Ferizaj

Pakënaqësi rreth ndarjes së çmimeve në Festivalin e Teatrove

Published

7 years ago

29 October, 2018

Vendi ku për 8 netë priti shumë mysafirë sot u kthye në gjendjen e mëparshme. Simbolet e Festivali të Teatrove u larguan nga teatri i qytetit deri në organizimin e vitit të ardhshëm.

Megjithatë, një ditë pas mbylljes së festivalit, ku edhe u ndanë çmimet për 7 shfaqjet konkurruese, dolën në pah pakënaqësitë e para për festivalin e sivjetmë.

“Sinqerisht mora guximin të flas, por të gjitha ato që i kam në shpirt dhe në mendje nuk mund t’i them, festivali është festë, por ky festival mbrëmë është shndërruar në një pakënaqësi si asnjëherë më parë, i kam vërejtur fytyrat e aktorëve, flas për jurinë, kam besuar tek profesori Fadil Hysaj e aktori Nexhat Xhokli mirëpo pse bëhen këto gabime me këtë bagazh që kanë këta dy, nuk po flas për Blertën se ajo është shumë e re në këtë aspekt, por për ata dy unë jam i befasuar”, tha aktori Dashnim Rexhepi.

“Jam me përvojën më të madhe në kulturë vetëm me krahasu të kaluarën me tashmë nuk jemi në rregull në asnjë lëmi, kam punu këtu 33 vite kur vinte publiku me pa pjesën teatrale shumica dilnin duke qajtur prej përshtypjeve të shfaqjes, ka pasur rregulla e organizim në nivel, nuk është shikuar paraja sikur tani, çmimet i kam shiku edhe pse nuk i kam përcjellur të gjitha shfaqjet, por juria ka shkuar politikisht jo sipas realitetit, për mua juria nuk ka qenë objektive, e kanë favorizuar vetëm një pjesë”, tha Osman Berisha.

Kurse, drejtori i Festivalit të Teatrove në Ferizaj Fatmir Hyseni, shprehet i kënaqur me mbarëvajtjen e festivalit, por edhe me ndarjen e çmimeve.

“Kanë konkurruar ato shfaqje ose produksione që kanë menduar se janë më të mirat dhe ne kemi pasur edhe një përzgjedhje dhe jemi munduar që të sjellim të gjitha zhanret e teatrit në festivalin e Ferizajt, në përgjithësi organizimi ka qenë shumë i mirë, në festival gjithmonë ka pakënaqësi në ndarjen e çmimeve mirëpo është vendim i jurisë e cila merr atë vendim dhe unë besoj se juria është shumë kompetente, ka qenë një profesor siç është Fadil Hysaj, Blerta Neziraj regjisore mjaftë e mirë dhe Nexhat Xhokli aktor me përvojë, do të thotë këta kanë marrë vendimet për çmimet e festivalit dhe ne si staf i Ferizajt nuk kemi bërë asnjë presion”, tha Hyseni.

Në edicionin e 48-të të Festivalit Ndërkombëtar të Teatrove, çmimet kryesore iu ndanë shfaqjes ”Gratë” realizuar nga teatri shqiptar i Shkupit.

Ferizaj

Ngritët aktakuza e parë për zgjedhjet e 28 dhjetorit

Published

2 weeks ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

3 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.