Kuvendi Komunal i Ferizajt sot ka mbajtur seancë të jashtëzakonshme ku pikë e vetme e rendit të ditës ishte raportimi për menaxhimin e situatës me pandeminë Covid-19 në këtë komunë. Seanca e Kuvendit Komunal të Ferizaj u zhvillua online.

Drejtori i Shëndetësisë Bekim Ademi tha se këta dy muaj ekzekutivi i Ferizajt mori vendime të rëndësishme në parandalimin e përhapjes së koronavirusit.

“Ndihmuam me mbi 500 pako familjet pakicë, ku u munduam që në këtë kohë këtij komuniteti mos t’u mungoj asgjë, ndihmuam nënat vetëushqyese, ndihmuam organizatat joqeveritare siç janë shoqatat “Handifer”, “Pema”, shoqatën e të verbërve. Ne si shtab kërkuam nga policia që të shtohen kontrollet. Urdhëruam bizneset që të pajisen me masa mbrojtëse, mos të lënë qytetarët të futen pa maska e dorëza, poashtu bëmë edhe dezinfektimin e thuajse gjitha hapësirave publike. Mbyllëm parqet, tregjet, të gjitha këto për të parandaluar “, tha Ademi.

Ndërsa, asamblistët patën pyetje dhe kërkesa të ndryshme, të cilave iu përgjigj drejtori i Shëndetësisë Bekim Ademi.

“Kërkoj nga kryetari Aliu që të jetë në mbështetje të kompanive publike, gjendja tashmë dihet, nuk kanë pasur inkasime këta muaj, punëtorët dy paga nuk i kanë marrë, bëhet fjalë për kompaninë “Pastërtia”, “Ambienti” dhe “Stacion i Autobusëve”, tha Yllkë Neziri, nga LDK-ja.

“A ka menduar komuna e Ferizajt të ndaj ndonjë buxhet për punëtorët shëndetësor të punësuar me “Caritas”, qeveria ka ndihmuar mjekët, por nuk janë përfshirë edhe këta punëtorë të punësuar me “Caritas”, shumë nga ta kanë qenë në krye të detyrës”, tha Shqipe Jashari, LVV.

“Kemi parë që nëpër markete nuk janë respektuar masat, nuk janë mbajtur maska, dorëza e distanca, të gjitha këto janë masë preventive për parandalim të përhapjes, nëse qytetarët kanë mungesë të tyre atëherë komuna t’ua siguroj ato, por me rëndësi është që ata mos të hynë në markete pa maska”, tha Ali Halimi nga Nisma Socialdemokrate.

“Tek ndihmat kam marrë disa ankesa nga komunitetet pakicë, ku përfaqësues të tyre nuk i kanë përfshirë në listë për ndihma, prandaj kërkoj që të bëhet një kontrollë më e madhe se si shpërndahen ato pako pasi ato janë për të gjithë”, tha Lulzim Abazi, PDK.

“Kemi parë që një pjesë e zyrtarëve komunal kanë qenë shumë të angazhuar, por ka pasur edhe që nuk janë angazhuar, prandaj për atë personel që ka qenë i angazhuar të paguhen me ndonjë shumë simbolike “, tha Nehat Mustafa, asamblist i pavarur.

“A është ndihmuar komuna e Ferizajt nga niveli qëndror, ose si është ndihmuar gjatë kësaj kohe”, tha Arian Imeri, nga PDK-ja.

“Po shpresojmë që do të kryhen pagat e punëtorëve shëndetësor, “Caritas”-i ka dërguar listat në qeveri dhe jemi në pritje. Ndërsa që t’i pajisim qytetarët me maska kjo është paksa e vështirë, pasi nuk ka pasur maska as për punëtorë shëndetësor e le më për qytetarë. Ndërsa për ndihma që nuk kanë marrë komuniteti pakicë, ne kemi marrur listat nga qendra sociale. Në fillim ndihmat nga niveli qëndror kanë qenë të pakta, në ndërkohë kanë filluar të vijnë ndihma, por jo në sasinë që ne e kemi kërkuar, por ne ia kemi dalur me ndihmë të donatorëve të bëjmë zgjidhje,”,tha Ademi.

Kjo ishte seanca e dytë e jashtëzakonshme që Kuvendi Komunal i Ferizajt mbajti që kur është përhapur koronavirusi në vendin tonë.