Ferizaj

Vetizolohen drejtorët e drejtorive komunale në Ferizaj

Published

6 years ago

29 June, 2020

Në komunën e Ferizajt aktualisht janë 21 raste aktive me koronavirus. Në mesin e tyre gjatë ditës së djeshme është konfirmuar edhe drejtori i Infrastrukturës komunale, Arbër Bytyqi, i cili tashmë është në vetizolim.

Zëdhënësi i komunës së Ferizajt Albion Sherifi, thotë se përveç Bytyqit, në vetizolim ndodhen edhe drejtorë të tjerë të drejtorive, si dhe zyrtarë të komunës me të cilët drejtori i Infrastrukturës ka pasur kontakt.

“Ditëve të fundit kemi pasur shtim të rasteve aktive të konfirmuara me COVID-19. Kemi pasur edhe drejtorin e Infrastrukurës të konfirmuar pozitiv dhe si masë siguruese dhe në bazë të rekomandimeve stafi politik, përkatësisht drejtorët e drejtorive dhe stafet e tjera që kanë qenë të afërta në kontakt me drejtorin e Infrastrukturës, janë dërguar në vetizolim, priten këto ditë testimet që të dimë gjendjen me të infektuarit potencial”, tha Sherifi.

Vetizolimi i drejtorëve për dy javë, Sherifi thotë se nuk do ta pengojë punën e ekzekutivit.

“Do të ketë kufizim të aktiviteteve, por jo ndërprerje të aktiviteteve, drejtorët e drejtorive kanë stafet e tyre brenda drejtorive, do të punohet edhe online në mënyrë që procesi i punës të mos ndërpritet, kështu që nuk shoh që do të ketë ndonjë boshllëk. Të gjitha obligimet tona do të kryhen me kohë”, tha Sherifi.

Të prekurit me COVID-19 nga kjo komunë janë duke u trajtuar në Spitalin Rajonal të Ferizajt. Drejtori i këtij spitali Jeton Zeqiri, thotë se për momentin në Spitalin e Ferizajt është i shtrirë vetëm një pacient, i cili po trajtohet me oksigjeno-terapi.

“Ne si menaxhment i Spitalit të Përgjithshëm kemi bërë zhvendosjen e Repartit të Pediatrisë për arsye se aspekti fizik i kësaj hapësire na mundëson të ketë më pak qasje me repartet e tjera. Ne në 24 orëshin e fundit kemi pasur 5 raste të dyshuara dhe sot në mëngjes janë testuar, të tjerët janë liruar për shkak të gjendjes stabile për vetizolim, kurse një rast është i hospitalizuar i cili ka nevojë për suport oksigjeni, ndërsa dy rastet e tjera që janë të konfirmuara janë në përmirësim e sipër, vijnë e marrin terapinë dhe lirohen në shtëpi”, tha Zeqiri.

I vetmi problem që kanë për të menaxhuar situatën, Zeqiri thotë se është mungesa e infektologëve dhe pulmulogëve.

“Kemi numër të vogël të specialistëve, konkretisht infektologëve dhe pulmulogëve, por jemi munduar me rregullu këtë çështje ku infektologun dhe pulmulogun e kemi lënë çdo ditë prej orës 7:00 deri në orën 15:00 si mbikqyrës, ndërsa pjesa tjetër e kujdestarive mbulohet nga specialistë të lëmive të tjera përkatëse. Me oksigjen furnizohemi nga SSHUK-ja, kemi sasi të mjaftueshme, nuk kemi problem me elemente të tjera përcjellëse medikamentoze, por nëse rritet numri dhe që unë besoj se do të rritet, do ta aktivizojmë planin B që është funksionalizimi i Institutit Kombëtar të Shëndetit Publik te zona e pishave dhe besoj që bashkërisht me komunën dhe ministrinë do ta funksionalizojmë me numër të shtretërve dhe pajisjeve të tjera përcjellëse”, tha Zeqiri.

Në nivel vendi numri i të infektuarve ka shkuar në 2677, ndërsa numri i të vdekurve në 49.

