Ferizaj

Ferizaj organizon aktivitete në shënim të 50 vjetorit të demonstratave të vitit 1968

Published

7 years ago

22 November, 2018

Për të shënuar dhe përkujtuar të gjithë kontributdhënësit e demonstratave të vitit 1968, komuna e Ferizajt po organizon një aktivitet në kuadër të 50 vjetorit të kësaj ngjarje të rëndësishme me peshë historike. Njëri nga anëtarët e këshillit organizativ të këtij aktiviteti Nebih Jashari, tha se demonstratat e vitit 1968 kanë mbetur në memorien kolektive, si një ndër kthesat më të rëndësishme në historinë e re të Kosovës, duke shtuar se që nga ajo kohë, shumë gjenerata kanë bartur mbi supe idealin e këtyre demonstratave deri në lirinë dhe pavarësinë e vendit.

“Këshilli qendror organizativ ka organizuar disa manifestime në Prishtinë, kurse sipas mundësive edhe tek komunat ku janë zhvilluar atëherë këto demonstrata më 27 nëntor të vitit 1968, kemi paraparë të organizojmë tubime, manifestime të ndryshme, shpërndarje të mirënjohjeve. Kështu shënimi i 50 vjetorit të kësaj ngjarje në Ferizaj do të bëhet nën patronatin e kryetarit të komunës, po ashtu kemi përkrahje edhe nga niveli qendror pasi që do të bëhet edhe promovimi i një libri për demonstratat e 68-tës për tërë Kosovën dhe në trojet e tjera shqiptare, se përpos Ferizajt, Pejës, Podujevës, dhe Prishtinës ato janë organizuar në Tetovë, Ulqin e Preshevë“, tha Jashari.

Në demonstratat e vjeshtës së vitit 1968, për herë të parë pas Luftës së Dytë Botërore, shqiptarët hodhën kërkesat për flamurin e lirë kombëtar, Kosovën Republikë, për Kushtetutë dhe vetëvendosje në viset shqiptare nën pushtimin jugosllav, duke u përballur me regjimin e rreptë policor në trojet e tyre në Kosovë, Maqedoni dhe Mal të Zi. Prandaj, për pjesëmarrësin e këtyre demonstratave Nebih Jashari, ato protesta shënuan një ngjarje të rëndësishme historike të përpjekjes së rinisë dhe të tërë popullit shqiptar për liri, pavarësi e bashkim kombëtar.

“Po deri në vitin 1968 shqiptarët janë frikësuar nga pushteti dhe me kundërshtu pushtetin ka qenë absurde për atë kohë, prandaj atëherë ishte hera e parë kur të rinjtë dolën në këto demonstrata dhe kërkesa e nxënësve të shkollave të mesme dhe rinisë studentore ku ata me këmbëngulje vendosën që të organizojnë këto demonstrata për t’i treguar botës që nuk janë duke jetuar në ato iluzione që mendonin në botë, që shqiptarët në Jugosllavi dhe të tjerët jetonin në mënyrë të barabartë, prandaj me këto demonstrata u bë një kthesë e madhe ku vazhdoi më pas deri tek kryengritja e armatosur e UÇK-së“, tha Jashari.

Sipas shkrimeve të publikuara për demonstratat e vitit 1968, kërkesat dhe parullat kryesore të demonstruesve ishin “Duam Republikë”, “Duam vetëvendosje deri në shkëputje”, “Duam Kushtetutë”, “Duam Universitet”, “Poshtë politika kolonialiste ndaj Kosovës”, “Për të drejtat tona edhe gjak do të derdhim”, etj. Pas këtyre demonstratave pati zhvillime të rëndësishme si: u shpejtua themelimi i Universitetit të Kosovës në Prishtinë, u hapën Institutet Shkencore, u hap Akademia, u krijua një hapësirë më e gjerë politike dhe një mundësi institucionale për veprim, si dhe u rrit veprimtaria botuese, kulturore, arsimore, shkencore etj.

Per ta kujtuar këtë ngjarje historike, komuna e Ferizajt në bashkëpunim me Shoqatën e të Burgosurve Politik të Kosovës, fton të gjithë qytetarët e Ferizajt dhe më gjerë të marrin pjesë në aktivitetet që do të organizohen më datën 26 nëntor .

Ferizaj

Premiera e dramës“Kush është Silvia?” shfaqet të premten në Teatrin e Gjilanit

Published

3 days ago

15 May, 2026

Redaksia

Shfaqja teatrore “Kush është Silvia?” do të ketë premierën këtë të premte, më 15 maj 2026, nga ora 20:00 në Teatrin e Qytetit në Gjilan.

Shfaqja është realizuar sipas dramës “The Goat, or Who is Sylvia?” të autorit Edward Albee,ndërsa përshtatjen dhe dramaturgjinë e ka bërë Fjona Hyseni.

Regjinë e shfaqjes e ka bërë regjisori ferizajas Fatmir Hyseni kurse në role paraqiten Dardane Mehmeti, Kushtrim Qerimi, Xhelal Haliti dhe Valentin Mehmeti.

Organizatorët kanë njoftuar se, përveç premierës së sotme, publiku do të ketë mundësi ta ndjekë edhe reprizën e shfaqjes të shtunën, nga ora 20:00.

