Ferizaj

Në disa rrugë të Ferizajt ndryshon qarkullimi i automjeteve

Published

8 years ago

09 July, 2018

Komuna e Ferizajt ka vendosur që nga sot disa rrugë të qytetit të pësojnë ndryshime. Kështu në rrugën “12 Qershori” komunikacioni do të zhvillohet në të dyja kahjet duke filluar nga kryqëzimi i kësaj rruge me rrugën “Dëshmorët e Kombit”deri tek kryqëzimi me rrugën “Madeleine Albright”. Rrugët anësore që lidhin rrugën “Vëllezërit Gërvalla” me rrugën “Emin Duraku”, do të jenë rrugë ku qarkullimi do të zhvillohet në një kahje. Në rrugën “Rexhep Bislimi”, dy rrugët anësore ‘’Qamil Ilazi’’ dhe ‘’Shën Nënë Tereza’’ do të jenë rrugë ku qarkullimi i automjeteve do të zhvillohet në një kahje, ku në rrugën ‘’Shën Nënë Tereza’’ hyrja do të bëhet nga rruga ‘’Rexhep Bislimi’’, kurse hyrja në rrugën ‘’Qamil Ilazi’’ do të bëhet nga rruga ‘’At Nikë Prela’’. Rruga “Rizah Goga” prej kryqëzimit të kësaj rruge me rrugën “Enver Topalli” e deri tek kryqëzimi me rrugën “Avdyl Frashëri”, do të jetë rrugë një kahore. Hyrja në këtë rrugë do të bëhet nga rruga ‘’Enver Topalli.

Drejtori i Shërbimeve Publike Arben Halili, tha se këto ndryshime janë bërë me qëllim të lehtësimit të qarkullimit rrugor për shkak të punimeve të cilat pritet të fillojnë në zonën e qytetit.

“Të gjitha këto ndryshime kanë ndodhur për arsye të shumta, një ndër arsyet është fluksi i madh i qytetarëve që vinë nga diaspora si dhe punimet e ndryshme që do të ndodhin në disa rrugë, konkretisht në zonën e qytetit andaj e kemi pa të arsyeshme që paraprakisht të bëhet ky ndryshim i qarkullimit rrugor nëpër rrugët e komunës së Ferizajt, ta keni parasysh që rrugët një kahore paraqesin siguri më të madhe për qytetarët, andaj në rend të parë është siguria e qytetarëve, andaj kemi menduar se këto ndryshime do ta lehtësojnë sado pak këtë qarkullim të komunikacionit”, tha Halili.

Vendimin e qeverisë lokale nuk e mirëpritën qytetarët ferizajas. Ata thanë se i vetmi ndryshim që po bëhet nga pushtetet që po udhëheqin me Ferizajn, është ndryshimi i qarkullimit rrugor.

“Kjo rrugë është bërë si kryevepër e kryetarëve që vinë në pushtet, njëri e bën një kahëshe tjetri kur vjen dy kahëshe, fatkeqësi po ka këtu, nuk e di është shumë e udhës me qenë një kahëshe, por mendimi i tyre po shitet më shumë por pasoja ka me pas”, tha Musa Ramadani.

“Nuk është mirë hiç, s’ju ka metë tjetër sen veç m’i ndërru rrugët herë kështu herë ashtu’’, tha Bajram Qamili.

U bë e ditur se që nga fillimi i rrugës “Hamëz Jashari” deri tek ndërtesa e komunës do të lejohet parkimi i automjeteve me pagesë, ku menaxhimin e parkingut do ta kryej ndërmarrja “Ambienti”.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

2 weeks ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim