjeturit

Published

4 years ago

30 July, 2022

Kosova dhe Serbia nuk janë afër nënshkrimit të një deklarate për personat e pagjetur, thotë kryetari i delegacionit të Kosovës për bisedime për çështje të personave të zhdukur në kuadër të grupit punues, Andin Hoti.

Shkak për këtë është refuzimi i palës serbe që në deklaratë të përdoret termi “të zhdukur me forcë” dhe çështje të tjera që lidhen me rolin e Bashkimit Evropian në këtë proces, e për të cilat Hoti flet derisa thekson se Serbia po bënë lojë politike me këtë çështje.

Një deklaratë që do të obligonte palën serbe të hap arkivat sekrete dhe jo sekrete të luftës së fundit dhe do të përfshinte më shumë Bashkimin Evropian në këtë çështjen e të pagjeturve, nuk pritet të nënshkruhet së shpejti në Bruksel.

Serbia nuk po pranon që të pagjeturit të quhen persona të zhdukur me forcë.

I biri i veprimtarit të zhdukur, Ukshin Hotit, thotë se Kosova nuk pajtohet që ky term të largohet në tërësi nga deklarata duke shtuar se i njëjti është një tregues i realitetit se çka ka ndodhur në Kosovë.

“Vazhdojmë të insistojmë dhe nuk e kam ndërmend të ndryshoj këtë qëndrim sepse ai term duhet të jetë në deklaratë për shumë arsye, dhe nuk është arsye politike kjo, sepse jam i bindur që termi ‘të zhdukur me forcë’ obligon të dyja palët, e them sinqerisht, edhe Kosovën edhe Serbisë, e obligon të ofrojnë informacione, të ofrojmë punën tonë për të gjetur personat e zhdukur. Ndërsa nëse ne shkojmë dhe bëjmë deklarata pa pritje të një rezultati konkret në Bruksel atëherë është e dhimbshme për familjarët, dhe unë nuk dua që familjarët të krijojnë shpresa të kota, sepse jemi 22 vite prapa. Prandaj jo, nuk jemi afër (nënshkrimit të deklaratës).”, thotë Hoti.

Çështje të tjera që po diskutohen brenda kësaj deklarate, sipas Hotit, lidhen me rolin e Bashkimit Evropian në këtë proces.

“Pjesë të tjera që po e them, kanë të bëjnë me rolin më të rëndësishëm të Bashkimit Evropian në procesin e personave të zhdukur sepse ne e kemi provuar deri sot dhe vazhdojmë të provojmë këto marrëdhëniet tona Kosovë-Serbi për fatin e personave të zhdukur, ne e dimë se si Serbia luan lojë politike me këtë çështje, prandaj e kemi parë të rëndësishëm që kjo çështje të kalojë në Bruksel, që BE të luajë rol pak më të rëndësishëm, pak më vendimmarrës në çështjet e personave të zhdukur. Edhe këtë e kam kërkuar edhe atje, edhe kjo është një problem që është duke u trajtuar brenda kësaj deklarate”, thotë Hoti.

Hoti thotë se nëse Serbia nuk pajtohet me termin “të zhdukur me forcë” atëherë deklarata në tërësi do të mund të hiqet fare. Ai shton se pala kosovare është duke u përballur me presione në lidhje me këtë çështje.

“Termi ‘persona të zhdukur me forcë’ ka qenë në çdo pikë të deklaratës, jemi mundur të kuptojmë, edhe pse ka qenë e pakuptueshme, edhe me tërheq gati në shumicën prej pikave, dhe e kemi lënë në vetëm një apo dy pika. Nuk kam çka bëj tjetër, ky është sipas meje, ky është edhe fundi i bisedimeve për deklaratën për personat e zhdukur në Bruksel, sa më përket mua, që ne mund të merremi vësh diçka tjetër aty. Nëse Serbia vazhdon të hezitojë atëherë Bashkimi Evropian, apo kushdo qoftë tjetër, le të drejtohet të Serbia, jo të ne… Ne jemi të vendosur, dialogu po vazhdon ende, qëndrimi im është ky, këtë e kam thënë edhe në Bruksel disa herë, mirëpo nuk e nënshkruaj unë (deklaratën) unë jam vetëm pjesë e delegacionit, si do të rrjedh deri në fund nuk e di. Presion të hatashëm kemi si palë kosovare për këtë punë”, thotë Hoti.

