Që nga sot organizata “Iniciativa për Progres” do të nis një cikël të tubimeve publike që do të zhvillohen nëpër fshatrat e Ferizajt lidhur me projektimin e buxhetit të vitit 2019. Sipas zyrtarëve të INPO-s, kjo iniciativë përfshin edhe një numër të asamblistëve lokal të cilët janë paraparë të marrin pjesë nëpër këto debate, ku përmes tyre qytetarët do të parashtrojnë kërkesat dhe problemet me të cilat përballen. Valentina Abazi nga INPO, tha se ideja për këto tubime nëpër fshatra vjen pasi që në shumicën e rasteve ekzekutivi dhe legjislativi kanë dështuar me pjesëmarrjen e qytetarëve nëpër tubime të tilla që i ftonin në sallën e Kuvendit.

“Kështu që INPO prej sot fillon takimet nëpër zona të ndryshme të qytetit si dhe nëpër fshatra, ku sonte janë paraparë të zhvillohen në Sojevë dhe fshatrat përreth, Komogllavë, Gurëz dhe Nikadin, ku i kemi ndarë edhe përfaqësuesit e zgjedhur, jo domosdoshmërisht të fshatrave që u takojnë, por edhe në të kundërtën, pikërisht për t’i ikur elektoratit,  por të shpërndahen nëpër  vende ku ata nuk përballen me konflikte politike, por vetëm me kërkesat që banorët parashtrojnë. Ne e dimë që drafti i buxhetit tashmë është dorëzuar tek kryesuesja e Kuvendit, por ne nuk po mendojmë se këto tubime janë të vonshme, pasi që Kuvendi është organi më i lartë vendimmarrës dhe vlerëson se ai buxhet korrespondon me kërkesat e qytetarëve dhe atë pasi ata t’i dëgjojnë këto kërkesa të cilat dalin prej këtyre tubimeve. Tek e fundit Kuvendi e ka të drejtën po ashtu mos me votu këtë draft-buxhet nëse ai nuk korrespondon me kërkesat e banorëve të komunës së Ferizajt”, tha Abazi.

E, derisa ditë më parë komuna kishte njoftuar që draft-buxheti për vitin e ardhshëm iu dorëzua kryesueses së Kuvendit, ky dokument i rëndësishëm nuk u pa nga askush. Ai as nuk u publikua në faqen e komunës, por as nuk iu dha medieve dhe shoqërisë civile që e kërkuan.

“Jo, nuk e kemi pa draft-buxhetin e vitit 2019, sepse e kemi kërkuar tek kryesuesja e Kuvendit por nuk na kanë dhënë, besoj këtë nuk po dëshirojnë ta bëjnë publike deri pak ditë para Kuvendit”, tha Abazi.

Ndryshe, sipas INPO-s, tradicionalisht hartimi i buxhetit komunal nga ekzekutivi bëhet pa ndonjë përfshirje të qytetarëve. Kjo organizatë gjatë monitorimit që ka bërë ka nxjerrë krahasime vit pas viti, ku rezultatet tregojnë që kërkesat e qytetarëve janë inkorporuar jashtëzakonisht pak në draftin final të buxhetit që miratohet nga Kuvendi Komunal.