Ferizaj

Me minimaratonë përmbyllet muaji kundër kancerit të gjirit

Published

7 years ago

18 October, 2018

Aktivitetet për përmbylljen e muajit sensibilizues për luftën kundër kancerit të gjirit, në Ferizaj do të mbyllen të dielën me një minimaratonë. Për këtë ngjarje aktivistet e shoqërisë civile tashmë kanë përgatitur edhe numrat e kësaj minimaratone, e cila u tha se do të zhvillohet prej sheshit “Adem Jashari” deri tek rruga “Brahim Ademi” në këtë qytet. Florina Ujupi aktiviste e kësaj fushate, tregoi se paratë që do të grumbullohen nga blerja e numrave për pjesëmarrje në këtë minimaratonë, do të dedikohen për gratë e prekura nga kjo sëmundje.

“Kjo minimaratonë është më shumë si lloj bamirësie, do të thotë, të gjitha mjetet që do të mbledhen prej aty do të shkojnë për gratë që janë të prekura nga kjo sëmundje. Ne e dimë që shërimi i kësaj sëmundje kushton shumë shtrenjtë, por së paku do të gjejmë disa prej tyre që së paku t’ua lehtësojmë ndonjë terapi. Maratona do të nisë prej sheshit dhe do të vazhdojë deri tek rrethi afër Policisë dhe do të kthehen sërish, që sipas llogarisë vrapi është diku rreth 5 kilometra“, tha Ujupi.

Ujupi tha se numrat që po shiten për këtë minimaratonë kushtojnë 5 euro, mirëpo të kontribuojnë në këtë aktivitet bamirës munden edhe të tjerët që nuk marrin pjesë në minimaratonë.

“Këta numra për momentin i kemi shtypur deri në 100 ku sot do të filloj shitja e tyre në sheshin e qytetit në orët e pasdites dhe mbrëmjes. Shitja e tyre do të bëhet deri këtë të shtunë, ndërsa edhe ata që nuk do të marrin pjesë në vrapim mund t’i blejnë dhe të kontribuojnë në këtë aktivitet që ne po zhvillojmë në kuadër të muajit të ndërgjegjësimit kundër kancerit të gjirit“, tha Ujupi.

Minimaratona që do të mbahet të dielën në kuadër të fushatës sensibilizuese për kancerin e gjirit, do të zhvillohet prej orës 10:00 deri në orën 12:00.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

1 week ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim