Ferizaj

Mbahet turne memorial në ping-pong për heroin Ahmet Hoxha

Published

8 years ago

19 May, 2018

Në hapësirat e shkollës “Tefik Çanga’ në Ferizaj, është mbajtur turneu ndërkombëtar në ping-pong “Ahmet Hoxha”, pjesë e të cilit ishin afër 100 garues nga Kosova, Shqipëria e Maqedonia.

Hapjen e këtij turne njëditor e bëri kreu i komunës Agim Aliu, i cili duke u zotuar se do të përkrahë turne të tilla, tha se ndihet i privilegjuar që e ka njohur nga afër heroin Ahmet Hoxha.

“Unë kam disa vite jetë, por kam pasur fatin të jem afër tij si nxënës në kuadër të shkollës që sot quhet ‘’Zenel Hajdini”, ka qenë privilegj jo vetëm i imi, por edhe i gjithë qytetarëve të Ferizajt, ka qenë privilegj i bashkëluftëtarëve e veprimtarëve të tij, por mbi të gjitha është privilegj sot edhe i gjithë kombit shqiptar që ka pasur një djalë, një bir të kombit, një profesor, ka pasur një intelektual i cili nuk ishte i rastësishëm në vijën kombëtare e politike për çlirimin e vendit”,tha Aliu.

Jeton Beqiri, kryetar i klubit të ping-pongut “Ahmet Hoxha”, klub ky i cili ka bërë edhe organizimin e këtij turneu, tha se heroi Ahmet Hoxha, që ishte profesor i edukatës fizike, ka qenë personi i cili ka bërë që ky sport të zhvillohet në Ferizaj.

“Qëllimi i këtij turneu është të përkujtojmë heroin e Kosovës Ahmet Hoxha dhe klubi jonë nga Ferizaj është klubi i vetëm i ping-pongut që e promovon ping-pongun në Ferizaj e mban emrin e heroit dhe kjo na bënë me u ndi shumë krenar pasi ne e kemi trasu rrugën e tij, ai ka qenë një prej personave në vitet e 90 –ta që ka fillu me zhvillu ping-pongun dhe pas rënies së tij ne kemi vazhdu me vullnet të madh e kemi trashëgu dhe në këtë formë tentojmë ta lartësojmë emrin e tij në të ardhmen”,tha Beqiri.

Skënder Haruni nga klubi i ping-pongut “Skëndërbeu” nga Korça, tha se në këtë turne po marrin pjesë për ta nderuar jetën dhe veprën e heroit Ahmet Hoxha.

“Këtu jemi për të nderuar dëshmorin Ahmet Hoxha dhe si zakonisht çdo vit jemi të respektuar nga klubi i Ferizajt, është kënaqësi për ne, po ndjehemi të respektuar, është një traditë shumëvjeçare që gjithmonë na jep emocione”, u shpreh Haruni.

Ndërsa, bashkëshortja e heroit Ahmet Hoxha, Fevzie Hoxha, tha se ndjehen të nderuar që ky turne po bëhet madhështor çdo vit e më shumë .

“Nderë dhe krenari për neve, unë si bashkëshorte e Ahmet Hoxhës jam krenare që pata një bashkëshort të tillë, ky turne memorial që organizohet çdo vit për Ahmetin i falënderoj të gjithë që marrin pjesë. Jam krenare se ka qenë një bashkëshort i cili ka pasur ideale të mëdha dhe ia arriti qëllimit”, theksoi Hoxha.

Turneu i sotëm memorial ndërkombëtar në ping-pong është i 19-të me radhë, ndërsa organizatorët thanë se nga tani kanë filluar përgatitjet për turneun e 20-të, i cili sipas tyre, do të jetë masovik.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

1 week ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

1 week ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim