Ferizaj

Në 20 vjetorin e rënies vetëm 14 persona bëjnë homazhe pranë varrit të dëshmorit

Published

7 years ago

17 September, 2018

Megjithëse dha jetën për lirinë që sot e gëzojmë, për të nderuar sakrificën e dëshmorit ferizajas Bekim Osmani, në kompleksin e Varrezave të Dëshmorëve u panë vetëm 14 persona të cilët bënë homazhe në 20 vjetorin e rënies së tij.

Babai i dëshmorit Bekim Osmani, Hamdi Osmani, tha se djali që ia fali atdheut atë kohë ishte vetëm 19 vjet, por pavarësisht kësaj nuk gëzon asnjë respekt nga institucionet e vendit.

“Ndoshta po foli keq, por pak më respektojnë mua që jam prind i dëshmorit, prej mërzisë e mbaj fotografinë e djalit gjithmonë me vete, ka qenë 19 vjet, por nuk kish njeri çka me ba, ishalla perëndia i paguan se ata kanë derdhur gjak për këtë liri dhe jo vetëm për familjen time kush e ka kuptuar këtë, e kush nuk e di Allahu i pagoftë”, tha babai i dëshmorit Bekim Osmani.

Kryetari i Shoqatës së Familjeve të Dëshmorëve në Ferizaj Gafurr Bytyqi, tha se njoftimet për homazhe në përvjetorin e rënies së dëshmorit Osmani janë bërë me kohë, ndërkaq pjesëmarrja është obligim moral i institucioneve dhe qytetarëve.

“Ne e kemi si standard në shoqatë që në 5 ditë në vit në datat kombëtare që ndërlidhen me luftën e UÇK-së vjen në mënyrë masovike e tërë popullata, kurse për data individuale të rënies së dëshmorëve vijnë familjarë, shokë dashamirë, do të thotë nuk janë qind për qind obligativ, edhe pse për mua do të ishte obligative se ka rënë dëshmori dhe kjo është virtyt i kombit”, tha Bytyqi.

Dëshmori Bekim Osmani nga fshati Jezerc i Ferizajt, vdiq në fshatin e tij të lindjes më 17 shtator të vitit 1998 .

Ferizaj

Ndërroi jetë artisti dhe koreografi i shquar ferizajas, Bajram Tahiri

Published

2 days ago

03 February, 2026

Redaksia

Ka ndërruar jetë Bajram Tahiri, artist, valltar dhe koreografi i shquar i ansamblit “Kastriotët” në Ferizaj.

I ndjeri gjithë jetën e tij artistike ia kushtoi ruajtjes dhe begatimit të traditës dhe trashëgimisë kulturore, fillimisht si valltar pastaj edhe si koreograf i A.K.V ,,Kastriotët” Ferizaj.

Për një periudhë kohore, nga viti 1999-2009, Tahiri ishte Drejtor Operativ në KRM “Pastërtia”, pastaj nga viti 2017 deri në vitin 2020 shërbeu si këshilltar politik në Ministrinë e Tregtisë dhe Industrisë, derisa nga viti 2010 udhëhoqi me kompaninë “Mbrojtja e Ambientit”.

Mbledhja komemorative për artistin e ndjerë, Bajram Tahiri, mbahet më 3 Shkurt 2026, ora 14:00 në Teatrin “Adriana” kurse ceremonia e varrimit nga ora 15:30 në varrezat e reja të qytetit.

Ferizaj

Ngritët aktakuza e parë për zgjedhjet e 28 dhjetorit

Published

2 weeks ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.