Projekti është mbështetur nga Ministria e Kulturës, Rinisë dhe Sportit, ndërsa në realizim kanë ndihmuar edhe Teatri i Qytetit në Gjilan dhe Teatri Adriana i Ferizajt.

Ferizaj

Një muaj paraburgim të dyshuarve për mashtrim me kriptovaluta në Ferizaj

Published

1 week ago

08 May, 2026

Redaksia

Gjykata Themelore në Ferizaj ka caktuar masën prej një muaj paraburgim kundër të pandehurve A.L. dhe R.J. që dyshohen për veprën penale të mashtrimit

Në njoftimin e gjykatës bëhet e ditur se vendimi për masën e paraburgimit u morr gjyqtarja e procedurës paraprake në Departamentin e Përgjithshëm – Divizioni Penal, Alba Makolli pas mbajtjes së seancës dëgjimore dhe analizimit të shkresave të lëndës.

“Ekziston dyshimi i bazuar se me datë 17 prill 2026, në një rrugë në Ferizaj, të pandehurit, me dashje dhe në bashkëveprim së bashku edhe me të pandehurin V.N., i cili gjendet në arrati, me qëllim të përfitimit të kundërligjshëm pasuror për vete, me anë të paraqitjes së rreme të fakteve dhe duke përdor emra të rreme (A. dhe B.), i vënë në lajthim të dëmtuarit E.F., A.F., dhe Rr.K., duke u paraqitur se posedojnë kriptovaluta të llojit USDT, dhe se do t’ua transferonin përmes portofolit digjital “wallet”, ashtu që për realizmin e kësaj skeme fillimisht sigurojnë një lokal me qira dhe caktojnë takim me të dëmtuarit, dhe në lokal arrijnë që të njëjtëve t’ua marrin shumën e të hollave prej 12,000.00 Euro, të cilat të holla sipas planit paraprak, i fusin në një çantë me ngjyrë të gjelbert, i vendosin në një dollap brenda lokalit, në të cilin paraprakisht kishin hapur një vrimë nga pjesa e pasme, përmes së cilës i marrin të hollat pa dijeninë e të dëmtuarve, dhe më pas largohen në drejtim të panjohur, me ç’rast pas veprimeve operative arrihet të zbulohet se të pandehurit përsëri do të vepronin skemën e njëjtë në një rrugë në Kaçanik, duke marr një lokal me qera dhe duke caktuar takimin në atë lokal, ashtu që pas reagimit të hetuesve policor arrihen që të njëjtit të arrestohen në vend ngjarje, ndërsa i pandehuri V.N., arrin të arratiset”, thuhet mes tjerash në njoftimim e gjykatës.

Ferizaj

Vdekja e foshnjës në Ferizaj: Rasti po hetohet si “vrasje e foshnjës gjatë lindjes”

Published

2 weeks ago

07 May, 2026

Redaksia

Prokuroria Themelore në Ferizaj ka njoftuar se kanë nisur hetimet për rastin e cilësuar si “vrasje e foshnjës gjatë lindjes” që ka ndodhur të martën mbrëma, kur një paciente kishte lindur foshnjën e saj në tualetin e Emergjencës në Ferizaj.

Spitali i Ferizajt, përmes një komunikate ka njoftuar se pacientja është paraqitur në spital me ankesa për obstipacion (kapsllëk) dhe, në një moment, ka hyrë në tualet duke e mbyllur derën.

“Pas insistimit dhe presionit nga stafi mjekësor, të cilët kishin dëgjuar zërin e një foshnjeje, dera është hapur. Nëna kishte prerë kordonin umbilikal të foshnjës dhe e kishte hedhur atë në koshin e mbeturinave, në gjendje të rëndë dhe hipotermike.

Menjëherë janë ndërmarrë masat emergjente për trajtimin e nënës dhe foshnjës, të cilat janë transferuar në repartet e Gjinekologjisë dhe Neonatologjisë. Ekipi multidisiplinar, me përfshirjen edhe të anesteziologut, ka filluar menjëherë të gjitha procedurat reanimatore.

Sapo është konstatuar rasti, stafi shëndetësor ka njoftuar organet kompetente, përkatësisht Policinë e Kosovës.

Foshnja është pranuar në gjendje shumë të rëndë shëndetësore dhe janë ndërmarrë të gjitha masat e nevojshme reanimatore nga ekipi multidisiplinar i spitalit. Pavarësisht përpjekjeve maksimale dhe trajtimit intensiv nga personeli mjekësor, foshnja ka ndërruar jetë”, thuhet në njoftim.

Më tej, Spitali i Përgjithshëm i Ferizajt bëri të ditur se është duke bashkëpunuar plotësisht me organet e drejtësisë dhe institucionet kompetente për zbardhjen e plotë të rrethanave të këtij rasti.

Në raportin e Policisë thuhet se “Me vendim të prokurorit, foshnja është dërguar në Institutin e Mjekësisë Ligjore në Prishtinë për obduksion, për procedura të mëtejshme hetimore, derisa e dyshuara ndodhet në spitalin e Gjinekologjisë, Ferizaj, për shkak të gjendjes së saj shëndetësore.”