Ferizaj

Taksistët ankohen për mospërfshirje në Pakon Emergjente Fiskale

Published

6 years ago

09 June, 2020

Shoferët e taksive në Ferizaj kanë shprehur pakënaqësi për mospërfshirje në Pakon Emërgjente Fiskale të miratuar nga qeveria Kurti. Edhe pse kanë aplikuar që të jenë përfitues të fondeve të kësaj pakoje, ata thonë se ende nuk e dinë se a do të ndodhë një gjë e tillë, meqë në xhirollogaritë bankare nuk iu ka dalë asnjë cent.

“Që 5 vite punoj me taksi, jemi 5 anëtarë me taksi e mbaj familjen, me të vërtet jemi të zhgënjyer, paguajmë rrymën, ujin e me qëndru në shtëpi, nuk e di çfarë të themi edhe ne jemi të këtij vendi”, tha Sabri Jaha, taksist.

“Afër 10 vite punoj taksist, 2 muaj s’kam punu hiç edhe u dashtë me na dhënë diçka por jo. Kemi aplikuar, por nuk na kanë dalë ende, jemi duke prit, por po duket që s’ka asgjë për neve, na kanë thënë me qëndru në shtëpi, ne me këtë mbesim gjallë dhe atë mezi që bëjmë idare, shpenzime kemi, kredi kam hy me regjistru kerrin”, tha Basri Qerimi, taksist.

“Ne kemi aplikuar për pakon fiskale si tatimpagues që jemi, por ne jemi të anashkaluar nga kjo pako dhe është një padrejtësi që na është bërë neve. Ne me vendim të kryetarit të komunës e kemi ndalë punën dhe e kemi respektuar atë vendim dhe nuk kemi punuar, ne kërkojmë që të sqarohet çështja jonë se edhe ne kemi aplikuar për këtë pako fiskale”, tha Mërgim Sadriu.

Këta shoferë të taksive thonë se përkundër që kanë filluar punën, nuk janë duke pasur të hyra.

“Që tri ditë kemi filluar hala 2 euro nuk i kam marrë”, tha Jaha.

“Punë nuk është duke pas hiç, me thënë të drejtën me 2-3 euro tërë ditën jemi duke e kaluar, nuk ka punë”,tha Qerimi.

Shoferët e taksive në Ferizaj kërkuan që nëse nuk ndihmohen përmes Pakos Fiskale të qeverisë, atyre t’iu bëjë një zgjidhje qeveria lokale.

Ferizaj

Bëhet i ditur identiteti i viktimave të aksidentit tragjik në Gjermani

Published

2 days ago

07 August, 2026

Redaksia

Në aksidentin tragjik të komunikacionit, që ndodhi ditë më parë në afërsi të Nittendorfit, në rajonin e Regensburgut në Bavari, humbën jetën Tahir Tahiri, 61 vjeç, Gentian Tahiri, 34 vjeç dhe Laurent Aliu, 16 vjeç, që të tre nga lagjja Nuhaj e fshatit Komogllavë të Ferizajt.

Identiteti i të ndjerëve u bë i ditur në njoftimin mortor të publikuar në faqen e fshatit Komogllavë, ku më tej thuhet se data dhe koha e ceremonisë së varrimit do të bëhet e ditur sapo të merren vendimet përkatëse.

Të ndjerët humbën jetën teksa po ktheheshin nga Kosova drejt vendit ku jetonin në Gjermani.

Ferizaj

Arrestohen tre persona të dyshuar për trafikim të narkotikëve në Ferizaj

Published

2 days ago

07 August, 2026

Redaksia

Policia e Kosovës ka ndaluar tre persona në Ferizaj, nën dyshimin për blerjen, posedimin, shpërndarjen dhe shitjen e paautorizuar të narkotikëve, si dhe mbajtjen në pronësi të paautorizuar të armës.

Të dyshuarit u arrestuan të enjten, rreth orës 18:30, në Ferizaj derisa gjatë kontrollit u janë gjetur dhe konfiskuar substanca të dyshuara narkotike, përfshirë 485.27 gramë marihuanë, 181.7 gramë hashash dhe 2.1 gramë kokainë, para të gatshme, një pistoletë me gaz me një karikator dhe tri boca gazi.

Me vendim të prokurorit të shtetit, tre të dyshuarit, pas intervistimit nga Policia, janë dërguar në mbajtje për 48 orë.

Ferizaj 06.08.2026 – 18:30.

“Janë ndaluar tre të dyshuar meshkuj kosovarë, gjatë kontrollimit tek personat e dyshuar janë gjetur dhe konfiskuar: substancë e llojit Marihuanë rreth 485.27 gramë, substancë e dyshuar e llojit Hashash e gjetur në dy pjesë me peshë 181.7 gramë , substancë e dyshuar e llojit Kokainë 2.1 gramë, para të gatshme. një pistoletë me gaz me një karikator dhe tri boca gazi. Paketime të zbrazëta të qeseve të najlonit, dy peshore njëra digjitale dhe tjetra me tërheqje, dy mulli (grindera) për bluarje, tetë telefona celularë të llojeve të ndryshme, një DVR i kamerave. Me vendim të Prokurorit tre personat e dyshuar pas intervistimit dërgohen në mbajtje për 48 orë”, bëri të ditur Policia në raportin 24 orësh.

Ferizaj

Qytetarëve u vijnë mesazhe mashtruese – Policia apelon për kujdes

Published

4 days ago

05 August, 2026

Redaksia

Drejtoria Rajonale e Policisë në Ferizaj ka njoftuar se ditëve të fundit, disa qytetarëve u kanë ardhur mesazhe (SMS) mashtruese kinse të dërguara në emër të Policisë së Kosovës duke pretenduar se qytetarët kanë gjoba trafiku dhe duke i ftuar ata të klikojnë në lidhje (linke) për të kryer pagesën e tyre.

Sipas Policisë, këto mesazhe janë të rreme dhe nuk janë dërguar nga institucionet e rendit dhe ligjit, pra janë mesazhe të dërguara si tentativë për mashtrim.

Policia paralajmëron qytetarët që nëse pranojnë ndonjë e-mail apo mesazh të dyshimtë, të veprojnë si në vijim:

Mos klikoni në linkun e dyshimtë;

Mos i jepni të dhëna personale apo bankare;

Mos kryeni pagesa përmes lidhjeve të dërguara me SMS;

Raportojeni rastin në stacionin më të afërt policor;

Kontaktoni bankën tuaj nëse keni ndarë të dhëna personale ose bankare;

Fshijeni menjëherë mesazhin e dyshimtë;

Qytetarët mund të raportojnë raste të tilla përmes aplikacionit “Lajmëro Policinë” ose duke telefonuar në numrin 192.

Drejtoria Rajonale e Policisë në Ferizaj apelon për kujdes të shtuar ndaj mashtrimeve online dhe bashkëpunim me policinë për parandalimin e tyre.