Javë më parë, i dërguari special i Bashkimit Evropian për dialogun Kosovë-Serbi, Miroslav Lajçak ka thënë se janë “dy fjalë afër ose dy fjalë larg marrëveshjes për të pagjeturit”.

Ai ka thënë se 99.5% e tekstit të deklaratës është dakorduar veçse nevojitet vullnet politik duke shtuar se do të ketë konsultime për këtë në ditët në vijim./KP

Kosovë

Kushtetuesja: Qeveria u zgjodh në përputhje me Kushtetutën, presidenti të zgjidhet deri më 6 tetor

Published

8 hours ago

23 September, 2026

Redaksia

Gjykata Kushtetuese e Kosovës ka konstatuar se Qeveria e udhëhequr nga Albin Kurti është zgjedhur në përputhje me Kushtetutën.

Sa i përket zgjedhjes së presidentit, Gjykata ka sqaruar se afati 60-ditor ka nisur më 8 gusht dhe përfundon më 6 tetor.

Vendimi i publikuar pasditen e sotme vjen pas ankesave të Partisë Demokratike të Kosovës, e cila kishte kontestuar konstituimin e Kuvendit dhe formimin e Qeverisë.

Gjykata ka konstatuar se Kuvendi, i konstituuar më 13 shtator, e ka tejkaluar afatin kushtetues prej 30 ditësh. Megjithatë, deputetët duhet të zgjedhin ende nënkryetarin e dytë të Kuvendit, i cili duhet të jetë nga PDK-ja, si partia e dytë e dalë nga zgjedhjet e 7 qershorit.

Kushtetuesja ka rrëzuar gjithashtu edhe kërkesën për masë të përkohshme ndaj punimeve të Kuvendit.

Kuvendi u konstituua më 13 shtator me votat e deputetëve të Lëvizjes Vetëvendosje, Lidhjes Demokratike të Kosovës dhe përfaqësuesve të komuniteteve joshumicë, në mungesë të deputetëve të PDK-së dhe AAK-së.

Disa orë më vonë, Kuvendi votoi edhe Qeverinë e re, të udhëhequr nga Albin Kurti.

Njoftim për vendim në rastet KO256/26 dhe KO258/26

23.09.2026

Gjykata Kushtetuese e Republikës së Kosovës, më 23 shtator 2026, vendosi lidhur me kërkesat e bashkuara KO256/26 dhe KO258/26, në lidhje me vlerësimin e kushtetutshmërisë së “Vendimit nr. 11-V-002, të 9 shtatorit 2026, për zgjedhjen e Kryetares së Kuvendit; Vendimit procedural të 11 shtatorit 2026 për mënyrën e votimit të nënkryetarëve; dhe konstatimit të 13 shtatorit 2026 për konstituimin e legjislaturës XI të Kuvendit”, si dhe “Vendimit Nr. 11-V-007, të 13 shtatorit 2026, për zgjedhjen e Qeverisë së Republikës së Kosovës”, të parashtruar nga: KO256/26, Arian Tahiri dhe nëntë (9) deputetë të tjerë të Kuvendit të Republikës së Kosovës; dhe KO258/26, Arian Tahiri dhe dhjetë (10) deputetë të tjerë të Kuvendit të Republikës së Kosovës, bazuar në paragrafin 5 të nenit 113 [Jurisdiksioni dhe Palët e Autorizuara] të Kushtetutës së Republikës së Kosovës.

