Në seancën e Kuvendit Komunal të Ferizajt u paraqit raporti i punës së pushtetit lokal për vitin 2019. Kryetari i Komunës së Ferizajt Agim Aliu, duke paraqitur këtë raport tha se në vitin e kaluar bënë shumë punë në të gjithë sektorët.

“Ky raport që sot keni para vetës në të gjitha faqet që përshkon gjen vulën e suksesit, por edhe sfidën e pashmangshme të qytetit që morëm përsipër ta drejtojmë me mandatin e qytetarëve, t’ia sjellim më të mirën, më të përdorshmen, më të lehtën përditshmëri, më funksionalen e më të jetueshmen zonë ku banon”, tha Aliu.

E, në anën tjetër opozita i numëroi dështimet, keqmenaxhimet e parregullsitë të cilat ata pretenduan se janë bërë në vitin 2019 nga ekzekutivi i Ferizajt, derisa kuvendarët pozitarë thanë se performancë më të mirë nuk ka pasur asnjë administratë komunale.

“Të dhënat flasin që nga fillimet ku pasqyrohet zyra e prokurimit për të cilën ata që e njohin këtë çështje shihet që në këtë pasqyrim mungojnë disa nga projektet për të cilat u është dhënë një pompozitet e të cilat nuk gjenden as si të realizuara e as të sqaruara se pse nuk janë realizuar dhe pse kanë dështuar ato. Këtu kemi të bëjmë me projektin për vlerësimin e ofertave për digjitalizimin e arkivit dhe e cila ka pas një vlerë 200 mijë euro dhe nuk dihet ku janë ato mjete. Ka një numër të madhë të kontratave nën 1 mijë euro për të njëjtën veprimtari dhe nuk janë të paraqitura dhe nuk janë në oferta. Nuk tregohet se çka është rregulluar në objekte shkollore kur dihet se tani e kemi kompaninë ”Shtëpiaku” që merret me rregullime dhe për të njëjtat punë janë kontraktu kompani të tjera. 800 mijë euro janë për ”Caritasin” dhe janë shfrytëzu, ndërsa ne kemi informacione se punëtorët nuk janë paguar ndërsa mjetet këtu figurojnë. Nuk po flas për kontratat në vepër të cilat janë aq të mëdha, vetëm në muajin mars komuna ka angazhu punëtorë me kontrata mbi vepër”,tha Muharrem Svarqa.

“Grante, e subvencione, e përkrahje të ndryshme ka në shumë drejtori. Pra, në përgjithësi raporti i vitit 2019 paraqet një performancë të mirë të këtij ekzekutivi, performancë e cila reflektoi edhe në situatën që u gjendem në këtë vit, një administratë funksionale e përgjegjshme dhe në gatishmëri për çdo nevojë që iu paraqitet situata, pra nuk është sic po thoni ju dhe nuk po mund të besoj që si keni lexuar të njëjtat që i lexova edhe unë në këtë raport “, tha Arian Imeri nga PDK-ja

Ndërsa, kryetari i komunës Agim Aliu, tha se janë munduar të bëjnë një raport gjithpërfshirës.

“Përgjigjet për çështjen e raportit të punës që moti i ka dhënë Nasradini me punën e shtëpisë, ne jemi munduar me kopju Aristotelin me hy kah mesi dhe me bë këtë që e kemi bërë, nuk janë përfshirë të gjitha punët më të mira, nuk është përfshirë edhe ndonjë dështim, por jemi munduar me bë më të mirën, ne kemi bërë shumë punë të mira dhe nuk i kemi futur”, tha Aliu.

Përveç raportit të punës për vitin 2019, në seancën e sotme u raportua edhe për punën e ekzekutivit për muajin janar-mars 2020, si dhe me shumicë votash u miratua porpozim vendimi për shpalljen e interesit të përgjithshëm të një pjese të një ngastre kadastrale në Talinoc të Muhaxherëve që do të shërbej për ndërtimin e shkollës fillore për këtë fshat.