Ferizaj

Hajnat grabisin bizneset prodhuese në Babush

Published

6 years ago

05 November, 2019

Sot në orët e hershme të mëngjesit janë bastisur disa biznese private prodhuese të Ferizajt. Ndër kompanitë që ranë pre e vjedhjeve janë “Euro Park”, “Vëllezërit e Bashkuar” dhe “Cadi Cleaning” në Babush të Ferizajt. Për këto vjedhje tregon vet pronari i “Euro Park”, Afrim Breznica.

“Në orën katër ka thirrë alarmi, domethënë është lëshuar alarmi i fabrikës dhe më ka lajmëruar në telefon, e kam mbyllur telefonin dhe kam hyrë live në kamera me shiku se çka është duke ndodhur dhe kam parë në lëvizje njerëzit dhe kam ardhë, por nuk kam hy në fabrikë, e kam vëzhguar terrenin përreth mos po i shoh në rrugë apo diçka dhe e kam thirrë policinë, kanë ardhë, e kanë hapur rastin pastaj kanë ardhë edhe hetuesit. Kanë dëmtuar, kanë lënë baltë, kanë marrë një shumë parash, por kjo është ajo që neve bizneseve nuk po na lë të sigurt të veprojmë, punojmë, nuk kemi siguri në punë. Është fabrikë, çështje materiale, po çka nëse hynë edhe në shtëpi dhe t’i frikëson fëmijët, aty e kemi problemin si popull. Tani e lë në dorën e policisë, ne do të mundohemi t’iu ndihmojmë, kamerat i kemi të parës dorë, me zoom, të gjitha bizneset”, tha Afrim Breznica.

Ndërsa, zëdhënësi i Policisë për rajonin e Ferizajt, Agim Gashi, tha se hetimet janë duke u kryer me intensitet.

“Sot në mëngjes janë raportuar tri raste të vjedhjeve në fshatin Babush ku janë përqëndruar në disa nga bizneset e Ferizajt. Rasti i parë është raportuar se personat e dyshuar, të panjohur deri më tani, kanë hyrë me forcë në këto objekte biznesore dhe në objektin e parë kanë marrë 99 euro para të gatshme, në rastin e dytë kanë marrë 108 euro dhe në rastin e tretë kanë marrë 17 pako cigare të ndryshme në vlerë 250 euro dhe të holla 150 euro, ndërsa në rastin e katërt është raportuar si dëmtim prone, vetëm dera është dëmtuar, por nuk kemi informata nga pronari se është vjedhur diçka. Policia menjëherë ka dalë në vendin e ngjarjes, gjithashtu me mjekët ligjor kanë marrë gjurmët të cilat janë gjetur aty dhe hetuesit janë angazhuar maksimalisht që t’i identifikojnë personat e dyshuar dhe të paraqiten para drejtësisë”, theksoi Agim Gashi.

Kohëve të fundit, në komunën e Ferizajt janë shpeshtuar rastet e vjedhjeve.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

1 week ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim