Ferizaj

Labi dhuron 200 pako për familjet nevojtare të Ferizajt

Published

6 years ago

08 May, 2020

Fondacioni humanitar “Labinot Tahiri” i udhëhequr nga ish-deputeti i Kuvendit të Kosovēs dhe këngëtari Labinot Tahiri, ka sjellë sot ndihma të reja për komunën e Ferizajt.
Tahiri ia dorëzoi komunës së Ferizajt mbi 200 pako ushqimore, higjienike dhe me veshmbathje të cilat komuna do të angazhohet që t’i përcjellë tek familjet në nevojë.

Tahiri tha se që nga përhapja e koronavirusit, fondacioni i tij ka ndihmuar familje brenda dhe jashtë Kosovës.

“Ferizaj njihet si vend human. Nuk jam i vetmi dhe në çfarëdo rrethane mos të zbehet humanizmi, pasi ra pandemia dhe u pa se sa ka nevojë populli ynë për ndihma. Unë nuk jam ndalë jo vetëm në Kosovë, por edhe jashtë kufijve. Unë jam shumë i kënaqur për punën që është bërë, deri tash i kemi përfshirë 30 komuna, ndërsa në Ferizaj shuma është 17 mijë e 600 euro që janë sjellur nga donatorë të ndryshëm”, tha Tahiri.

Kësaj here ndihmat nga Tahiri i pranoi vet kryetari i komunës së Ferizajt Agim Aliu, i cili falënderoi Tahirin për solidaritetin e treguar në këtë kohë pandemie dhe mbështetjen që po u jep familjeve skamnore.

“Ferizaj ka një shpirt të madh dhe njerëz të mëdhenj dhe sot është një ditë kur duhet të falenderojmë këta njerëz me shprit të madh. Ferizaj ka treguar solidaritet edhe jashtë kufijve të Ferizajt dhe këtë në mënyrën më të mirë e ka bërë Labi duke shpërndarë atje ku ka pasur nevojë. Labi nuk e meriton vetëm falënderimin tim, por edhe të shumë kryetarëve të komunave të tjera. Unë në emër të qytetarëve falënderoj Labin në emrin tim dhe në emër të të gjithë qytetarëve”, tha Aliu.

Fondacioni humanitar “Labinot Tahiri” edhe javë më parë ka dhuruar pako ushimore për shoqatat “Hendifer” dhe “Handikos”, por edhe në fillim të përhapjes së koronavirusit ai ka shpërndarë maska mbrojtëse për qytetarë.

Ferizaj

Ngritët aktakuza e parë për zgjedhjet e 28 dhjetorit

Published

4 hours ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 days ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

1 week ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.