Përfundon edicioni i gjashtë i ”FerFilm”

Festivali ndërkombëtar i filmit ”FerFilm”, ka përfunduar mbrëmë në Ferizaj.  Në ceremoninë e mbylljes u ndanë çmimet për filmat më të mirë të këtij edicioni.  Filmi më i mirë eksperimental është zgjedhur “TITLE” i Viktor Belanov  nga  Rusia.  Filmi më i mirë i shkurtër dokumentar u zgjodh “A JOURNEY IN SEARCH OF ABUL ARABI” i regjisorit Akram Elbezzawy  nga  Egjipti, filmi më i shkurtër artistik “AT DAWN” i Julien Trauman nga Franca, filmi më i mirë i shkurtër animacion “THE MONK” i Zarko Ivanov nga Maqedonia, ndërsa çmimin special në këtë edicion ka marrë  filmi i regjisorit nga Izraeli, Omri David  i titulluar “PERSONAL MONOLOGUE”.

Producenti i filmit “THE MONK”, Zarko Ivanon nga Maqedonia, u shpreh i lumtur që filmi i tij u zgjodh ndër më të mirët në këtë festival.

‘’Kjo është hera e dytë që marrë pjesë në këtë festival, kam qenë edhe herën e kaluar ku gjithashtu kam marrë një çmim, po ashtu edhe kësaj here e kam marrë një çmim tjetër, ku e falënderoj Sabriun dhe të gjithë ekipin punues për çmimin, mendoj se si herën e parë ashtu edhe të dytën  festivali ka qenë shumë mirë i organizuar, mendoj se nuk ka festivale të voga ose të mëdha ka festivale ku producenti kënaqet dhe dëshiron të kthehet prapë dhe kjo është përvoja ime në Ferizaj”, tha Zarko Ivanon nga Maqedonia

Ndërsa, Sinan Sertel nga Turqia i cili ishte anëtar i jurisë në këtë edicion, tha se është kënaqësi të jesh pjesë e këtij festivali.

“Për herë të dytë po marrë pjesë në këtë festival, herën e kaluar unë isha në garë me animacionin tim. Unë mendoj se është e rëndësishme të bësh shumë vite në këtë festival dhe të jesh pjesë e tij është përvojë e mirë. Është hera e tretë që jam në Kosovë, unë e dua shumë këtë vend dhe shpresoj të vijë edhe në të ardhmen’’, tha ai.

Kurse, drejtoresha e Kulturës Xhemile Murati-Shabani,  tha se ky festival është rasti më i mirë për të promovuar Ferizajn.

“Komuna e Ferizajt ka kënaqësinë që ka partneritet me festivalin ndërkombëtar të filmit ‘‘FerFilm”, unë besoj se do të vazhdoj ky bashkëpunim, unë shpresoj se juria e ka bërë selektimin dhe përzgjedhja e filmave ka lënë përshtypje të mirë tek dashamirët e filmit, po ashtu ne kemi pasur rastin që ta paraqesim identitetin tonë përmes vlerave kulturore, po ashtu ne e kemi paraqitur edhe mikëprritjen tonë tradicionale për të gjithë filmat nga e gjithë bota dhe unë shpresoj që ky partneritet do të vazhdoj edhe në të ardhmen”, tha Murati-Shabani.

Udhëheqësi i festivalit, Sabri Pajaziti, tha se “FerFilmi” çdo vit e më shumë po  ecë në rrugë të mbarë.

“Besoj se jemi në rrugë të mirë me festivalin, ky është edicioni i gjashtë dhe dalëngadalë po e krijojmë një traditë të rikthimit të vlerave artistike kinematografike në Ferizaj, besoj që deri në vitin e ardhshëm do ta kemi edhe kinemanë edhe dalëngadalë në mënyrë paralele do të zhvillohet edhe më shumë festivali edhe prurja e filmave ndërkombëtar, por pse jo edhe vendor në qytetin e Ferizajt”, tha Pajaziti.

Në edicionin e gjashtë të festivalit ndërkombëtar të filimit “FerFilm”,  gjatë pesë ditëve sa ishte i hapur janë shfaqur mbi 90 filma, në tri kinema të improvizuara.

Leave a Comment

Your email address will not be published.

This site uses Akismet to reduce spam. Learn how your comment data is processed.

728X90
728X90