Gjykata, njëzëri, vendosi:

1. TË DEKLAROJË kërkesën të pranueshme;
2. TË KONSTATOJË që Kuvendi i Republikës së Kosovës është konstituuar pas kalimit të afatit tridhjetë (30) ditor, të përcaktuar në paragrafin 1 të nenit 66 [Zgjedhja dhe Mandati] të Kushtetutës së Republikës së Kosovës;
3. TË KONSTATOJË që kalimi i afatit tridhjetë (30) ditor për konstituimin e Kuvendit të Republikës së Kosovës, të përcaktuar në paragrafin 1 të nenit 66 [Zgjedhja dhe Mandati] të Kushtetutës së Republikës së Kosovës, ka për pasojë fillimin e rrjedhjes së afateve kushtetuese për zgjedhjen e Presidentit të Republikës së Kosovës, kur posti i Presidentit është vakant dhe për zgjedhjen e Qeverisë së Republikës së Kosovës sipas neneve 86 [Zgjedhja e Presidentit], 95 [Zgjedhja e Qeverisë] dhe nënparagrafëve 1 dhe 3, paragrafit 1 të nenit 82 [Shpërndarja e Kuvendit] të Kushtetutës së Republikës së Kosovës;
4. TË KONSTATOJË që deputetët e Kuvendit të Republikës së Kosovës duhet që sa më parë të zgjedhin Nënkryetarin e Kuvendit të Republikës së Kosovës nga radhët e grupit të dytë më të madh parlamentar, në pajtim me paragrafin 3 të nenit 67 [Zgjedhja e Kryetarit dhe Nënkryetarëve] të Kushtetutës së Republikës së Kosovës;
5. TË KONSTATOJË që Vendimi [Nr. 11-V-007] i 13 shtatorit 2026 i Kuvendit të Republikës së Kosovës për zgjedhjen e Qeverisë së Republikës së Kosovës nuk është në kundërshtim me nenin 95 [Zgjedhja e Qeverisë] të Kushtetutës së Republikës së Kosovës;
6. TË KONSTATOJË që afati gjashtëdhjetë (60) ditor për zgjedhjen e Presidentit të Republikës së Kosovës, sipas nënparagrafit 3, paragrafit 1 të nenit 82 [Shpërndarja e Kuvendit] të Kushtetutës së Republikës së Kosovës ka filluar më 8 gusht 2026 dhe përfundon më 6 tetor 2026;
7. TË REFUZOJË kërkesën për masë të përkohshme;
8. T’UA KUMTOJË këtë Aktgjykim palëve;
9. TË PUBLIKOJË këtë Aktgjykim në Gazetën Zyrtare të Republikës së Kosovës, në pajtim me paragrafin 4 të nenit 20 (Vendimet) të Ligjit nr. 03/L-121 për Gjykatën Kushtetuese të Republikës së Kosovës;
10. TË KONSTATOJË që ky Aktgjykim hyn në fuqi në ditën e publikimit të tij nga Gjykata Kushtetuese e Republikës së Kosovës.

Botë

Trump falënderon Kosovën për kontributin me trupa në Bordin e Paqes

Published

1 day ago

22 September, 2026

Redaksia

Presidenti amerikan, Donald Trump, ka falënderuar Kosovën për kontributin e saj në Bordin e Paqes – nismës së udhëheqësit amerikan për arritjen e paqes në botë.

“Dua të falënderoj ato shtete që kanë vendosur të kontribuojnë me trupa, e trajnime për të stabilizuar Gazën, përfshirë Indonezinë, Marokun, Shqipërinë, Kosovën, Kazakistanin, Egjiptin, Jordaninë dhe të tjerë”, tha Trump gjatë fjalimit para Asamblesë së Përgjithshme të Kombeve të Bashkuara.

Gjatë fjalimit të tij, Trump e përmendi Kosovën dhe Serbinë edhe në kontekstin e ndaljes së një lufte, duke deklaruar se i kërcënoi këto dy shtete se do të ndalte tregtinë e tyre me SHBA-në nëse do të shpërthente lufta.

