Sport

Nis Java Evropiane e Sportit në Kosovë

Published

7 years ago

23 September, 2019

Në Prishtinë u hap “Java Evropiane e Sportit”, një organizim i cili synon të aktivizojë qytetarët e Kosovës që të merren me sport dhe aktivitete fizike. Në ceremoninë e hapjes, Ministri në detyrë, i Kulturës, i Rinisë dhe i Sporteve të Kosovës, Kujtim Gashi, para të pranishmëve tha se sivjet pritet një pjesëmarrje masovike e rreth 22 mijë qytetarëve në aktivitetet që organizohen anembanë Kosovës, si një vazhdimësi e sukseseve nga viti i kaluar.

“Vlerësimet për organizimin e vitit të parë kanë qenë shumë të mira. Më lejoni të ndaj me ju lajmin se Kosova për vitin e kaluar ka prirë me nivelin dhe seriozitetin e organizimit të javës dhe është ndër shtetet e rajonit që ka qenë me një nivel shumë të lartë. Si rezultat i kësaj, sivjet Bashkimi Evropian ka zgjedhur të financojë një ngjarje të posaçme e cila do të mbahet më 27 shtator në Suharekë. Me marrjen e detyrës si ministër, jam angazhuar maskimalisht që të plotësoj dhe avancoj infrastrukturën ligjore e fizike të sportit, ngase sporti është një fushë jashtëzakonisht e rëndësishme e cila sjell rezultate të shumanshme, si dhe po promovon imazhin dhe shtetin e Kosovës në arenën ndërkombëtare”, tha Gashi.

Presidenti i Komitetit Olimpik të Kosovës Besim Hasani, si nikoqir i ngjarjes “Forumi për sportin” në kuadër të Javës Evropiane të Sportit, tha se ky forum tash e tutje do të ketë punime të rregullta dhe qëllime shumë të qarta.

“Forumi do të jetë tashmë i rregullt, në mënyrë që…një lloj brainstorming të jetë, një hudhje e ideve dhe këtë e kam parë nga një përfaqësues i Federatës botërore të Golfit në një panel ku ai ishte dhe ai tha se kemi nisur me organizimin e forumeve, në mënyrë që të dëgjojmë të gjithë hisedarët, të gjitha palët e interesit, për shqetësimet e tyre, në mënyrë qe në fund të bëhen rekomandime dhe konkluzione që do t’i obligojnë organet vendimmarrëse t’i shqyrtojnë si një mundësi që edhe ato të fillojnë të implementohen”, u shpreh ai.

Java Evropiane e Sportit sivjet shënon 5 vjetorin e themelimit nga Komisioni Evropian, ndërkaq nga sot e deri më 30 shtator, në Republikën e Kosovës është planifikuar mbajtja e 84 aktiviteteve sportive të cilat organizohen nën patronatin e Minisitrit në detyrë të Kulturës, Rinisë dhe Sporteve të Kosovës, Kujtim Gashi.

Kosovë

Foda publikon listën e futbollistëve të ftuar për ndeshjet e Ligës së Kombeve

Published

2 months ago

18 September, 2026

Redaksia

Përzgjedhësi i Kombëtares së Kosovës, Franco Foda, ka publikuar listën e futbollistëve të ftuar për ndeshjet e radhës në kuadër të Ligës së Kombeve.

Në listë janë portierët Arijanet Muriq, Amir Shaipi dhe Visar Bekaj. Për repartin e mbrojtjes janë ftuar Albian Hajdari, Mërgim Vojvoda, Lumbardh Dellova, Ilir Krasniqi, Ron Raçi, Leard Sadriu e Dion Gallapeni.

Kurse në mesfushë janë ftuar Ermal Krasniqi, Leon Avdullahu, Baton Zabërgja, Veldin Hoxha, Vesel Demaku, Lindon Emërllahu, Donat Rrudhani, Muharrem Jashari, Valmir Matoshi, Milot Rashica dhe Edon Zhegrova.

Sulmit do t’i prijnë Vedat Muriqi, Fisnik Asllani e Albion Rrahmani.

Në këtë edicion të ri të ligës, mungojnë kapiteni i deritashëm Amir Rrahmani, i cili ka vendosur të largohet nga ekipi shkaku i pakënaqësive me FFK-në dhe Florent Hadërgjonaj, i cili u largua shkaku i pakënaqësive me shtabin teknik. Gjithashtu tash e tutje fanellën e Kosovës nuk do ta veshin as Valon Berisha dhe Fidan Aliti të cilët deklaruan se kanë përfunduar karrierën tek “Dardanët”.

Për shkak të lëndimeve mungojnë Elvis Rexhbeçaj, Florent Muslija dhe Kreshnik Hajrizi.

Ekipit i është bashkuar talenti i madh 17 vjeçar i Bayernit, Erblin Osmani, mesfushori Dion Kaçuri që luan tek Austria Lustenau dhe Milot Avdyli, 24 vjeç, i cili luan për Celjen në Slloveni. Më 24 shtator, Kosova pret në Prishtinë Irlandën, më 27 shtator i shkon Austrisë, më 1 tetor luan me Izraelin në Hungari ndërsa më 4 tetor Dardanët presin Austrinë në “Fadil Vokrri”.

Lajme

Donjeta Sadiku, e artë në Lojërat Mesdhetare

Published

2 months ago

27 August, 2026

Redaksia

Boksierja nga Kosova, Donjeta Sadiku, ka fituar medaljen e artë në Lojërat Mesdhetare “Taranto 2026”, pasi në finale mposhti garuesen e Serbisë, Kristina Kuluhova.

Kuluhova, ruse që përfaqëson Serbinë, u lëndua dhe meçi i finales në kategorinë deri në 60 kilogramë, u ndërpre në rundin e dytë.

Kjo është medalja e parë e Kosovës në Lojërat Mesdhetare, që këtë vit mbahen në Itali.

Ekipi i Kosovës në këto lojëra përbëhet nga 163 sportistë, 87 meshkuj dhe 76 femra që garojnë në 21 sporte të ndryshme.

Kosova do të jetë mikpritëse e lojërave të ardhshme mesdhetare që do të mbahen më 2030.

| Radio Evropa e Lirë

Ferizaj

Ferizaj kualifikohet në finale të Kupës së Kosovës në futboll

Published

7 months ago

22 April, 2026

Redaksia

Futbollistët e Ferizajt u kualifikuan për në finalen e Kupës së Kosovës në futboll, pasi në gjysmëfinale eliminuan ekipin e Llapit me rezultat të përgjithshëm 2:1.

Ndeshja e kthimit, e zhvilluar sot në stadiumin e qytetit të Ferizajt, përfundoi pa gola 0-0, por falë fitores prej 2-1 si mysafir në ndeshjen e parë, ferizajasit siguruan vendin në finalen e madhe ku do të përballen me Dukagjinin, i cili në gjysmëfinalen tjetër, eliminoi Ballkanin me rezultat të përgjithshëm 6:2.

Takimi i sotëm në Ferizaj u ndërpre për disa minuta pas hedhjes të gjësendeve në fushë nga shikuesit, për të vazhduar vetëm pas largimit të tërësishëm të shikuesve nga tribunat.

Kjo do të jetë finalja e tretë për ferizajasit, pas asaj të edicionit 2011/2012 kur humbi nga Trepça ’89 dhe finales së edicionit 2012/2013 të cilën e humbi nga Prishtina.