Në kompleksin e Varrezave të Dëshmorëve në Ferizaj, udhëheqës të ekzekutivit ferizajas, familjarë dhe miq, kanë përkujtuar dëshmorët Njazi Bajraktari dhe Faton Vehbiu.

Babai i dëshmorit  Njazi Bajraktari dhe vëllai i dëshmorit Faton Vehbiu, thanë se ndihen krenarë për djemtë që ia falën atdheut, duke theksuar se edhe pas gjithë këtyre viteve jo i gjithë amaneti i tyre u përmbush.

“Është dhimbje por edhe krenari, unë i falënderoj pjesëmarrësit që bëjnë homazhe dhe që i respektojnë dëshmorët, djali im ka qenë 18 vjeçar, ai ka shkuar në luftë bile me pushkë të babagjyshit, është dhimbje për familjen, por edhe krenari, pasi atë çka e kanë menduar ata është arrit dhe shpresoj që edhe ta ruajmë, edhe pse pak janë duke e çu amanetin e tyre në vend”, Sylejman Bajraktari.

“Mërzi nga pak por edhe krenari, unë vëlla e kam dhe gjithmonë thoshte që jetën ka me dhanë për Kosovë dhe gjithmonë e ka pasur atë bindje”, tha vëllai i Fatonit, Mejdi Vehbiu.

Ndërsa, kryetari i Shoqatës së Familjeve të Dëshmorëve të Ferizajt Gafurr Bytyqi, tha se në këtë ditë krenarinë e familjeve të dëshmorëve e forcon fakti që kosovarët jetojnë lirshëm, për çka edhe u flijuan gjithë dëshmorët.

 “Ashtu siç bëmë homazhe dje e pardje dhe që 20 vite për 2 mijë e 200 dëshmorë edhe sot bëmë homazhe, përkujtuam rënien  në altarin e lirisë të Njazi Bajraktarit dhe Faton Vehbiut, dy dëshmorët e komunës së Ferizajt, atëherë kur Kosova zmbrapsej nga forcat serbe dhe paramilitarët e tyre në pritë të këtyre forcave u dolën djemtë e ri si Njaziu e Fatoni dhe për pasojë këta ranë në altarin e lirisë dhe neve na mbetët të jetojmë pjesën tjetër të jetës me krenari që patëm kësi djem e kësi vajza”,tha Bytyqi.

Në kompleksin e Varreza të Dëshmorëve prehen në paqe 62 dëshmorë të komunës së Ferizajt.