Ferizaj

Aktakuzë ndaj tre të dyshuarve për mashtrim me kriptovaluta në Ferizaj

Published

2 days ago

22 May, 2026

Redaksia

Prokuroria Themelore në Ferizaj, Departamenti i Përgjithshëm, ka ngritur aktakuzë kundër të pandehurve me inicialet: A.L., R.J. dhe V.N., për shkak të dyshimit në bashkëkryerje kanë kryer veprën penale”Mashtrimi” sipas Kodit Penal të Republikës së Kosovës

Të pandehurit dyshohen se më 17 Prill 2026, në Ferizaj, rruga, “Cen Dugolli” me dashje dhe në bashkëveprim, me anë të paraqitjes së rreme të fakteve dhe duke përdor emra të rreme, i vënë në lajthitje të dëmtuarit E.F., A.F., dhe Rr.K, duke ua marrë 12,000 euro si kundërpagesë për kriptovaluta të llojit USDT të cilat do t’ua transferonin përmes portofolit digjital “wallet”.

Pasi të dëmtuarve ua marrin shumën prej 12 mijë eurove, të pandehurit i fusin paratë në një çantë të gjelbër dhe i vendosin në një dollap brenda lokalit të cilin e kishin marrë me qira. Ata kishin hapur një vrimë në pjesën e pasme të dollapit, nga ku i morën paratë pa u vërejtur dhe u larguan në drejtim të panjohur.

Pas hetimeve, u zbulua se të dyshuarit e njëjtë, duke përdorur të njëjtën skemë, kishin organizuar një transaksion fiktiv në rrugën “Ismail Reka” në Kaçanik. Edhe aty kishin siguruar një lokal me qira për t’u takuar me persona të interesuar, të cilëve u kishin ofruar transferimin e USDT-ve në vlerë prej 50 mijë Euro.

Aktakuza ngarkon gjithashtu dy nga të pandehurit, A.L. dhe R.J., për një rast të ndodhur më 18 Gusht 2024 në rrugën “Agim Prodani” në Ferizaj ku të dëmtuarit G.A. ia kishin marrë me mashtrim 2 mijë euro duke i premtuar transferimin e kriptovalutave në portofolin e tij. Me të marrë paratë nga viktima, dy të pandehurit largohen me vrap në drejtim të panjohur.

Për të gjitha këto veprime, tre të pandehurit akuzohen për veprën penale “Mashtrimi” nga neni 323 paragrafi 1, lidhur me nenin 31 të Kodit Penal të Republikës së Kosovës.

“Prokurori i çështjes, me rastin e ngritjes së aktakuzës, i ka propozuar Gjykatës që pas mbajtjes së shqyrtimit gjyqësor, administrimit të provave dhe vlerësimit të tyre, të pandehurit e lartëcekur të shpallen fajtor për veprën penale për të cilën akuzohen dhe të dënohen sipas ligjit”, thuhet mes tjerash në njoftimin e Prokurorisë Themelore të Ferizajt.

Ferizaj

Punëtori që ra nga kulmi i një objekti në Babush u dërgua në QKUK

Published

3 days ago

21 May, 2026

Redaksia

Një 27-vjeçar ka pësuar lëndime të rënda trupore pasi ka rënë nga kulmi i një objekti në fshatin Babush, në magjistralen Ferizaj-Prishtinë.

Në raportin 24 orësh të policisë bëhet e ditur se rasti u raportua të mërkurën, 20.05.2026 rreth orës 15:00.

“Është raportuar se viktima )mashkull kosovar) derisa kishte qenë duke punuar në kulmin e një objekti ishte rrëzuar dhe kishte pësuar lëndime trupore. Viktima fillimisht është dërguar në emergjencën e Ferizajt, por për shkak të gjendjes së rëndë shëndetësore është dërguar në QKUK” thuhet në njoftim.

Në vendin e ngjarjes kanë dalë njësitë relevante të policisë dhe inspektorët e punës derisa rasti është cilësuar si “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.

Ferizaj

Policia godet një rrjet të kontrabandës së kafshëve në Ferizaj

Published

4 days ago

20 May, 2026

Redaksia

Policia kufitare ka realizuar një operacion në fshatin Rakaj të Ferizajt, nën dyshimin për kontrabandë të dhe mbajtje të paligjshme të kafshëve.

Në njoftimin e policisë bëhet e ditur se gjatë kontrollit të njësive policore dhe inspektorit të Agjencisë së Ushqimit dhe Veterinës (AUV), në pronën e të dyshuarit L.K dhe dy lokacione tjera, janë gjetur 100 krerë dele pa numra matrikulli dhe pa asnjë dokumentacion përcjellës mbi origjinën apo kontrollin veterinar.

Me vendim të Prokurorit të Shtetit rasti po trajtohet si “Kundërvajtje doganore” dhe i është dorëzuar Doganës së Kosovës në Han të Elezit për procedim të mëtutjeshëm.