Edhe në të kaluarën, Trump ka përmendur ndaljen e një përplasjeje të mundshëm mes Kosovës dhe Serbisë.

Ndryshe, Kosova është në mesin e pesë shteteve të para – së bashku me Indonezinë, Marokun, Kazakistanin dhe Shqipërinë – që janë zotuar për angazhim në misionin në Gazë, me qëllim ofrimin e sigurisë dhe mbikëqyrjen e armëpushimit në Rripin e Gazës.

Më 7 shtator, Kosova u bë formalisht pjesë e Forcës Ndërkombëtare Stabilizuese (ISF), pasi u nënshkrua marrëveshja formale për t’u bërë pjesë e kësaj force.

Marrëveshja, e nënshkruar nga komandanti i Forcës së Sigurisë së Kosovës (FSK), gjenerallejtënant Bashkim Jashari, dhe komandanti amerikan i ISF-së, gjeneralmajor Jasper Jeffers, formalizon përfshirjen e Kosovës në forcën e planifikuar.

“Ky zhvillim i rëndësishëm nënvizon përkushtimin e Kosovës ndaj misionit të ISF-së dhe mbështetjen e saj të vazhdueshme për planin 20-pikësh për Paqe të presidentit [Donald] Trump”, u tha në deklaratën e Bordit të Paqes.

Nënshkrimit të kësaj marrëveshjeje i ka paraprirë miratimi nga Kuvendi për dërgimin e FSK-së jashtë vendit dhe marrëveshjes për anëtarësim në Bordin e Paqes, si dhe autorizimit për dërgimin e tyre në Gazë nga Presidenca.

Ndërkaq, në prill një ekip i FSK-së shkoi në Rripin e Gazës për të bërë një vlerësim të vendit ku pritet të veprojnë trupat kosovare si pjesë e një force ndërkombëtare në territorin palestinez.

Forca Ndërkombëtare Stabilizuese buron nga një plan 20-pikësh i presidentit amerikan, Donald Trump, për t’i dhënë fund luftës së Izraelit në Gazë.

Trumpi krijoi Bord të Paqes për të mbikëqyrur planin e tij për t’i dhënë fund luftës së Izraelit në Gazë dhe për të rindërtuar territorin e shkatërruar.

Sipas planit, forca paqeruajtëse duhet të zhvendosen në Gazë për të siguruar zonat pas tërheqjes së forcave izraelite, si dhe t’i trajnojnë forca e reja policore palestineze dhe të mbështesin dërgimin e ndihmave atje.

Pjesa më e madhe e Gazës mbetet në rrënoja pas dy vjetësh luftë, e cila u shkaktua nga sulmet e udhëhequra nga Hamasi – grupi palestinez i shpallur organizatë terroriste nga SHBA-ja dhe BE-ja – më 7 tetor 2023.

Por, që nga njoftimi për një marrëveshje në fund të korrikut, përpjekjet për dërgimin e trupave kanë ngecur, pasi si Izraeli, ashtu edhe Hamasi nuk kanë pranuar t’i përmbushin kushtet që do ta mundësonin zbatimin e marrëveshjes.

| Radio Evropa e Lirë

Kosovë

Tre të lënduar në aksidentin mes trenit dhe veturës në Klinë

Published

2 days ago

22 September, 2026

Redaksia

Tre persona mbetën të lënduar si pasojë e një aksidenti mes trenit dhe veturës në fshatin Jagodë të Klinës.

Sipas njoftimit, rasti është raportuar mëngjesin e sotëm rreth orës 06:10.

Të lënduarit janë dërguar për trajtim në Spitalin Rajonal të Pejës dhe janë jashtë rrezikut për jetë.

Në vendngjarje hetimin është duke e kryer ekipi nga Autoritetit Kombëtar të Hetimit të Aksidenteve dhe Incidenteve Aeronautike, Hekurudhore dhe Detare (KHAIA).