Ferizaj

Ferizajasit kundër idesë për korrigjim të kufijve

Published

7 years ago

28 August, 2018

Deklaratat e presidentit të Kosovës Hashim Thaçi, për korrigjim të kufijve në mes të Kosovës dhe Serbisë, nuk po u pëlqejnë qytetarëve ferizajas. Ata thonë se për një gjë të tillë duhet të vendosin qytetarët përmes referedumit, e jo një person. Sipas tyre, korrigjimi eventual i kufijve do të shkaktonte trazira në vend.

“Presidenti nganjëherë çon pluhur nëpër lloç, kështu i kisha quajtur deklaratat e tij, ideja për korrigjim të kufijve shkon në dëm të Kosovës pasi ne nuk kemi as forcë politike, por as ushtarake që ta detyrojmë Serbinë të na kthej territore, shkëmbimi i Medvegjës, Bujanocit e Preshevës me veriun e Kosovës nuk shkon në favor tonin, por Presidenti vetëm po hedh pluhur e nuk po i sqaron idetë pse. Shqiptarët mjaftë janë tkurrur, jemi populli i vetëm në Evropë që kemi dalë bukur prej gjeografisë e kemi hyrë në historinë tragjike”, tha Enver Zhinipotoku.

“Ne nuk jemi për me i ndërru kufijtë, absolut jemi kundër ndërrimit të kufijve, por ne duhet me ngulë këmbë mos me lëshu pe për asnjë milimetër, pasi ne kemi humbur mjaftë, ndërsa tani nuk mund të vendos vetëm një person, deri kur dojmë me dhënë, sa herë të bëhet luftë ne me dhënë, ne kufijtë i kemi s’kemi nevojë pse me i lu, ndërsa Presheva, Bujanoci e Medvegja në 47-tën kanë qenë me Kosovën, ashtu ishte në lajme që kanë dalë dokumente, ato tonat janë por na i kanë marrë”, tha Ibrahim Shabani.

“Nëse fuqitë e mëdha, veçmas SHBA vendos, na qoftë për hajër, na pëlqej s’na pëlqej kjo”, tha Ibrahim Budakova.

“Jo me vendos vetëm një njeri, por duhet me referendum, si në Serbi ashtu edhe në Kosovë, u tha se Presheva Medvegja dhe Bujanoci kanë qenë në Kosovë, ne kemi qef me i marrë ato por ndoshta edhe serbët e pjesës së veriut kanë qef me shku kah Serbia, me një fjalë ndryshimi i kufijve është luftë, ne jemi popull i vogël, se në çfarë kuptimi ka thënë Thaçi aty nuk e dimë. Maqedonia na e murr një pjesë andej ka Debëlldehu edhe ne u pajtum edhe Mali i Zi pak, tani edhe Serbia, Kosova veç po ngushtohet dhe ne nuk kemi fuqi as me luftu as me mbrojtë por me dhënë me vullnet nuk e shoh të arsyeshme, ndërsa serbët na mashtrojnë gjthmonë se ata nuk na e japin kurrë Preshevën, Medvegjën e Bujanocin”, tha Ismail Prushi.

“Presidenti nuk e ka të drejtën të vendos për kufi të Kosovës, por kjo vendoset me një referendum gjithëpopullor, ndërsa Presheva, Medvegja e Bujanoci janë troje shqiptare nuk kemi pse të bisedojmë për ato troje”, tha Naim Ramadani.

Gjatë ditës, presidenti i Kosovës Hashim Thaçi, ka përsëritur qëndrimin e tij për bashkimin e Preshevës, Bujanocit dhe Medvegjës me Kosovën. Ai megjithatë ka thënë se nuk mund të ketë ndarje të shtetit dhe shkëmbim territoresh.

Ferizaj

Ngritët aktakuza e parë për zgjedhjet e 28 dhjetorit

Published

2 weeks ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

3 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.