Ferizaj

Shtylla elektrike rrezikon banorët e rrugës “Shtjefën Gjeçovi”

Published

6 years ago

24 October, 2019

Nga vjetërsia e tyre, njëra nga shtyllat elektrike në rrugën “Shtjefën Gjeçovi” të Ferizajt rrezikon jetët e banorëve pasi është gati të rrëzohet. Ata thonë se ky problem është i kahmotshëm ani pse janë ankuar disa herë në KEDS.

“Shumë shpejt kjo ka për t’u rrëzuar, nëse do vie ndonjë erë e madhe kjo do të bie. Këtu rrezik është për fëmijët dhe rrezik për kalimin e veturave, sepse dridhje veturat bëjnë dhe shtylla dridhet, këto janë duke i mbajtur vetëm telat. Disa herë kemi qenë në KEK, KEK-u thonë që kanë qenë me pa, me vizitu, por pengesa ku është nuk e dimë. Ky problem është me vite, po e kemi problem edhe me tejkalu, problem me ardhë edhe ndonjë kamion mobiljesh apo çfarëdo, sepse nuk mund të hyjmë, nuk kemi zgjidhje, vetëm t’i bartim me dorë”, tha Zaim Shijaku.

“Me ardhë një erë menjëherë rrëzohet dhe të gjitha këto telat i tërheq dhe neve do të na vë zjarrin me të gjitha që i kemi, pajisje e me shtëpia, me të gjitha”, tha Bekim Bajrami.

“Ne kemi problem edhe për mbeturina, kompania na kanë thënë se nuk do të vijnë më të marrin mbeturinat shkaku i kësaj shtylle. E tash ju lutemi të bëjmë diçka me këtë shtyllë, ta rregullojmë, të mos kemi më probleme. E vjetër është, që tre, katër vite është shtylla kështu. Vie KEK-u, vetëm e shikojnë, thonë se do të vijmë nesër, por nuk ndërmarrin asgjë”, tha Azem Kurtishi.

Për këtë rast,Televizioni Tema ka kontaktuar me drejtorin e KEDS-it për rajonin e Ferizajt, Ramadan Ahmeti, i cili tha se KEDS-i ka shkuar për ta rregulluar, mirëpo konsumatori që e ka përballë shtyllën nuk ka lejuar intervenimin për shkak të kontesteve, mirëpo tha se me asistencën e policisë do të bëhet ndërrimi i shtyllës.

Ferizaj

Manifestimi qendror për Fitër Bajram mbahet në Xhaminë e Madhe në Prishtinë

Published

1 week ago

18 March, 2026

Redaksia

Bashkësia Islame e Kosovës bëri të ditur agjendën për festën e Fitër Bajramit, më 20 mars 2026.

Kështu, manifestimi qendror që do të mbahet në Xhaminë e Madhe në Prishtinë fillon në orën 05:03 me faljen e namazit të sabahut, pas të cilit do të mbahet ligjërata tematike kushtuar kësaj feste nga krye imami i KBI-së në Ferizaj, Ibrahim Beqiri.

Namazi i Fitër Bajramit falet në orën 06:18, të cilit do t’i prijë kryeimami i Bashkësisë Islame të Kosovës, Vedat Sahiti.

Hytben e Fitër Bajramit do ta mbajë Myftiu i Kosovës, Naim Tërnava, i cili do t’i drejtohet opinionit të gjerë me mesazhin e kësaj feste.

Me rastin e festës së Fitër Bajramit, ditën e parë, më 20 mars 2026, Kryesia e BIK-ut, sipas traditës, organizon pritje urimi në selinë e saj nga ora 09:00 deri në orën 12:00.

“Kryesia e Bashkësisë Islame të Kosovës ua uron festën e Fitër Bajramit të gjithë besimtarëve dhe opinionit të gjerë, duke e lutur Zotin që t’i ketë pranuar agjërimin, lutjet dhe ibadetet tona.

Me fat festa e Fitër Bajramit!”, thuhet mes tjerash në njoftimin e BIK-ut.

Ferizaj

Nënshkruhet kontrata 24 milionëshe për Spitalin e Ferizajt

Published

2 weeks ago

17 March, 2026

Redaksia

Ministri i Shëndetësisë, Arben Vitia ka njoftuar se ka nënshkruar kontratën për vazhdimin e ndërtimit të objektit të ri të spitalit të Ferizajt.

Sipas njoftimit, kontrata për “ndërtimin e objektit të spitalit të përgjithshëm në Ferizaj – vazhdim projekti” ka vlerë prej 24 milionë euro dhe spitali parashihet të finalizohet për 30 muaj.

“Kam nënshkruar kontratën për vazhdimin e punimeve në Spitalin e Ferizajt.

Pas shumë sfidave dhe vështirësive të trashëguara e të reja, ky projekt do të finalizohet brenda 30 muajsh. Ky është një projekt shumë i rëndësishëm për këtë rajon, që do të realizohet sipas standardeve më të larta të infrastrukturës spitalore, me një kosto prej 24 milionë euro.

Urime për të gjithë qytetarët e Ferizajt për këtë projekt të shumëpritur” ka shkruar ministri Vitia në postim.

Ndryshe, objekti i ri i spitalit të Ferizajt kishte filluar në vitin 2018 dhe vlera e projektit fillestar ishte 10.2 milionë euro. Më vonë, kësaj kontrate iu shtuan edhe 1 milionë të tjera. Asokohe kishte përfunduar vetëm ndërtimi i vrazhdë i objektit.

Punimet u ndërprenë për shkak të padive ligjore të ndërsjella mes Ministrisë së Shëndetësisë dhe kompanisë ndërtuese.

Kontrata për vazhdimin e ndërtimit të spitalit është fituar nga Grupi i Operatorëve Ekonomik ADA CONSULTING GROUP SH.P.K., SHM Architecture SH.P.K. dhe Termo Consing SH.P.K”.

Ferizaj

Defekt në Nënstacionin Ferizaj 1, një pjesë e qytetit mbetet pa energji elektrike

Published

2 weeks ago

13 March, 2026

webmaster

KOSTT ka njoftuar se është shkaktuar një avari në Nënstacionin Ferizaj 1, konkretisht në transformatorin T3 (110 kV/10 kV).

Sipas njoftimit, si pasojë e kësaj avarie një pjesë e konsumatorëve që furnizohen nga ky transformator kanë mbetur pa energji elektrike, me një ngarkesë rreth 20 MW.

Nga KOSTT bëhet e ditur se ekipet teknike janë në koordinim me ekipet e KEDS për të siguruar furnizim alternativ me energji elektrike në kohën më të shpejtë të mundshme dhe në mënyrë të sigurt.

KOSTT u ka kërkuar mirëkuptim qytetarëve të prekur nga kjo ndërprerje e furnizimit me energji elektrike.

Foto – Ilustrim