Ferizaj

Ora e parë e mësimit i kushtohet historikut të Epopesë së Jezercit

Published

7 years ago

27 September, 2018

Ora e parë e mësimit në shkollat e Ferizajt ishte më ndryshe se ditëve të tjera. Përgjatë një ore mësimore, nxënësit ferizajas patën rastin të informohen më shumë rreth historikut të Epopesë së Jezercit.

Nënkryetari i Organizatës së Veteranëve të Luftës së UÇK-së në Ferizaj, Luan Jahiri, para nxënësve të klasës së 12 të gjimnazit “Kuvendi i Arbërit”, kërkoi që të mësojnë dhe të kontribuojnë në ndërtimin e shtetit, ngase shumë dëshmorë u flijuan për këtë ditë.

“Ne ndjehemi krenarë që sot ju jeni të lirë të mësoni në këto shkolla, gjeneratat tona kemi pasur vështirë të mësojnë, unë kam pasur fatin të jem ajo gjenerata që kemi mësuar nëpër shtëpi, kemi pasur burgime, maltretime, rrahje e vrasja të shokëve tanë, por ka ardhur tani ajo ditë që ju të shkolloheni më mirë, unë besoj se ju keni mundësi të mësoni e të jepni kontribut për shtetin e juaj, prandaj ju ftoj që të mësoni dhe të kontribuoni për ndërtimin e shtetit”, tha Jahiri.

Kurse, drejtori i Arsimit në Ferizaj Afrim Llabjani, tha se qëllimi i kësaj ore historike është që nxënësit të dinë se si erdhi deri tek çlirimi i vendit.

“Në vazhdën e aktiviteteve që janë mbajtur gjatë këtyre ditëve për shënimin e 20 vjetorit të Epopesë së Jezercit një ndër ato aktivitete që ka planifikuar Këshilli Organizativ ka qenë edhe mbajtja e një ore historike në të gjitha shkollat e komunës së Ferizajt, kjo orë historike është mbajtur në të gjitha shkollat e Ferziajt dhe ne si Këshill Organizativ ishim të interesuar sot që të jemi bashkërisht me nxënësit në një orë historike dhe si po rrjedh ajo dhe e pamë që nxënësit ishin të interesuar për të dëgjuar se çka ka ndodhur në atë kohë kur Ushtria Çlirimtare e Kosovës bënte përpjekje për ta çliruar këtë vend”, tha Llabjani.

Aktivitetet për shënimin e Epopesë së Jezercit kanë filluar të hënën dhe do të zgjasin deri të shtunën, ku është paraparë ecje nga Ferizaj deri në Jezerc.

Ferizaj

Ngritët aktakuza e parë për zgjedhjet e 28 dhjetorit

Published

1 week ago

22 January, 2026

Redaksia

Prokuroria Themelore në Ferizaj ka ngritur aktakuzën e parë lidhur me zgjedhjet e 28 dhjetorit 2025, për veprën penale “Asgjësimi i dokumenteve të votimit”.

Në njoftim bëhet e ditur se sipas aktakuzës, më 28 dhjetor 2025, në një qendër të votimit në qytetin e Shtimes, i pandehuri me inicialet M.A., ka dëmtuar dokumentet e votimit lidhur me zgjedhjet për Kuvendin e Republikës së Kosovës.

Me këto veprime janë përmbushur elementet e veprës penale për të cilën është ngritur aktakuza pranë Gjykatës Themelore në Ferizaj – Departamenti për Krime të Rënda.

Prokurori i Shtetit njofton opinionin publik se të gjitha rastet eventuale që kanë të bëjnë me procesin zgjedhor të 28 dhjetorit 2025, do të trajtohen me prioritet dhe në përputhje të plotë me ligjin, me qëllim të mbrojtjes së integritetit të procesit zgjedhor dhe sundimit të ligjit.

Ferizaj

Devijime minimale të rezultatit nga rinumërimi i mbi 53% të votave në Ferizaj

Published

2 weeks ago

20 January, 2026

Redaksia

Nga rezultatet e përditësuara të KQZ-së për rinumërimin e votave në Ferizaj, deri në orën 12:00, kur janë rinumëruar rreth 53% të të gjitha votave për kandidatë për deputetë, vërehet një numër shumë i vogël i devijimit nga rezultatet preliminare.

Diferencat e gjetura të votave janë përgjithësisht në marzhën e gabimeve teknike, pasi që deri tani dallimi i votave individuale në shumicën e rasteve është një shifror me disa përjashtime, ku dallimi është mes 30 dhe 40 vota.

Mospërputhjet më të mëdha, deri tani janë tek disa kandidatë të Lëvizjes Vetëvendosje, si tek rasti i Hekuran Muratit të cilit i shtohen +37 vota, Hajrulla Çekos +22 vota, Valon Ramadanit +19 vota derisa në të njëjtën kohë, Albin Kurtit i hiqen – 39 vota apo Glauk Konjufcës të cilit i hiqen -20 vota.

Tek PDK-ja, kandidatit Rashit Qalaj i shtohen +10 vota, Burim Bajramit +10 vota kurse kandidatit Rrahman Rama i hiqen -16 vota, Bedri Hamzës -8 vota e kështu me radhë.

Tek LDK-ja, Ukë Rugovës i shtohen +13 vota, Hykmete Bajramit +11 vota derisa janë disa kandidatë të cilëve u hiqen nga 2 ose 3 vota.

Sipas ecurisë së deritashme, pritet që rinumërimi i tërësishëm i votave në Ferizaj të përfundojë në orët e pasdites së sotme.

Ferizaj

Për manovra të rrezikshme ndëshkohen 7 shoferë në Ferizaj

Published

3 weeks ago

12 January, 2026

Redaksia

Policia në Ferizaj ka njoftuar se gjatë kontrolleve të realizuara në pika të ndryshme të qytetit, kanë identifikuar dhe ndëshkuar tetë shoferë për shkelje të rënda në komunikacion.

Sipas njoftimit, 7 shoferë janë ndëshkuar, sepse kanë kryer manovra të rrezikshme, përfshirë rrëshqitjen e gomave me frenë dore, ndërsa një shofer është ndëshkuar për qarkullim me automjet me afat të skaduar të regjistrimit.

Për këto kundërvajtje, shtatë shoferëve u është shqiptuar gjobë nga 150 euro dhe nga një (1) pikë negative secilit.

Të ndëshkuarit janë:

V.H. (31 vjeç), me veturë Mercedes-Benz, ngjyrë hiri, me targa vendore

B.R. (30 vjeç), me veturë BMW XM, ngjyrë e kaltër, me targa vendore

D.B. (21 vjeç), me veturë Audi, ngjyrë e bardhë, me targa vendore

B.B. (22 vjeç), me veturë VW Golf, ngjyrë e bardhë, me targa vendore

B.I. (20 vjeç), me veturë Opel, ngjyrë hiri, me targa vendore

L.S. (31 vjeç), me veturë Audi, ngjyrë e bardhë, me targa vendore

L.A. (32 vjeç), me veturë BMW, ngjyrë e bardhë, me targa vendore

Ndërsa shoferi A.G. (29 vjeç), me veturë Ford, ngjyrë e gjelbër, me targa vendore, është ndëshkuar pasi automjeti kishte afat të skaduar të regjistrimit që nga data 02.12.2025.

Atij i është shqiptuar gjobë prej 200 euro dhe automjeti i është konfiskuar përkohësisht.